କରୋନା ଭିତରେ ମଦ ଚିନ୍ତା । ଅବକାରୀ ସଚିବଙ୍କୁ ଚିଠି ଲେଖି ଅବକାରୀ କମିଶନର, ଲକଡାଉନ ଖୋଲିଲେ ହଠାତ ବଢିଯିବ ମଦର ଚାହିଦା । ନିଅଣ୍ଟ ପଡିବ ମହଜୁଦ ମଦ ।
କନକ ବ୍ୟୁରୋ : ତାଲାବନ୍ଦର ଅବଧି ବଢ଼ିବା ପରେ ଗ୍ରୀନ ଜୋନରେ ଅନେକ କଟକଣାକୁ କୋହଳ କରାଯାଇଛି । ଏହାରି ଭିତରେ ଓଡିଶାରେ ବନ୍ଦ ପଡିଥିବା ବଟଲିଂ ପ୍ଲାଂଟ ଗୁଡିକୁ କାର୍ଯ୍ୟକ୍ଷମ କରିବା ପାଇଁ ଅବକାରୀ ସଚିବଙ୍କୁ ଚିଠି ଲେଖିଛନ୍ତି ଅବକାରୀ କମିଶନର । ତାଲାବନ୍ଦ ଖୋଲିବା ପରେ ମହଜୁଦ ଥିବା ମଦର ପରିମାଣ ନିଅଣ୍ଟ ହେବାର ଆଶଙ୍କା କରି ପ୍ଲାଣ୍ଟ ଗୁଡିକୁ କାର୍ଯ୍ୟକ୍ଷମ କରିବାକୁ ଅନୁରୋଧ କରିଛନ୍ତି । ଲକଡାଉନ ନିୟମ ପାଳନ କରିବା ସହ ୫୦ ପ୍ରତିଶତ କର୍ମଚାରୀଙ୍କୁ ନେଇ ବଟଲିଂ ପ୍ଲାଣ୍ଟ ଚଳାଇବା ପାଇଁ ନିର୍ଦ୍ଦେଶ ଦେବାକୁ ଅବକାରୀ କମିଶନର ଅନୁରୋଧ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅବକାରୀ କମିଶନର, ଅବକାରୀ ସଚିବଙ୍କୁ ଲେଖିଥିବା ଚିଠିରେ ତାଲା ବନ୍ଦ ଖୋଲିବା ପରେ ମଦର ଚାହିଦା ପୂରଣ କରିବା ସଂପର୍କରେ ଲେଖାଯାଇଛି । ଏଥିରେ କୁହାଯାଇଛି- ରାଜ୍ୟରେ ମହଜୁଦ ଥିବା ମଦ ମାତ୍ର କିଛି ଦିନ ଚାହିଦା ପୁରଣ କରିବାକୁ ସମର୍ଥ । ତେଣୁ ମାର୍ଚ୍ଚ ୩ ତାରିଖରୁ ବନ୍ଦ ପଡ଼ିଥିବା ବଟଲିଂ ପ୍ଲାଂଟକୁ ଖୋଲିବାକୁ ଅନୁମତି ଦିଆଯାଉ । କୋଭିଡ୍-୧୯ ଗାଇଡଲାଇନ୍ ଅନୁପାଳନ ଭିତରେ ୫୦ ପ୍ରତିଶତ କର୍ମଚାରୀଙ୍କୁ ନେଇ ବଟଲିଂ ପ୍ଲାଂଟ୍ ଖୋଲିବାକୁ ଏହି ଚିଠିରେ ଅବକାରୀ ସଚିବଙ୍କୁ ଅନୁରୋଧ କରାଯାଇଛି ।
ବଡ଼ କଥା ହେଉଛି ଗତକାଲି ଯେତେବେଳେ ତାଲା ବନ୍ଦର ଅବଧିକୁ ଆହୁରି ଦୁଇ ସପ୍ତାହକୁ ବଢ଼ାଇ ଦିଆଗଲା, ସେତେବେଳେ ଗ୍ରୀନ୍ ଜୋନରେ କଟକଣାକୁ କୋହଳ କରାଯାଇଛି । ଗ୍ରୀନ୍ ଜୋନରେ ମଦ ଓ ପାନ ଭଳି ଦୋକାନ ଖୋଲିବାକୁ ଅନୁମତି ମଧ୍ୟ ଦିଆଯାଇଛି । ସୂଚନା ଅନୁସାରେ ଗତ ଦେଢ଼ ମାସରେ ରାଜ୍ୟରେ ମଦ କାରବାରରେ ପ୍ରାୟ ୬ଶହ କୋଟିର କ୍ଷତି ହୋଇଛି । ଆଉ ଯଦି ୧୫ ଦିନ ବନ୍ଦ ରୁହେ, ଆହୁରି ୨ଶହ କୋଟି ଟଙ୍କାର କ୍ଷତି ହେବାର ଆକଳନ କରାଯାଉଛି । ଏହାରି ଭିତରେ ମଦ ଦୋକାନୀମାନେ କର୍ମଚାରୀଙ୍କୁ ଦରମା ଦେବା କଷ୍ଟକର ହୋଇପଡ଼ିଛି । ତେବେ ବୃହତର ସ୍ୱାର୍ଥକୁ ଦୃଷ୍ଟି ରଖି ମଦ ଦୋକାନକୁ ଆହୁରି ୧୫ ଦିନ ନଖୋଲିବା ଉଚିତ ବୋଲି କହିଛନ୍ତି ଖୋର୍ଦ୍ଧା ୱାଇନ୍ ମର୍ଚେଂଟ ଆସୋସିଏସନର ସଭାପତି ।
ତେବେ ମଦ ଦୋକାନ ଖୋଲିବା ଏବଂ ପ୍ରଡକ୍ସନ୍ ୟୁନିଟ୍ ଖୋଲିବା, ଉଭୟ ପରିପୂରକ । ପ୍ରଡକ୍ସନ୍ ୟୁନିଟ୍ ଖୋଲିଲେ, ମହଜୁଦ ଥିବା ମଦର ପରିମାଣକୁ ବଢ଼ାଇ ଯାଇପାରିବ ।