ବିଜେପୁର ପାଇଁ ବିଜେଡିର ପ୍ରାର୍ଥୀ କିଏ ? ରୀତାଙ୍କୁ ରିପିଟ୍ ନା ଆଉ କାହାକୁ ଭରସିବେ ନବୀନ, ଆରମ୍ଭ ହେଲା ଅଙ୍କ କଷା ।
କନକ ବ୍ୟୁରୋ: କିଏ ହେବ ବିଜେପୁର ବିଜେଡି ବିଧାୟକ ପ୍ରାର୍ଥୀ ? ଏଭଳି ପ୍ରଶ୍ନ ଏବେ ରାଜ୍ୟ ରାଜନୀତିକୁ ଉଷ୍ମ କରିଛି । କାରଣ ବିଜେପୁର ବିଧାନସଭା ସିଟ୍ ଛାଡ଼ିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ବିଧିବିଦ୍ଧଭାବେ ବାଚସ୍ପତିଙ୍କ ନିକଟକୁ ବିଜେପୁର ବିଧାୟକ ପଦ ଛାଡ଼ି ଇସ୍ତଫା ପତ୍ର ପଠାଇଛନ୍ତି ନବୀନ । ଆଉ ଏହାପରେ ଆରମ୍ଭ ହୋଇଛି ଅଙ୍କକଷା । ଏଥର ବିଜେପୁରରେ ବିଜୟକୁ ରିପିଟ୍ କରିବା ପାଇଁ ଆଗକୁ ହେବାକୁଥିବା ଉପ-ନିର୍ବାଚନରେ ଦଳ କାହାକୁ ପ୍ରାର୍ଥୀ କରିବ ତାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ସେପଟେ ପୁଣି ଥରେ ବିଜେଡି ବିଜେପୁରର ପୂର୍ବତନ ବିଧାୟିକା ରୀତା ସାହୁଙ୍କୁ ରିପିଟ୍ କରିପାରେ ବୋଲି ଚର୍ଚ୍ଚା ହେଉଛି । କାରଣ ଗତବର୍ଷ ବିଜେପୁର ଉପ-ନିର୍ବାଚନରେ ଯେତେବେଳେ ବିଜେପୁର ସମସ୍ତ ଦଳ ପାଇଁ ସମ୍ମାନର ଲଢ଼େଇ ଥିଲା, ସେତେବେଳେ ବିଜେଡି ପ୍ରାର୍ଥୀ ରୀତା ସାହୁ ତାଙ୍କର ସମସ୍ତ ପ୍ରତିଦ୍ୱନ୍ଦିଙ୍କୁ ଧରାଶାୟୀ କରି ବିପୁଳ ଭୋଟ୍ ରେ ପରାଜିତ କରିଥିଲେ । ଯାହା ବିଜେଡିର ଦବଦବା ଜାହିର କରିଥିଲା । ଏହାପରେ ଚଳିତ ନିର୍ବାଚନରେ ରୀତାଙ୍କ ସ୍ଥାନ ନେଇ ପୁଣି ଗଡ଼ ସୁରକ୍ଷା କରିବାରେ ସକ୍ଷମ ହୋଇଥିଲେ ନବୀନ । ହେଲେ ବର୍ତ୍ତମାନ ଏହି ଆସନକୁ ଛାଡ଼ିବା ପରେ ହେବାକୁଥିବା ଉପ ନିର୍ବାଚନ ପାଇଁ ନବୀନ ପୁଣିଥରେ ରୀତାଙ୍କୁ ଭରସି ପାରନ୍ତି ବୋଲି ଶୁଣିବାକୁ ମିଳୁଛି ।
ଚଳିତ ଥର ନିର୍ବାଚନରେ ନବୀନ ପ୍ରଥମ ଥର ପାଇଁ ଦୁଇଟି ଆସନରୁ ନିର୍ବାଚନ ଲଢ଼ି ଜିତିଥିଲେ । ଯେଉଁଥିରେ ନିଜର ପାରମ୍ପାରିକ ହିଞ୍ଜିଳି ଆସନ ଏବଂ ବିଜେପୁର ବିଧାନସଭା ସିଟରୁ ମଧ୍ୟ ବିପୁଳ ପରିମାଣ ଭୋଟରେ ବିଜୟୀ ହୋଇଥିଲେ ନବୀନ । ସବୁଠାରୁ ବଡ଼ କଥା ହେଲାକି ନିଜର ପାରମ୍ପାରିକ ହିଞ୍ଜିଳି ଆସନକୁ ରଖି ବିଜେପୁର ଆସନ ଛାଡ଼ିବା ପରେ ଏବେ ନବୀନ ରୀତା ସାହୁଙ୍କୁ ନା ଆଉ କାହାକୁ ଏହି ଆସନର ହକଦାର ବାଛିବେ ତାହା ଉପରେ ସମସ୍ତଙ୍କ ନଜର ରହିଛି ।
ଅନ୍ୟପଟେ ଚଳିତ ନିର୍ବାଚନରେ ବିଜୟୀପରେ ବିଜେପୁରବାସୀଙ୍କ ପାଇଁ ସ୍ୱତନ୍ତ୍ର ପ୍ୟାକେଜ ଘୋଷଣା ସହ ନିଜେ ପ୍ରତି ମାସରେ ଏହାର କାର୍ଯ୍ୟକାରିତାକୁ ନେଇ ତଦାରଖ କରିବେ ବୋଲି ବିଜେପୁରବାସୀଙ୍କୁ ପ୍ରତିଶ୍ରୁତି ଦେଇଛନ୍ତି ନବୀନ । ଏସବୁ ଭିତରେ ନବୀନଙ୍କ ବିଜେପୁର ଆସନ ଛାଡ଼ିବା ପରେ ଏବେ ବିରୋଧୀମାନେ ମଧ୍ୟ ପ୍ରସ୍ତୁତ ରହିଲେଣି । ୧୯ ଯୁଦ୍ଧରେ କେଉଁଠି ଭୂଲ ରହିଲା ତାହାର ତର୍ଜମା କରି ଉପ ନିର୍ବାଚନରେ ବିଜେଡିକୁ ଚେକମେଟ୍ ଦେଇ ବିଜୟୀ ତିଳକ ପିନ୍ଧିବାକୁ ଉପଯୁକ୍ତ ପ୍ରାର୍ଥୀଙ୍କୁ ଉପ-ନିର୍ବାଚନୀ ମୈଦାନକୁ ଓହ୍ଲାଇବାକୁ କସରତ କରିବେ ବିରୋଧୀ । ହେଲେ ଶାସକ ବିଜେଡି ଏଥର ବିଜେପୁରରେ ବିଜୟକୁ ରିପିଟ୍ କରିବା ପାଇଁ ଆଗକୁ ହେବାକୁଥିବା ଉପ-ନିର୍ବାଚନରେ ଦଳ କାହାକୁ ପ୍ରାର୍ଥୀ କରିବ ତାହା ମଧ୍ୟ ସସପେନ୍ସ ରହିଛି ।