ରାମଦେବ ବାବାଙ୍କ ବିବାଦୀୟ ବୟାନକୁ ନେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କ ତାଗିଦ : ହର୍ଷବର୍ଦ୍ଧନ କହିଲେ, ଆପତିଜନକ ମନ୍ତବ୍ୟ ପ୍ରତ୍ୟାହାର କର

ଏଲୋପାଥିକୁ ଦେବାଳିଆ ବିଜ୍ଞାନ କହିବା ପରେ ରାମଦେବଙ୍କୁ ମହାମାରୀ ଆଇନ ଅନୁଯାୟୀ ମାମଲା କରିବାକୁ ଦାବି କରିଥିଲା ଆଇଏମଏ

241

କନକ ବ୍ୟୁରୋ :କରୋନା ସମୟରେ ବାବା ରାମଦେବଙ୍କ ଏଲୋପାଥିକ ଔଷଧକୁ ନେଇ ଗୋଟିଏ ବୟାନ ଦେଶରେ ତାତିକୁ ବଢାଇ ଦେଇଛି । ବାବାଙ୍କ ବୟାନକୁ ନେଇ ଏବେ ଭାରତୀୟ ମେଡିକାଲ ଆସୋସିଏସନ୍ ପକ୍ଷରୁ ଦାଏର ହୋଇଛି ଏତଲା । ବାବାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଛି ଆଇଏମଏ । ବିବାଦ ବଢ଼ିବା ପରେ ବାବା ରାମଦେବ ଦେଇଥିବା ଆପତିଜନକ ମନ୍ତବ୍ୟ ପ୍ରତ୍ୟାହାର କରିନେବାକୁ କହିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ହର୍ଷବର୍ଦ୍ଧନ ।

ବୟାନକୁ ନେଇ ଏବେ ହରଡ଼ଘଣାରେ ପଡିଛନ୍ତି, ବାବା ରାମଦେବ । ବାବା କହୁଛନ୍ତି- ଯେତେ ଲୋକ ଡାକ୍ତରଖାନାରେ ଚିକିତ୍ସା ନପାଇ କିମ୍ବା ଅକ୍ସିଜେନ ନପାଇ ମୃତ୍ୟୁବରଣ କରିଛନ୍ତି, ତାଠୁ ଅଧିକ ଏଲୋପାଥି ଔଷଧ ଖାଇ ପ୍ରାଣ ହରାଇଛନ୍ତି । ବାବାଙ୍କ ଏହି ବୟାନକୁ ନେଇ ଚିହିଁକି ଉଠିଛି, ଇଣ୍ଡିଆନ୍ ମେଡିକାଲ ଆସୋସିଏସନ । ପ୍ରାୟ ସାଢେ ୩ ଲକ୍ଷ ଡାକ୍ତର ଥିବା ଏହି ସଂଘ ବାବାଙ୍କୁ ଲିଗାଲ୍ ନୋଟିସ ପଠାଇଛି ଏବଂ କେନ୍ଦ୍ର ସରକାରଙ୍କ ଦୃଷ୍ଟିକୁ ଆଣିଛି ।

ଭିତ୍ତିହୀନ ଅଭିଯୋଗ ପାଇଁ ବାବା ରାମଦେବ କ୍ଷମା ମାଗନ୍ତୁ ବୋଲି ଦାବି କରିଛି ଆଏମଏ । ସେହିପରି ଏପିଡେମିକ୍ ଡିଜିଜ୍ ଆକ୍ଟ ଜରିଆରେ ତାଙ୍କ ବିରୁଦ୍ଧରେ କାର୍ୟ୍ୟାନୁଷ୍ଠାନ ପାଇଁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟଙ୍କ ଦୃଷ୍ଟିକୁ ଆଣିଛି । ଏପଟେ ବିବାଦ ପରେ ପତଞ୍ଜଳି ପକ୍ଷରୁ କୁହାଯାଇଛି-ଏକ କାର୍ଯ୍ୟକ୍ରମରେ ସମୟରେ ବାବାଙ୍କ ପାଖକୁ ଆସିଥିବା ଏକ ହ୍ୱାଟସ୍ ଆପ୍ ମେସେଜ୍ ସେ ପଢୁଥିଲେ । ଏହା ତାଙ୍କ ମନନୁହଁ । ସେଥିରେ ତାଙ୍କ ମତକୁ ଏପଟ ସେପଟ ମଧ୍ୟ କରାଯାଇଛି । ଆଧୁନିକ ଚିକିତ୍ସା ଓ ଡାକ୍ତରଙ୍କ ପ୍ରତି ତାଙ୍କ ଯଥେଷ୍ଟ ସମ୍ମାନ ଅଛି ।

ବିବାଦ ଓ ରାମଦେବ ବାବା, ଅଧିକାଂଶ ସମୟରେ ଏକାଠି ଥାନ୍ତି। ଯେତେବେଳେ ବାବାଙ୍କ ପତଞ୍ଜଳି କରୋନିଲ ଔଷଧ ଆଣି ଥିଲା, ସେତେବେଳେ ବି ଏକ ବଡ ବିବାଦ ସୃଷ୍ଟି ହୋଇଥିଲା। ଆଉ ଶେଷରେ ଔଷଧକୁ ଇମ୍ୟୁନିଟି ବୁଷ୍ଟର କହି ବାବା, ବିବାଦକୁ ଏଡେଇଥିଲେ।

Comments are closed.