ହୋଟେଲରେ ବାସନ ମାଜି ଭାଇଭଉଣୀଙ୍କୁ ପୋଷୁଛି ବଡ ଭଉଣୀ । ହାତୀ ଘର ଭାଙ୍ଗିଦେବା ପରେ ବେସାହାରା ସମସ୍ତେ…
କନକ ବ୍ୟୁରୋ: ଦିଦି ଲୋ ! ତୁ ଆମ ଭଉଣୀ କମ, ମାଆ ଅଧିକ । ମାଆ ସିନା ଅଧା ବାଟରେ ଛାଡି ଚାଲିଗଲା ହେଲେ ତୁ ଆମକୁ ଛାଡିଲୁନି । ଛାତିକୁ ପଥର କରି ତୋ ହାତରେ ହାଡଭଙ୍ଗା ପରିଶ୍ରମ କଲୁ । ଆମକୁ ବଞ୍ଚେଇ ରଖିବା ପାଇଁ ହୋଟେଲରେ ବାସନ ମାଜିଲୁ । ଆଉ ଆମ ମୁହଁରେ ଦାନାଦେଲୁ । ତୁ ସତରେ ମହାନ ଲୋ ଦିଦି, ତୁ ଆମ ଭଉଣୀ କମ, ମାଆ ଅଧିକ…
Kanak News is now on WhatsApp
Join and get latest news updates delivered to you via WhatsApp
ଭଙ୍ଗାଘରେ ଯନ୍ତ୍ରଣାର ଜୀବନ ବିତାଉଥିବା ଏ କୁନିକୁନି ଭାଇଭଉଣୀକୁ ଭରସା ଦେଇଛି ବଡ ଭଉଣୀ ସରସ୍ୱତୀ । ଭାଗ୍ୟ ସମସ୍ତଙ୍କୁ ଭଲରେ ରଖେନି । କାହାକୁ ବି ଏମିତି ଦୟନୀୟ ସ୍ଥିତିରେ ରଖେ । ଆଉ ସବୁ ପରିସ୍ଥିତିକୁ ସାମ୍ନାକରି ନିଜ ସହ ଅନ୍ୟକୁ ପୋଷିପାରନ୍ତି ଏ ସରସ୍ୱତୀଙ୍କ ପରି କିଛି ଧର୍ଯ୍ୟବାନ ଯୁବତୀ ।
ହଁ ସୁନ୍ଦରଗଡ କୋଇଡା ବ୍ଲକ କନ୍ତରକୋଇଡା ଗାଁର ଏ ଭଙ୍ଗାଘରେ ରହୁଛନ୍ତି ଏ ୫ ଭାଇଭଉଣୀ । ବାପା ଯକ୍ଷ୍ମାରେ ଆରପାରିକୁ ଚାଲିଯିବା ପରେ ମାଆ ଛୋଟଛୋଟ ଛୁଆଙ୍କୁ ଛାଡି କୁଆଡେ ପଳାଇଗଲା । ବାସ ତାପରଠାରୁ ଏ ପିଲାଙ୍କ ଦାୟିତ୍ୱ କାନ୍ଧରେ ବୋହୁଛନ୍ତି ବଡ ଭଉଣୀ ସରସ୍ୱତୀ । ହୋଟେଲରେ ବାସନ ମାଜି ଏମାନଙ୍କୁ ପୋଷୁଛନ୍ତି ।
ହେଲେ ଭଙ୍ଗା କୁଡିଆକୁ ହାତୀ ଭାଙ୍ଗିଦେବା ପରେ ଦୁଃଖ ଉପରେ ଲଦିଯାଇଛି ଆହୁରି ଦୁଃଖ । ଏବେ ସମ୍ପୂର୍ଣ୍ଣ ବେସାହାର ସରସ୍ୱତୀଙ୍କ ପରିବାର । ମୁଣ୍ଡ ଗୁଞ୍ଜିବାକୁ ଘର ଟିଏ ନାହିଁ, ଝାଟିମାଟି ଘରେ ୪ ଭାଇ ଭଉଣୀକୁ ସହ କଷ୍ଟେମଷ୍ଟେ ରହୁଥିଲେ ସରସ୍ୱତୀ । ଗତ ଲଗାଣବର୍ଷାରେ ଘର ଭାଙ୍ଗିଯିବା ପରେ ପଡୋଶୀ ତାଙ୍କୁ ଏକ ମାଟି ଘରେ ସାହାରା ଦେଇଥିଲେ । କିନ୍ତୁ ଏବେ ସେଇ ମାଟିଘରକୁ ଦନ୍ତା ଭାଙ୍ଗିଦେବା ପରେ ସମ୍ପୂର୍ଣ୍ଣ ଅସହାୟ ହୋଇପଡିଛନ୍ତି ସରସ୍ୱତୀ ଓ ତାଙ୍କ ପୂରା ପରିବାର । ଘରେ ଥିବା ସମସ୍ତ ଆସବାବପତ୍ର ନଷ୍ଟ କରିଦେଇଛି ଦନ୍ତା । ଏବେ ମୁଣ୍ଡ ଗୁଞ୍ଜିବାକୁ ଘରଟିଏ ନାହିଁ । ସତରେ ସରକାରଙ୍କ ମାଳ ମାଳ ଯୋଜନା ଏମାନଙ୍କ ପାଇଁ କଣ ସ୍ୱପ୍ନ ? ନା ଏମାନଙ୍କ ଭାଗ୍ୟରେ ନାହିଁ ଭଲରେ ଚଳିବା, ସୁରକ୍ଷିତ ଘରେ ରହିବା ? ପ୍ରଶାସନ କଣ ପ୍ରକୃତ ହିକାଧିକାରୀଙ୍କୁ ଜାଣୁପାରୁନି ନା ଯୋଜନା ବାଟମାରଣା ହେଉଛି? ସତରେ ସରସ୍ୱତୀଙ୍କ ଦୁଃଖକୁ ସରକାର ଶୁଣିବା ଦରକାର ।