ଖସିଗଲେ ମାଓବାଦୀ, ଗୁଳି ଖାଇଲେ ଗାଁ ଲୋକ । ମାଲକାନଗିରିରେ ମାଓ ଏନକାଉଣ୍ଟରକୁ ନେଇ ଉଠିଲା ପ୍ରଶ୍ନ । ନିରୀହ ଗ୍ରାମବାସୀଙ୍କ ମୃତ୍ୟୁ ପରେ ମିଥ୍ୟା ଏନକାଉଣ୍ଟର ଅଭିଯୋଗ ଆଣିଲେ ପରିବାର ।
କନକ ବ୍ୟୁରୋ : ମାଲକାନଗିରି ପୁଲିସର ମାଓ ଏନକାଉଣ୍ଟରକୁ ନେଇ ଉଠିଛି ପ୍ରଶ୍ନ । ପୁଲିସ ଗୁଳିରେ ଜଣେ ନିରୀହ ଗ୍ରାମବାସୀ ଟଳି ପଡିଥିବା ନେଇ ଅଭିଯୋଗ ଆଣିଛନ୍ତି ପରିବାର ଲୋକେ । ଜାନୁଆରୀ ୩୧ ତାରିଖରେ ମାଲକାନଗିରି ନୁନଖାରି ଜଙ୍ଗଲରେ ଏନକାଉଣ୍ଟର ହୋଇଥିଲା । ପୁଲିସ-ମାଓବାଦୀଙ୍କ ମଧ୍ୟରେ ହୋଇଥିବା ଗୁଳି ମାଡରେ ଜଣେ କ୍ୟାଡର ମାଓବାଦୀର ମୃତ୍ୟୁ ହୋଇଥିବା ବେଳେ ବନ୍ଧୁକ ଓ ଗୁଳି ଜବତ ହୋଇଥିବା ଦାବି କରିଥିଲା ମାଲକାନଗିରି ପୁଲିସ । କିନ୍ତୁ ଗ୍ରାଉଣ୍ଡ ଜିରୋର ସ୍ଥିତି କିଛି ଭିନ୍ନ କଥା କହୁଛିି । ମୃତକଙ୍କ ସ୍ତ୍ରୀ ଓ ଗାଁ ଲୋକେ କନକ ନ୍ୟୁଜ କ୍ୟାମେରାରେ ଯେଉଁ ଘଟଣା ବଖାଣିଛନ୍ତି, ତାହା ନୁନଖାରି ଏନକାଉଣ୍ଟର ଉପରେ ଅନେକ ପ୍ରଶ୍ନ ଚିହ୍ନ ଲଗାଇଛି ।
Kanak News is now on WhatsApp
Join and get latest news updates delivered to you via WhatsApp
କୋରାପୁଟ ବୈପାରିଗୁଡା ଥାନା ଅନ୍ତର୍ଗତ ଗଡାବେଡା ଗାଁର ଜଣେ ବ୍ୟକ୍ତିଙ୍କ ମୃତ୍ୟୁ ଏବେ ଅନେକ ପ୍ରଶ୍ନ ଠିଆ କରିଛି । ଗତ ୩୦ ତାରିଖ ରାତିରେ ମାଓବାଦୀ ସନ୍ଦେହରେ ପୁଲିସ ଗୁଳିରେ ଟଳି ପଡିଥିଲେ ଗଡାବେଡା ଗାଁର ଦିନା ମାଣ୍ଡି । ହେଲେ ଅଭିଯୋଗ ଆସିଲା ମୃତ ଦିନା ମାଓବାଦୀ ନୁହଁନ୍ତି, ଜଣେ ନୀରିହ ଗ୍ରାମବାସୀ । ମାଓବାଦୀଙ୍କ ବୈଠକରେ ଯୋଗ ଦେବାକୁ ଯାଇ ଦିନା ମାଲକାନଗିରି ପୁଲିସର ଗୁଳି ଖାଇଛନ୍ତି ବୋଲି ଅଭିଯୋଗ କରିଛନ୍ତି ତାଙ୍କ ସ୍ତ୍ରୀ ।
ଜାନୁଆରୀ ୩୦ରେ ବୈପାରିଗୁଡା ଗଡାବେଡା ଗାଁରେ ବୈଠକ ଡାକିଥିଲେ ମାଓବାଦୀ । ମାଓ ବୈଠକ ଖବର ପାଇ ଘେରି ଯାଇଥିଲେ ଯବାନ । ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ, ସେଦିନ ବିଳମ୍ବିତ ରାତିରେ ବୈଠକ ଡକାଇଥିଲେ ୨୦ରୁ ୨୫ ମାଓବାଦୀ । ସେହି ବୈଠକରେ ଗାଁର ପିଲାରୁ ବୁଢା ସମସ୍ତେ ସାମିଲ ହୋଇଥିଲେ । ମୃତ ଦିନା, ତାଙ୍କ ସ୍ତ୍ରୀ ଓ ଝିଅ ବି ବୈଠକକୁ ଯାଇଥିଲେ । ମାଓବାଦୀଙ୍କ ବୈଠକ ଖବର ପାଇ ରାତି ପ୍ରାୟ ଗୋଟାଏ ବେଳକୁ ବୈଠକ ସ୍ଥଳକୁ ଘେରି ଯାଇଥିଲେ ଯବାନ ।
ନିଶବ୍ଦ ରାତିରେ ଟର୍ଚ ଆଲୁଅ ଦେଖି ଚିହିକି ଉଠିଥିଲେ ମାଓବାଦୀ । ଅନ୍ଧାର ରାତିରେ ହଠାତ ଗୁଳିର ଗର୍ଜନ ଶୁଣି ଗ୍ରାମବାସୀଙ୍କୁ ଢାଲ କରି ଖସି ଯାଇଥିଲେ ମାଓବାଦୀ । ଆରମ୍ଭ ହୋଇଥିଲା ଗୁଳି ବର୍ଷା । ଆଉ ଯବାନଙ୍କ କବଜାରେ ପଡିଯାଇଥିଲେ ୩୨ ବର୍ଷୀୟ ଦିନା ମାଣ୍ଡି । ପୁଲିସ ଦିନାଙ୍କୁ ନକ୍ସଲ ସନ୍ଦେହରେ ଗୁଳି କରି ହତ୍ୟା କରିଥିବା ବେଳେ ଗାଁର ଆଇବା ମାଣ୍ଡି, ଭୀମ ମାଣ୍ଡି, ସୁରି ମାଣ୍ଡି ଓ ଗୁତନ ଗୋଲରୀଙ୍କୁ ଉଠାଇ ନେଇଥିବା ଅଭିଯୋଗ କରିଛନ୍ତି ଗ୍ରାମବାସୀ ।
ଘଞ୍ଚ ଜଙ୍ଗଲ ଭିତରେ ପୁଲିସ-ମାଓବାଦୀଙ୍କ ମଧ୍ୟରେ ହୋଇଥିବା ଗୁଳି ବିନିମୟରେ ଜଣେ ମାଓବାଦୀର ମୃତ୍ୟୁ ହୋଇଥିବା ଖବର ଦେଇଥିଲା ମାଲକାନଗିରି ପୁଲିସ । କିନ୍ତୁ ପରେ ଏହି ଘଟଣା ବିବାଦ ଭିତରକୁ ଟାଣି ହୋଇଯାଇଛି ।