ମନୀଷଙ୍କ ମୃତ୍ୟୁର ରହସ୍ୟ ଖୋଜୁଖୋଜୁ ମିଳିଲା ଶେଷ ଫଟୋ । ହୋଟେଲରୁ ବାହାରି ରାତିରେ ଏକାକୀ ଯାଉଥିବାର ଫଟୋ ସିସିଟିଭିରେ କଏଦ ।
କନକ ବ୍ୟୁରୋ : କିଭଳି ହେଲା ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷଙ୍କ ମୃତ୍ୟୁ । ଦୁଇ ଦିନ ବିତିଥିଲେ ମଧ୍ୟ ଏହି ଘଟଣା ଏବେବି ରହସ୍ୟ ଘେରରେ ରହିଛି । ଯେଉଁଦିନ ମନୀଷଙ୍କ ମୃତ୍ୟୁ ହୋଇଥିଲା, ସେହି ରାତିର ଏକ ଫଟୋ ପୋଲିସ ପକ୍ଷରୁ ଜାରି କରାଯାଇଛି । ଅନୁମାନ କରାଯାଉଛି ବାରରୁ ବାହାରି ମନୀଷ ଯାଉଥିବା ବେଳେ ଏହି ଫଟୋ ଉଠିଛି । ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ମନୀଷଙ୍କ ଦୁଇ ସାଙ୍ଗଙ୍କୁ ଅଟକ ରଖି ପଚରାଉଚରା କରାଯାଉଛି । ସେପଟେ ପ୍ରାଥମିକ ପୋଷ୍ଟମର୍ଟମ ରିପୋର୍ଟରୁ କୌଣସି ସ୍ପଷ୍ଟ ସୂଚନା ମିଳିପାରୁନାହିଁ ।
Kanak News is now on WhatsApp
Join and get latest news updates delivered to you via WhatsApp
ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗଙ୍କ ମୃତ୍ୟୁ କେମିତି ହେଲା, ତାର ତଦନ୍ତ ଚାଲିଥିବାବେଳେ ମିଳିଛି ମନୀଷଙ୍କ ଶେଷ ଫଟୋ । ଅନ୍ଧାର ରାତିରେ ମନୀଷ ଏକାକୀ ରାସ୍ତାରେ ଚାଲିଚାଲି ଯାଉଥିବାର ସିସିଟିଭି ଫୁଟେଜରୁ ଜଣା ପଡୁଛି । ସିସିଟିଭି ଫୁଟେଜର ଫଟୋ ଏବେ ପୋଲିସ ହାତରେ ଲାଗିଛି । ଭୁବନେଶ୍ୱର ପାତ୍ରପଡାରେ ଥିବା ହୋଟେଲ ସାଉଥ ସିଟିରୁ ମନୀଷ ବାହାରି ଯାଉଥିବାର ଚିତ୍ର, ମୃତ୍ୟୁ ପୂର୍ବର ଶେଷ ଫଟୋ ବୋଲି ଅନୁମାନ କରାଯାଉଛି । ତେବେ ଫଟୋ ସିନା ମିଳିଛି, କିନ୍ତୁ ମନୀଷଙ୍କ ମୃତ୍ୟୁ ରହସ୍ୟ ଉପରୁ ପରଦା ଉଠି ପାରିନାହିଁ । ମୃତ୍ୟୁର ରହସ୍ୟ ଖୋଜିବାକୁ ମନୀଷଙ୍କ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରାଯାଇଥିଲା ।
– ପ୍ରାଥମିକ ପୋଷ୍ଟମର୍ଟମ ରିପୋର୍ଟ ଅନୁସାରେ ମନୀଷଙ୍କ ଶ୍ୱାସରୁଦ୍ଧ ହୋଇ ମୃତ୍ୟୁ ହୋଇଛି
– ମୃତ୍ୟୁର କାରଣ ଇଂରାଜୀରେ ଏସଫେକ୍ସିଆ ବୋଲି କୁହାଯାଇଛି ଅର୍ଥାତ ନିଶ୍ୱାସ ନନେଇ ପାରିବାରୁ ମୃତ୍ୟୁ
ବର୍ତମାନ ପ୍ରଶ୍ନ ଉଠୁଛି ମନୀଷ ଶ୍ୱାସରୁଦ୍ଧ କେତେବେଳେ ହୋଇଥିଲେ ? ପାଣିରେ ବୁଡିବା ପୂର୍ବରୁ ଶ୍ୱାସରୁଦ୍ଧ ହୋଇଥିଲେ ନା ପାଣିରେ ବୁଡିବା ଯୋଗୁଁ ଶ୍ୱାସରୁଦ୍ଧ ହୋଇଗଲେ ? ପୋଖରୀରେ ବୁଡି ମନୀଷଙ୍କ ମୃତ୍ୟୁ ହୋଇଛି କି ନାହିଁ ଜାଣିବାକୁ ମୃତଦେହର ଡାଏଟମ୍ ଟେଷ୍ଟ କରାଯାଉଛି । ଏହି ପରୀକ୍ଷାରୁ ମନୀଷଙ୍କ ଶରୀରରୁ ମିଳିଥିବା ଫ୍ଲୁଇଡ ବା ପାଣି ସେହି ପୋଖରୀର ପାଣି କି ନାହିଁ ତାହା ସ୍ପଷ୍ଟ ହୋଇପାରିବ । ଫଳରେ ପୋଖରୀରେ ବୁଡିଯିବା ଫଳରେ ମନୀଷଙ୍କ ଶ୍ୱାସରୁଦ୍ଧ ହୋଇଥିଲା କି ନାହିଁ ତାହା ମଧ୍ୟ ଜଣା ପଡିଯିବ । ଏଥିପାଇଁ ସଂପୂର୍ଣ୍ଣ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରିବାକୁ ପଡିବ । ଅର୍ଥାତ ବଡି ଫ୍ଲୁଇଡ, ଡାଏଟମ୍ ଓ ଭିସେରା ରିପୋର୍ଟରୁ ମୃତ୍ୟୁର ପୁରା ସତ ଜଣାପଡିବ । ଏପରିକି ମୃତଦେହର ପାକସ୍ତଳୀରେ ହଜମ ହୋଇନଥିବା ଖାଦ୍ୟକୁ ହାଇଦ୍ରାବାଦ ପରୀକ୍ଷା ପାଇଁ ପଠା ଯାଇଥିବା କହିଛି ପୋଲିସ ।
ଅନ୍ୟପଟେ ମନୀଷ ମୃତ୍ୟୁ ମାମଲାରେ ପୋଲିସ ହାତରେ କିଛି ଗୁରୁତ୍ୱପୁର୍ଣ୍ଣ ତଥ୍ୟ ଲାଗିଛି । ଏପରିକି ମୃତ୍ୟୁ ପୂର୍ବରୁ ମନୀଷଙ୍କୁ ଅପହରଣ କରି ନିଆଯାଇଥିବା ଧଳା ରଙ୍ଗର ସିଆଜ କାରଟିକୁ ପୋଲିସ ଜବତ କରିଛି । ସନ୍ଦେହ ଘେରରେ ରହିଛନ୍ତି ମନୀଷଙ୍କ ସାଙ୍ଗ । ଏମାନଙ୍କୁ ପଚରା ଉଚରା ଚଳାଇଛି ପୋଲିସ । ମନୀଷଙ୍କ ସହ ଶେଷ ସମୟ ବିତାଇଥିବା ସାଙ୍ଗମାନେ ହିଁ ପୂରା ରହସ୍ୟ ଖୋଲିପାରନ୍ତି । କାରଣ ସେହିମାନେ ହିଁ ଅପହରଣରୁ ମୃତ୍ୟୁ ପର୍ଯ୍ୟନ୍ତ ମନୀଷଙ୍କ ସହ ରହିଥିବା ସନ୍ଦେହ କରାଯାଉଛି ।