ଟେଷ୍ଟ ଅଧିନାୟକ ପଦ ଛାଡିଲେ ବିରାଟ କୋହଲି, ଭାଇ ବିକାଶ କହିଲେ…
କନକ ବ୍ୟୁରୋ : ଟି-୨୦, ଦିନିକିଆ ପରେ ଏବେ ଟେଷ୍ଟ ଅଧିନାୟକ ପଦ ଛାଡିଛନ୍ତି ବିରାଟ କୋହଲି । ଶନିବାର ଅପ୍ରତ୍ୟାଶିତ ଭାବେ ଟେଷ୍ଟ ଅଧିନାୟକ ପଦକୁ ବାଏ ବାଏ କରିଛନ୍ତି କୋହଲି । ଏଣିକି ବିରାଟଙ୍କୁ କେବଳ ବ୍ୟାଟର ଭୂମିକାରେ ଟିମରେ ଦେଖିବାକୁ ମିଳିବ । ତେବେ ବିରାଟ ହଠାତ୍ ଏଭଳି ଅଧିନାୟକ ପଦ ଛାଡିବା ଅନେକ କ୍ରିକେଟପ୍ରେମୀଙ୍କୁ ଆଶ୍ଚର୍ଯ୍ୟଚକିତ କରିଛି । ତେବେ ଟେଷ୍ଟ କ୍ରିକେଟର ଅଧିନାୟକ ପଦ ଛାଡିବା ନେଇ ଟ୍ୱିଟରରେ ଘୋଷଣା କରିବା ପରେ କୋହଲିଙ୍କ ପରିବାର ପକ୍ଷରୁ କିଛି ପ୍ରତିକ୍ରିୟା ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
କୋହଲିଙ୍କ ଭାଇ ବିକାଶ କୋହଲି ଇନଷ୍ଟାଗ୍ରାମ ପୋଷ୍ଟରେ କମେଣ୍ଟ ଦେଇ କହିଛନ୍ତି, ତୁମେ କେବଳ ପରିବାର ନୁହେଁ ପୂରା ଦେଶକୁ ଗର୍ବିତ କରିଛ । ତୁମ ପାଇଁ ଆମେ ଗର୍ବିତ । ତୁମେ ସବୁବେଳେ ଗର୍ବର ସହ ନିଜ ମୁଣ୍ଡ ଉଠାଇ ରଖିଛ । ନିଜ ଟିମ୍ ଓ ସ୍ୱପ୍ନ ଉପରେ ବିଶ୍ୱାସ କରିଛ । ତୁମ ସହ ଆମେ ସବୁବେଳେ ଅଛୁ । ଭଗବାନ ତୁମକୁ ଭଲରେ ରଖନ୍ତୁ । ଏହାସହ ବିକାଶ ପୁରୁଣା ଫଟୋ ମଧ୍ୟ ଇନଷ୍ଟାଗ୍ରାମ ଷ୍ଟୋରୀେୀ ସେୟାର କରିଥିଲେ । ଯେଉଁଥିରେ କୋହଲି ଓ ଅନୁଷ୍କାଙ୍କ ସହ ବିକାଶ ମଜା କରୁଥିବାର ଦେଖିବାକୁ ମିଳିଛି ।
ଗତକାଲି ବିରାଟ କୋହଲି ସୋସିଆଲ ମିଡ଼ିଆରେ ଏକ ପୋଷ୍ଟ ସେୟାର କରି ଲେଖିଥିଲେ, ଗତ ୭ ବର୍ଷ ଧରି କଠିନ ପରିଶ୍ରମ ସହ ଟିମ୍ ପାଇଁ କାମ କରୁଥିଲି । କିନ୍ତୁ ଯେତେବେଳେ ମୋତେ ଲାଗିଲା କି ମୁଁ ମୋର ୧୨୦ ପ୍ରତିଶତ ଟିମ୍ ପାଇଁ ଦେଇପାରିବିନି , ସେତେବେଳେ ଅଧିନାୟକ ଭାବେ ରହିବା ଠିକ୍ ହେବ ନାହିଁ । ଟ୍ୱିଟରରେ ପୋଷ୍ଟ ସେୟାର କରିବା ପୂର୍ବରୁ ଡ୍ରେସିଂ ରୁମରେ ଆଲୋଚନା ବେଳେ ଟେଷ୍ଟ ଟିମର ଅଧିନାୟକ ପଦ ଛାଡୁଥିବା ନେଇ ସାଥୀ ଖେଳାଳୀଙ୍କୁ ସୂଚନା ଦେଇଥିଲେ କୋହଲି । ସେତେବେଳେ ବିରାଟଙ୍କ ନିଷ୍ପତ୍ତି ଅନେକଙ୍କୁ ଆଶ୍ଚର୍ଯ୍ୟ କରିଥିଲା । ତେବେ କୋହଲି ଏହି ନିଷ୍ପତ୍ତି ଜଣାଇବା ପରେ ସାଥୀ ଖେଳାଳୀଙ୍କୁ ଅନୁରୋଧ କରିଥିଲେ ଏହି ଖବରକୁ ଡ୍ରେସିଂ ରୁମ ବାହାରେ କାହା ସହ ସେୟାର ନ କରିବା ପାଇଁ । ଡ୍ରେସିଂ ରୁମ୍ ମିଟିଂର ୨୪ ଘଣ୍ଟା ପରେ କୋହଲି ସୋସିଆଲ ମିଡ଼ିଆରେ ନିଜ ନିଷ୍ପତ୍ତି ବାବଦରେ ଜଣାଇଥିଲେ ।
ଭାରତୀୟ ଟେଷ୍ଟ କ୍ରିକେଟ ଇତିହାସରେ ବିରାଟ କୋହଲି ସବୁଠୁ ସଫଳତମ ଅଧିନାୟକ ଭାବେ ଜଣାଶୁଣା । ୨୦୧୪-୧୫ ଅଷ୍ଟ୍ରେଲିଆ ବିପକ୍ଷ ସିରିଜ ମଧ୍ୟରେ ମହେନ୍ଦ୍ର ସିଂ ଧୋନୀ ଟେଷ୍ଟ କ୍ରିକେଟରୁ ଅବସର ନେଇଥିଲେ । ସେତେବେଳେ ଭାରତ ଟେଷ୍ଟ ରାକିଂରେ ୭ ନମ୍ବର ସ୍ଥାନରେ ରହିଥିଲା । ଆଉ ଏହାପରେ ଦଳର ମଙ୍ଗ ଧରିଥିଲେ କୋହଲି । ଟେଷ୍ଟ କ୍ରିକେଟରେ ଟିମ୍ ଇଣ୍ଡିଆକୁ ନମ୍ବର-୧ କରିବା ସହ ଦୀର୍ଘ ୫ ବର୍ଷ ଧରି ଏହି ଟ୍ରେଣ୍ଡ ଜାରି ରଖିଥିଲେ । ବିରାଟଙ୍କ ନେତୃତ୍ୱରେ ଭାରତ ୬୮ଟି ଟେଷ୍ଟ ମ୍ୟାଚ୍ ଖେଳିଥିବା ବେଳେ ୪୦ଟିରେ ବିଜୟୀ ହୋଇଛି । ଖାସକରି ବିଦେଶ ମାଟିରେ ବିରାଟଙ୍କ ନେତୃତ୍ୱରେ ଦମଦାର ପ୍ରଦର୍ଶନ କରିଛି ଟିମ୍ ଇଣ୍ଡିଆ । ଅଷ୍ଟ୍ରେଲିଆ, ଇଂଲଣ୍ଡ, ୱେଷ୍ଟଇଣ୍ଡିଜ ମାଟିରେ ଭାରତ ବିଜୟର ସ୍ୱାଦ ଚାଖିଛି ।