କନକ ବ୍ୟୁରୋ: ଆସାମରେ ଏବେ ଦ୍ୱିତୀୟ ପର୍ଯ୍ୟାୟ ମତଦାନ ପରେ ଇଭିଏମ୍ ମେସିନକୁ ନେଇ ସୃଷ୍ଟି ହୋଇଛି ବିବାଦ । ଆସାମର କରିମଗଂଜ ଅଂଚଳରେ କାରରୁ ମିଳିଥିବା ଇଭିଏମ୍କୁ ନେଇ ରାଜନୀତି ତେଜିଛି । ଏହି ଘଟଣାରେ ଜଣେ ପ୍ରେଜାଇଡିଂ ଅଫିସର ସମେତ ୪ଜଣଙ୍କୁ ନିଲମ୍ବିତ କରାଯାଇଛି । କରିମଗଂଜ ଜିଲ୍ଲାର ୧୪୯ ନମ୍ବର ବୁଥରେ ପୁନଃମତଦାନ ନିର୍ଦ୍ଦେଶ ଦେଇଛନ୍ତି ନିର୍ବାଚନ କମିଶନ ।
Kanak News is now on WhatsApp
Join and get latest news updates delivered to you via WhatsApp
ଗାଡି ଭିତରୁ ଇଭିଏମ ଉଦ୍ଧାର ହେବା ଘଟଣାକୁ ନେଇ ନିର୍ବାଚନ କମିଶନଙ୍କୁ ଟୁଇଟ୍ କରି ଅଭିଯୋଗ କରିଥିଲେ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରା । ଆସାମରେ ଦ୍ୱିତୀୟ ପର୍ଯ୍ୟାୟରେ ପ୍ରାୟ ୭୬ ପ୍ରତିଶତରୁ ଅଧିକ ମତଦାନ ହୋଇଥିବା ଇସି ସୂଚନା ଦେଇଛନ୍ତି । ଏପରି ସ୍ଥିତିରେ ଏବେ ସୋସିଆଲ୍ ମିଡିଆରେ କାର୍ ଭିତରେ ଇଭିଏମ ନେବାର ଭିଡିଓ ଭାଇରାଲ ହେଉଛି । ସେପଟେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଆସାମରେ ସମସ୍ତ ଇଭିଏମର ପୁନଃଗଣନା ପାଇଁ ଦାବି କରିଛନ୍ତି । ଏହାସହ ବିଜେପି ପ୍ରାର୍ଥୀଙ୍କ ପ୍ରାର୍ଥୀତ୍ୱ ଖାରଜ କରିବା ପାଇଁ ଦାବି କରିଛି କଂଗ୍ରେସ ।
ଗୁରୁବାର ଆସାମରେ ଦ୍ୱିତୀୟ ପର୍ଯ୍ୟାୟ ମତଦାନ ସରିବା ପରେ କରିମଗଂଜରେ ଏକ କାର ଭିତରେ ଇଭିଏମ୍ ଯାଉଥିବା ଭିଡିଓ ଭାଇରାଲ ହୋଇଛି । ଇଭିଏମ୍ ଥିବା କାରଟି ଆସାମର ପଥରକଂଡି ଆସନର ବିଜେପି ପ୍ରାର୍ଥୀ କୃଷ୍ଣେନ୍ଦୁ ପାଲଙ୍କ ପତ୍ନୀଙ୍କ ମାଲିକାନାରେ ଥିବା ଜଣାପଡିଛି । ଲୋକଙ୍କ ଅଭିଯୋଗ ପରେ ଯେତେବେଳେ ନିର୍ବାଚନ ଦାୟିତ୍ୱରେ ଥିବା ଅଧିକାରୀ ସେହି କାର ନିକଟରେ ପହଁଚିଥିଲେ, ନିର୍ବାଚନ ଆୟୋଗର କୌଣସି କର୍ମଚାରୀ ସେହି ଠାରେ ନଥିଲେ । ଏବଂ କାର ଭିତରେ ଇଭିଏମ ଥିବା ଦେଖିବାକୁ ମିଳିଛି ।
ଏହି ଘଟଣାକୁ ନେଇ ନିର୍ବାଚନ ଅଧିକାରୀଙ୍କ ଠାରୁ ବିସ୍ତୃତ ରିପୋର୍ଟ ମାଗିଛନ୍ତି ନିର୍ବାଚନ ଆୟୋଗ । ଦିଆଯାଇଥିବା ରିପୋର୍ଟ ଅନୁସାରେ ପୋଲିଂ ଟିମକୁ ଦିଆଯାଇଥିବା ଗାଡି ଅଧବାଟରେ ଖରାପ ହୋଇଯିବା ଯୋର୍ଗୁ ଅନ୍ୟ ଏକ ଗାଡିରୁ ଏହି ଇଭିଏମକୁ ଷ୍ଟ୍ରଙ୍ଗ ରୁମକୁ ନିଆଯାଉଥିଲା । ତେବେ ଇଭିଏମ ସ୍ଥାନାନ୍ତରିତ କରିବା ପୂର୍ବରୁ ଗାଡିର ମାଲିକାନା ସମ୍ପର୍କରେ ଯାଂଚ କରାଯାଇନଥିବା ପୋଲିଂ ଟିମ କହିଛି ।