ବିଜେଡିର ପୂର୍ବତନ ବିଧାୟକ ଗିରଫ । ଆୟ ବର୍ହିଭୂତ ସମ୍ପତି ଠୁଳ ଅଭିଯୋଗରେ ଅନାମ ନାଏକଙ୍କୁ ଗିରଫ କଲା ଭିଜିଲାନ୍ସ ।
କନକ ବ୍ୟୁରୋ : ବନ୍ଧାହେଲେ ପୂର୍ବତନ ବିଜେଡି ବିଧାୟକ ଅନାମ ନାଏକ । ଭବାନୀପାଟଣାର ପୂର୍ବତନ ବିଧାୟକ ଅନାମ ନାଏକଙ୍କୁ ଗିରଫ କରିଛି ଭିଜିଲାନ୍ସ । ଆୟବର୍ହିଭୂତ ସମ୍ପତି ଠୁଳ ଅଭିଯୋଗରେ ଅନାମଙ୍କୁ ଗିରଫ କରାଯାଇଛି । ଏନେଇ ଭିଜିଲାନ୍ସ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ଗତ ଜାନୁଆରୀ ୧୭ ତାରିଖରେ ଅନାମଙ୍କ ଘରେ ଚଢାଉ କରିଥିଲା ଭିଜିଲାନ୍ସ । ଆୟ ବର୍ହିଭୂତ ସମ୍ପତି ଠୁଳ ଅଭିଯୋଗରେ ଭିଜିଲାନ୍ସର ୩ଟି ଟିମ୍ ପକ୍ଷରୁ ରେଡ୍ କରାଯାଇଥିଲା । ସେତେବେଳେ ଅନାମଙ୍କ ବାସଭବନ ସମେତ ଲଜ ଓ ବିଦେଶୀ ମଦ ଦୋକାନ ଉପରେ ଏକାସଙ୍ଗରେ ଚଢାଉ କରାଯାଇଥିଲା । ଚଢାଉ ସମୟରେ ୩କୋଟି ୪୨ ଲକ୍ଷରୁ ଅଧିକ ସମ୍ପତ୍ତି ଠାବ କରିଥିଲା ଭିଜିଲାନ୍ସ ଟିମ୍ । ଆଉ ଏହାକୁ ଯାଞ୍ଚ କରାଯିବା ପରେ ତାଙ୍କୁ ଆଜି ଗିରଫ କରାଯାଇଛି ।
ଅନାମଙ୍କ ଗିରଫ ପରେ ଦୁର୍ନୀତିଗ୍ରସ୍ତଙ୍କ ବିରୋଧରେ ନବୀନ ସରକାର କଡା କାର୍ଯ୍ୟାନୁଷ୍ଠାନ ନେଉଥିବାର ବାର୍ତ୍ତା ଦେଇଛନ୍ତି । ଏପରିକି ଏହାପୂର୍ବରୁ ଆଇଏଏସ ଅଫିସର ବିଜୟ କେତନ ଉପାଧ୍ୟାୟଙ୍କୁ ମଧ୍ୟ ଲାଞ୍ଚ ନେଉଥିବା ଅଭିଯୋଗରେ ଗିରଫ କରାଯାଇଥିଲା । ଆଉ ଏଭଳି କଡା କାର୍ଯ୍ୟାନୁଷ୍ଠାନ ନେଇ ନବୀନ ସଂକେତ ଦେଇଛନ୍ତି ଯେ, ଦୁର୍ନୀତିଗ୍ରସ୍ତଙ୍କୁ ନବୀନ ସରକାରରେ ନିସ୍ତାର ନାହିଁ । ସେ ନେତା ହୁଅନ୍ତୁ ବା ଅଫିସର । ପଞ୍ଚମ ଥର ମୁଖ୍ୟମନ୍ତ୍ରୀ ଆସନରେ ବସିବା ପରେ ଦୁର୍ନୀତିମୁକ୍ତ ଶାସନ ଉପରେ ଗୁରୁତ୍ୱ ଦେଇଛନ୍ତି ନବୀନ । ଯେଉଁଥିପାଇଁ ଗତ ୬ ମାସ ମଧ୍ୟରେ ୧୨ ଜଣଙ୍କୁ ବାଧ୍ୟତାମୂଳକ ଅବସର ଦିଆଯାଇଥିବା ବେଳେ ଦୁର୍ନୀତିରେ ଲିପ୍ତ ଥିବା ୫୯ ଜଣ ସରକାରୀ ଅଧିକାରୀଙ୍କୁ ନିଲମ୍ବିତ କରାଯାଇଛି । ଏହାଛଡା ୧୧ ଜଣ ଅବସରପ୍ରାପ୍ତ ସରକାରୀ କର୍ମଚାରୀଙ୍କ ଭତ୍ତା ବନ୍ଦ କରାଯାଇଛି ।