ତେଜିଲା ପାଟ୍ଟଶାଣୀ ବିରୋଧୀ ମେଳି । ରଘୁଙ୍କୁ ପ୍ରାର୍ଥୀ କରିବା ସପକ୍ଷରେ ଶଙ୍ଖ ଭବନ ବାହାରେ ଶତାଧିକ ସମର୍ଥକ ଏକାଠି, ପ୍ରସନ୍ନ କହିଲେ ଗାଁକୁ ଗଲେ ମୋତେ କିଏ ଅଟକାଇବ?
କନକ ବ୍ୟୁରୋ : ଚିଲିକା ନିର୍ବାଚନ ମଣ୍ଡଳୀରୁ ପ୍ରସନ୍ନ ପାଟ୍ଟଶାଣୀ ପ୍ରାର୍ଥୀ ହେବା ନେଇ ଚର୍ଚ୍ଚା ଜୋର ଧରିବା ପରେ ତୀବ୍ର ହୋଇଛି ବିବାଦ । ପ୍ରସନ୍ନଙ୍କୁ ବିରୋଧ କରିବା ପାଇଁ ଚିଲିକାର ଶତାଧିକ କର୍ମୀ ଶଙ୍ଖ ଭବନ ବାହାରେ ଏକଜୁଟ୍ ହୋଇଛନ୍ତି । ପ୍ରସନ୍ନ ପାଟ୍ଟଶାଣୀଙ୍କୁ ବିରୋଧ କରିବା ସହ ପ୍ରତିବାଦ କରିଛନ୍ତି ରଘୁ ସାହୁଙ୍କ ସମର୍ଥକ । ସେପଟେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି ପୂର୍ବତନ ସାଂସଦ ପ୍ରସନ୍ନ ପାଟ୍ଟଶାଣୀ । କହିଛନ୍ତି ସପକ୍ଷ, ବିପକ୍ଷରେ ମୁଁ ବିଶ୍ୱାସ କରେନି । ଯାହା ନିର୍ଦ୍ଦେଶ ଦିଆଯିବ, ତାହାକୁ ପାଳନ କରିବି । ମୁଁ ମୋ ଗାଁକୁ ଯିବି, ମୋତେ କିଏ ଅଟକାଇବ ବୋଲି ପ୍ରଶ୍ନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚିଲିକାରୁ ପାଟ୍ଟଶାଣୀଙ୍କ ପ୍ରାର୍ଥୀତ୍ୱକୁ ନେଇ ଚର୍ଚ୍ଚା ଜୋର ଧରିଥିବା ବେଳେ ପୂର୍ବତନ ବିଧାୟକ ରଘୁ ସାହୁଙ୍କ ସମର୍ଥକ ଏହାକୁ ବିରୋଧ କରିଛନ୍ତି । ଭୁବନେଶ୍ୱରରେ ପହଞ୍ଚି ଶଙ୍ଖ ଭବନ ଆଗରେ ପ୍ରତିବାଦ କରିଛନ୍ତି ରଘୁଙ୍କ ସମର୍ଥକ । ରଘୁଙ୍କୁ ୨୦୨୪ରେ ବିଜେଡି ଟିକେଟ ଦେଉ ବୋଲି କହିଛନ୍ତି ସମର୍ଥକ । ପ୍ରସନ୍ନ ପାଟ୍ଟଶାଣୀ ଦୀର୍ଘ ୫୦ ବର୍ଷ ହେବ ଚିଲିକା ଯାଇନାହାନ୍ତି ଭୁବନେଶ୍ୱରରେ ରହୁଛନ୍ତି ତେଣୁ ତାଙ୍କ ବଦଳରେ ରଘୁଙ୍କୁ ଚିଲିକାରୁ ପ୍ରାର୍ଥୀ କରାଯାଉ ବୋଲି ଦାବି କରିଛନ୍ତି ସମର୍ଥକ । ହାତରେ ପ୍ଲାକାର୍ଡ ଧରି ରଘୁ ସାହୁଙ୍କ ସପକ୍ଷରେ ନାରା ପକାଇଛନ୍ତି ସମର୍ଥକ ।