କନକ ବ୍ୟୁରୋ : ଗିରଫ ହେଲେ ନକଲି ଡାକ୍ତର । ସୁନ୍ଦରଗଡ ନୂଆ ଗାଁ ସ୍ୱାସ୍ଥ୍ୟକେନ୍ଦ୍ରରେ ସାଢେ ୩ ବର୍ଷ ଧରି ଡାକ୍ତରୀ ଚିକିତ୍ସା ଯୋଗାଉଥିବା ପଦ୍ମନାଭ ମୁଖୀଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ଡାକ୍ତର ନହେଲେ ବି ନକଲି ସାର୍ଟିଫିକେଟ ପାଖରେ ରଖି ଏହି ଡାକ୍ତର ଜଣଙ୍କ ଚିକିତ୍ସା କରୁଥିବା ଅଭିଯୋଗ ହୋଇଥିଲା । ସେପଟେ ମାଲକାନଗିରି କାଲିମେଳାରୁ ମଧ୍ୟ ଆଉ ଜଣେ ନକଲି ଡାକ୍ତରଙ୍କୁ ଗିରଫ କରିଛି କାଲିମେଳା ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ପୋଲିସ କବଜାରେ ଥିବା ଏହି ବ୍ୟକ୍ତି ଜଣଙ୍କ ହେଉଛନ୍ତି ସେହି ନକଲି ଡାକ୍ତର ଯିଏ, ସୁନ୍ଦରଗଡର ନୂଆଗାଁ ସ୍ୱାସ୍ଥ୍ୟ କେନ୍ଦ୍ରରେ କାମ କରୁଥିଲେ । ନକଲି ଡାକ୍ତର ପଦ୍ମନାଭ ମୁଖୀଙ୍କ ନାଁରେ କନକ ନ୍ୟୁଜରେ ଖବର ପ୍ରସାରଣ ପରେ ୩ଦିନ ଧରି କୁଆଡେ ଫେରାର ହୋଇଯାଇଥିଲେ ଡାକ୍ତର । ଆଜି ସୁନ୍ଦରଗଡ ରାଣୀବଗିଚା ବାଇପାସ୍ ନିକଟରୁ ତାଙ୍କୁ ଗିରଫ କରିଛି ଟାଉନ ଥାନା ପୋଲିସ । ଏହି ନକଲି ଡାକ୍ତରଙ୍କ ବିରୋଧରେ ଲାଗିଛି ସାଂଘାତିକ ଦଫା । ଆଇପିସିର ଧାରା ୪୨୦-ଠକେଇ, ୪୬୫-ଷଡଯନ୍ତ୍ର, ୪୬୮-ଛଳନା କରି ଷଡଯନ୍ତ୍ର କରିବା , ୪୭୧- ଷଡଯନ୍ତ୍ର କରି ଦସ୍ତାବିଜ ତିଆରି କରିବା ଭଳି ଦଫା ଲାଗିଛି ।
ସେପଟେ ମାଲକାନଗିରି କାଲିମେଳାରୁ ଆଉ ଜଣେ ନକଲି ଡାକ୍ତରଙ୍କୁ ଗିରଫ କରାଯାଇଛି । କାଲିମେଳା ବ୍ଲକ ଏମଭି-୪୧ ଗାଁରୁ ନକଲି ଡ଼ାକ୍ତର ସମର ମୈତ୍ରକୁ ଗିରଫ କରିଛି କାଲିମେଳା ପୁଲିସ । ପାରାଦୀପ ଅଂଚଳର ସମର ଦୀର୍ଘ ୮ବର୍ଷ ହେଲା ଏମଭି-୪୧ ଗାଁରେ ରହି ଡାକ୍ତର ସାଜି ଚିକିତ୍ସା କରୁଥିଲେ । ଗତ ୮ ତାରିଖରେ ଏମପିଭି-୬ ଗାଁର ଜଣେ ଯୁବକଙ୍କୁ ଭୁଲ ଇଂଜେକସନ୍ ଦେବାରୁ ତାଙ୍କର ମୃତ୍ୟୁ ହୋଇଥିଲା । ଏନେଇ କାଲିମେଳା ଥାନାରେ ଅଭିଯୋଗ ପରେ ଏହି ନକଲି ଡାକ୍ତର ସମର ମୈତ୍ରକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।
ଜଣେ ୩ବର୍ଷ ଏବଂ ଆଉ ଜଣେ ୮ ବର୍ଷ ଧରି ଡାକ୍ତର ଭାବେ ସେବା ଯୋଗାଉଛନ୍ତି । ପ୍ରଶ୍ନ ଉଠୁଛି ସରକାରୀ କଳର ଜାଣତରେ ଏସବୁ ଘଟୁଛି କିପରି । ସାର୍ଟିଫିକେଟ ଯାଞ୍ଚ ସମୟରେ ଏହି ନକଲି ଡାକ୍ତରମାନେ ଧରାପଡୁନାହାନ୍ତି କେମିତି ।