ସୋସିଆଲ ମିଡ଼ିଆରେ ଘୂରି ବୁଲୁଛି ଅଭିଜ୍ଞଙ୍କ ଭବିଷ୍ୟବାଣୀ । ଏହା କେତେ ସତ ଓ କେତେ ମିଛ? ଭାଇରାଲ ଭବିଷ୍ୟବାଣୀର ସତ କଣ? ଥରେ ନଜର ପକାଇ ନିଅନ୍ତୁ ଏହି ରିପୋର୍ଟ ଉପରେ?
କନକ ବ୍ୟୁରୋ :ଅଭିଜ୍ଞ ଆନନ୍ଦ । ୧୪ ବର୍ଷର ଏହି ବାଳକଙ୍କ ଫଟୋ ଏବେ ସୋସିଆଲ ମିଡିଆରେ ଜୋରଦାର ଭାଇରାଲ ହେବାରେ ଲାଗିଛି । ଅଭିଜ୍ଞ ଆନନ୍ଦଙ୍କ ଫଟୋ ସହ କିଛି ଭିଡ଼ିଓ ମଧ୍ୟ ଭାଇରାଲ ହେଉଛି । ଯାହାକୁ କରୋନା ମହାମାରୀ ସହ ଯୋଡାଯାଉଛି । ସୋସିଆଲ ମିଡିଆରେ ଭାଇରାଲ ମେସେଜରେ କୁହାଯାଉଛି ଯେ, ଦେଢ ବର୍ଷ ପୂର୍ବେ ଅଭିଜ୍ଞ କରୋନା ଭାଇରସକୁ ନେଇ ଭବିଷ୍ୟବାଣୀ କରି ସାରିଥିଲେ । ସେତେବେଳେ ଏହି ବାଳକଙ୍କ କଥାକୁ କେହି ଗୁରୁତ୍ୱ ଦେଇନଥିଲେ କିନ୍ତୁ ଏବେ ବାଳକଙ୍କ ଗୋଟିଏ ପରେ ଗୋଟିଏ ଭବିଷ୍ୟବାଣୀ ସତ ହେଉଛି ବୋଲି ସୋସିଆଲ ମିଡିଆର ବିଭିନ୍ନ ଗ୍ରୁପରେ ମେସେଜ ଘୂରି ବୁଲୁଛି । ତେବେ ପ୍ରକୃତରେ ଭାଇରଲ ହେଉଥିବା ଭିଡ଼ିଓ ଓ ମେସେଜରେ କଣ ସତ୍ୟତା ରହିଛି ତାହା ଆମେ ଆପଣଙ୍କୁ ଜଣାଇବାକୁ ଚେଷ୍ଟା କରିବୁ ।
Kanak News is now on WhatsApp
Join and get latest news updates delivered to you via WhatsApp
ତେବେ ପୂରା ଘଟଣାକୁ ଯିବା ପୂର୍ବରୁ ସୋସିଆଲ ମିଡିଆରେ ଘୂରି ବୁଲୁଥିବା ଭାଇରାଲ ମେସେଜ ବାବଦରେ ଜାଣିବାର ଆବଶ୍ୟକତା ରହିଛି ।
୧୪ ବର୍ଷର ବାଳକ ଯାହାଙ୍କ ନାଁ ଅଭିଜ୍ଞ ଆନନ୍ଦ । କର୍ଣ୍ଣାଟକର ଏହି ବାଳକ ଜଣ ଦେଢ ବର୍ଷ ତଳେ ନିଜର ୟୁଟ୍ୟୁବ ଚ୍ୟାନେଲ କନସାଇନ୍ସରେ ଭବିଷ୍ୟବାଣୀ କରିଥିଲେ ଯେ, ୨୦୨୦ରେ ମଣିଷ ଓ ପ୍ରକୃତି ମଧ୍ୟରେ ଏକ ଭୟାନକ ସଂଘର୍ଷ ଦେଖିବାକୁ ମିଳିବ । ଯାହାଦ୍ୱାରା ପୂରା ବିଶ୍ୱରେ ଆତଙ୍କ ଖେଳିଯିବ । ୩୧ ମାର୍ଚ୍ଚ ୨୦୨୦ରେ ଅଚାନକ ଏହି ରୋଗ ବିସ୍ଫୋରକ ରୂପ ଧାରଣ କରିବ । ଯାହାଦ୍ୱାରା କିଛି ଦେଶ ନିଶ୍ଚିହ୍ନ ହୋଇଯିବ । ଏଥିରୁ ସେହିମାନେ ସୁରକ୍ଷିତ ରହିବେ, ଯେଉଁମାନେ ଘରେ ରହିବେ । ୨୯ ମେ ପର୍ଯ୍ୟନ୍ତ ବିଶ୍ୱର ୮୦ ପ୍ରତିଶତ ଲୋକ ଭାଇରସ ଦ୍ୱାରା ଆକ୍ରାନ୍ତ ହେବେ ଓ ବିଶ୍ୱର ୨୦ ପ୍ରତିଶତ ଲୋକେ ଏଥିରେ ମୃତ୍ୟୁବରଣ କରିବେ । ୩୦ ମେ’ରେ ଏଥିରେ ସୁଧାର ଆସିବ ଯାହା ୫ ସେପ୍ଟେମ୍ବର ଯାଏଁ ଜାରି ରହିବ । ୧୦ ସେପ୍ଟେମ୍ବରରେ ଏହି ଭାଇରସରେ ଶେଷ ମୃତ୍ୟୁ ହେବ । ଆଉ ଏହାପରେ ଏହି ଭାଇରସ ସମ୍ପୂର୍ଣ୍ଣ ଭାବେ ଶେଷ ହୋଇଯିବ । କିନ୍ତୁ ଏହାପରେ କିଛି ଦେଶ ଅନାହାରରେ ପଡିବେ । ଚୋରି ଓ ଲୁଟପାତ୍ ବଢିବ । ଏପରିକି କିଛି ଦେଶ ନିଜର ଅସ୍ତିତ୍ୱ ମଧ୍ୟ ହରାଇ ବସିବେ । ଏହାସହ ଏଭଳି ସମୟରେ ଭଗବାନ ରାମ ଓ କୃଷ୍ଣଙ୍କ ନାଁ ନେଇ ମନ୍ତ୍ର ଉଚ୍ଚାରଣ କରିଲେ କରୋନା ଭଳି ବିପଦରୁ ଦୂରେଇ ରହିପାରିବେ ।
କିଛି ଏଭଳି ଦାବିକୁ ନେଇ ସୋସିଆଲ ମିଡିଆରେ ଏହି ମେସେଜ ଏବେ ଭାଇରାଲ ହେଉଛି । ତେବେ ଅଭିଜ୍ଞଙ୍କ ୟୁଟ୍ୟୁବ ପେଜ୍ ଖୋଜିବା ପରେ ଆମକୁ ଯେଉଁ ଭିଡ଼ିଓ ମିଳିଲା ତାହାର ଟାଇଟଲ ଥିଲା SEVERE DANGER TO THE WORLD FROM NOV 2019 TO APRIL 2020—Abhigya in English and Hindi । ଆଉ ଅଭିଜ୍ଞଙ୍କ ଏହି ଭିଡ଼ିଓକୁ ନେଇ ସୋସିଆଲ ମିଡ଼ିଆରେ ଚର୍ଚ୍ଚା ହେଉଛି । କାରଣ ଅଭିଜ୍ଞ ଏହି ଭିଡ଼ିଓରେ ହିଁ ନଭେମ୍ବର ୨୦୧୯ରୁ ଏପ୍ରିଲ ୨୦୨୦ ମଧ୍ୟରେ ବିଶ୍ୱରେ ବଡ ଧରଣର ବିପତ୍ତି ଆସିବ ବୋଲି ଦାବି କରିଥିଲେ । କିନ୍ତୁ ଏହି ଭିଡ଼ିଓକୁ ଅଭିଜ୍ଞ ୟୁଟ୍ୟୁବ ଚ୍ୟାନେଲରେ ୨୨ ଅଗଷ୍ଟ ୨୦୧୯ରେ ଅପଲୋଡ କରିଥିଲେ । ତେଣୁ ଏହି ଭିଡ଼ିଓ ଦେଢ ବର୍ଷ ତଳର ପୁରୁଣା ଭିଡ଼ିଓ ବୋଲି ଯେଉଁ ଦାବି କରାଯାଉଛି ତାହା ସମ୍ପୂର୍ଣ୍ଣ ଭୁଲ ।
ଏହି ଭିଡ଼ିଓରେ ଅଭିଜ୍ଞ ଯେଉଁ ଭବିଷ୍ୟବାଣୀ କରିଥିଲେ ତାହାର କିଛି ମୁଖ୍ୟ ପଏଣ୍ଟ ଉପରେ ନଜର ପକାନ୍ତୁ । ନଭେମ୍ବର ୨୦୧୯ରୁ ଏପ୍ରିଲ ୨୦୨୦ ମଧ୍ୟରେ :
ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧ ହେବାର ୯୯ ପ୍ରତିଶତ ସମ୍ଭାବନା ରହିଛି
ସୁନା, ରୂପା ଓ ତେଲର ଦାମ ବଢିବ
ଆମେରିକା ଓ ଇରାନ ମଧ୍ୟ ଯୁଦ୍ଧ ହୋଇପାରେ
ସେୟାର ବଜାର ଓ ଅର୍ଥନୀତି ଭୁଷୁଡି ପଡିବ
ତେବେ ଏହି ଭିଡ଼ିଓରେ ଅଭିଜ୍ଞ ଯୁଦ୍ଧ କଥା କହିଥିଲେ ମଧ୍ୟ କୌଣସି ସ୍ଥାନରେ ଭାଇରସ କିମ୍ବା ରୋଗ କଥା କହିନାହାନ୍ତି । ତେବେ ଅଭିଜ୍ଞ କରିଥିବା ଭବିଷ୍ୟବାଣୀ କେତେ ଠିକ୍ ତାହା ଉପରେ ଥରେ ନଜର ପକାନ୍ତୁ ।
ପ୍ରଥମତଃ ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧ ସମ୍ଭାବନା ନେଇ ଯେଉଁ ସଂକେତ ଦେଇଥିଲେ ତାହା ଭୁଲ ପ୍ରମାଣିତ ହୋଇଛି । କାରଣ ନଭେମ୍ବର ୨୦୧୯ରୁ ଏପ୍ରିଲ ୨୦୨୦ ମଧ୍ୟରେ ଯୁଦ୍ଧ ଭଳି କୌଣସି ସ୍ଥିତି ଦେଖିବାକୁ ମିଳିନାହିଁ ।
ସେହିଭଳି ସୁନା ଓ ରୂପାର ଦର ବଜାରର ଚାହିଦା ଓ ସ୍ଥିତିକୁ ପ୍ରତିଦିନ ବଦଳୁଥାଏ । ତେଣୁ ଏଭଳି ଭବିଷ୍ୟବାଣୀ ପଛରେ କୌଣସି ସତ୍ୟତା ନାହିଁ । ଅନ୍ୟପଟେ ଏବେ ଅଶୋଧିତ ତୈଳ ଦର ଲଗାତାର ଭାବେ କମିଚାଲିଛି । ଯାହା ଭବିଷ୍ୟବାଣୀକୁ ଭୂଲ ପ୍ରମାଣିତ କରୁଛି ।
ଅନ୍ୟ ଏକ ଭବିଷ୍ୟବାଣୀ ଅନୁଯାୟୀ, ଆମେରିକା-ଇରାନ ମଧ୍ୟରେ ୯୯ ପ୍ରତିଶତ ଯୁଦ୍ଧ ସମ୍ଭାବନା । ହଁ ଉଭୟ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଛି । କିନ୍ତୁ ଯୁଦ୍ଧ ହୋଇନାହିଁ । ଏହି ଭିଡ଼ିଓ ଯେଉଁ ସମୟରେ ଅପଲୋଡ କରାଯାଇଛି ସେ ସମୟରେ ମଧ୍ୟ ଆମେରିକା-ଇରାନ ମଧ୍ୟରେ ତିକ୍ତତା ଦେଖିବାକୁ ମିଳିଥିଲା ।
ହଁ କରୋନା ମହାମାରୀ ପାଇଁ ପୂରା ବିଶ୍ୱର ଅର୍ଥବ୍ୟବସ୍ଥା ଓ ସେୟାର ବଜାର ପ୍ରଭାବିତ ହୋଇଛି । କିନ୍ତୁ ଅଭିଜ୍ଞଙ୍କ ଭବିଷ୍ୟବାଣୀ ସହ ଯେ, ଏହାର ସମ୍ପର୍କ ରହିଛି ତାହା ଭାବିବା ଭୁଲ । କାରଣ ଅଭିଜ୍ଞଙ୍କ ଉପରୋକ୍ତ ୩ ଭବିଷ୍ୟବାଣୀ ଯାହା ସମ୍ପୂର୍ଣ୍ଣ ଭାବେ ଭୂଲ ସାବ୍ୟସ୍ତ ହୋଇଛି । ଏହାପୂର୍ବରୁ ମଧ୍ୟ ଅନେକ ଭବିଷ୍ୟବାଣୀକୁ ନେଇ ବିଶ୍ୱରେ ଚର୍ଚ୍ଚା ହୋଇଛି । କେତେବେଳେ ଅଚ୍ୟୁତାନନ୍ଦଙ୍କ ମାଳିକା ବଚନ ତ ପୁଣି କେତେବେଳେ ୨୦୧୨ରେ ବିଶ୍ୱ ଧ୍ୱଂସ ହେବାର ଖବର । କିନ୍ତୁ ଏହାସତ୍ତେ୍ୱ ମଧ୍ୟ ମାନବଜାତି ବଡ ବଡ ମହାମାରୀ ବିପକ୍ଷରେ ଲଢେଇ କରି ପୁଣିଥରେ ଆଗକୁ ବଢିଛି । ତେଣୁ ଏଭଳି ସମୟରେ ଭବିଷ୍ୟତବାଣୀ ନୁହେଁ ବରଂ ବିଜ୍ଞାନ ଉପରେ ବିଶ୍ୱାସ ରଖି ଆଗକୁ ବଢିବାର ଆବଶ୍ୟକତା ରହିଛି ।