ବିଭିନ୍ନ ସ୍ଥାନରେ ଇଭିଏମ୍ ଅଚଳ । କେନ୍ଦୁଝରରେ କାମ କରୁନି ଶହେରୁ ଅଧିକ ଇଭିଏମ୍
ସେପଟେ ଭୁବନେଶ୍ୱରର ୨୦ନଂ ଓ କୁଚିଣ୍ଡାରେ ୫ଟି ବୁଥରେ ମତଦାନରେ ବିଳମ୍ବ,ଭୋଟରଙ୍କ ମଧ୍ୟରେ ଅସନ୍ତୋଷ
କନକ ବ୍ୟୁରୋ: ପ୍ରଥମ ଏବଂ ଦ୍ୱିତୀୟ ପର୍ଯ୍ୟାୟ ମତଦାନଠାରୁ ବଳି ଗଲା ତୃତୀୟ ପର୍ଯ୍ୟାୟ ମତଦାନ । ତେବେ ପୂର୍ବରୁ ଅନୁଷ୍ଠିତ ହୋଇଯାଇଥିବା ଦୁଇଟି ପର୍ଯ୍ୟାୟ ଅପେକ୍ଷା ତୃତୀୟ ପର୍ଯ୍ୟାୟ ନିର୍ବାଚନରେ ବ୍ୟାପକ ଅବ୍ୟବସ୍ଥା ଦେଖାଦେଇଛି । ମତଦାନ ଆରମ୍ଭରୁ ହିଁ ରାଜ୍ୟର ବିଭିନ୍ନ ମତଦାନ କେନ୍ଦ୍ରରେ ଇଭିଏମରେ ତ୍ରୁଟି ଦେଖାଯାଇଛି । ଯାହା ଫଳରେ ମତାଦାନ ପ୍ରକ୍ରିୟାରେ ବାଧା ସୃଷ୍ଟି ହୋଇଛି । ଏଥି ସହିତ ଭୋଟ୍ ଦେବାକୁ ବହୁ ଦୂରରୁ ଧାଇଁ ଆସିଥିବା ମତଦାତା ଭୋଟ୍ ଦେଇ ନପାରିବାରୁ ଅସ୍ତବ୍ୟସ୍ତ ହୋଇପଡିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ହୋଇଥିବା ଦୁଇଟି ପର୍ଯ୍ୟାୟରେ ମଧ୍ୟ ଏଭଳି ସମସ୍ୟା ଦେଖାଦେଇଥିଲା, ଏହାପରେ ନିର୍ବାଚନ କମିଶନ ଏଥିପ୍ରତି ଦୃଷ୍ଟି ଦେବେ ବୋଲି କହିଥିଲେ । କିନ୍ତୁ ବ୍ୟବସ୍ଥାରେ କୌଣସି ସୁଧାର ନଆସିଥିବା ଆଜିର ନିର୍ବାଚନରେ ତାହା ଜଳ ଜଳ ହୋଇ ଦେଖାଯାଉଛି । କାରଣ କେବଳ ଗୋଟିଏ ଲୋକସଭା କ୍ଷେତ୍ରରୁ ହିଁ ଶହେରୁ ଅଧିକ ଇଭିଏମ ମେସିନ ଅଚଳ ହୋଇପଡିଛି । କେନ୍ଦୁଝର ଜିଲ୍ଲାରେ ପାଖାପାଖି ଶହେରୁ ଅଧିକ ମତଦାନ କେନ୍ଦ୍ରରେ କାମ କରୁନାହିଁ ଇଭିଏମ୍ । ଫଳରେ ଭୋଟ୍ ଦେବା ପାଇଁ ଦୀର୍ଘ ସମୟ ଧରି ଧାଡିରେ ଠିଆ ହୋଇଥିବା ମତଦାତାଙ୍କ ମଧ୍ୟରେ ତିବ୍ର ଅସନ୍ତୋଷ ଦେଖାଦେଇଛି ।
ଘଷିପୁରାରେ ୧୮ ଏବଂ ଆନନ୍ଦପୁରର ୨୨ଟି ବୁଥରେ ଇଭିଏମରେ ତ୍ରୁଟି କାରଣରୁ ମତଦାନ ପ୍ରକ୍ରିୟା ବିଳମ୍ବ ହୋଇଛି । ସେହିଭଳି ପାଟଣାରେ ୨୦ରୁ ଅଧିକ, ଚମ୍ପୁଆରେ ୨୦ଟି, ତେଲକୋଇରେ ୧୮ରୁ ଅଧିକ ଏବଂ କେନ୍ଦୁଝର ସଦରେ ୨୫ରୁ ଅଧିକ ବୁଥରେ ଇଭିଏମ ମେସନ ପୂରାପୁରି ଅଚଳ ହୋଇପଡିଛି । ଯାହା ଫଳରେ ମତଦାନରେ ବିଳମ୍ବ ଦେଖାଦେଇଛି ।
ଖାଲି କେନ୍ଦୁଝରରେ ନୁହେଁ ଅନ୍ୟ ଜାଗାରୁ ମଧ୍ୟ ସମାନ ଖବର ସାମନାକୁ ଆସିଛି । ବ୍ରହ୍ମଗିରି ବିଧାନସଭା ନିର୍ବାଚନ ମଣ୍ଡଳୀର ୧୫୪ ନମ୍ବର ବୁଥରେ ଇଭିଏମରେ ତ୍ରୁଟି କାରଣରୁ ମତଦାନ ପ୍ରକ୍ରିୟା ବିଳମ୍ବ ହୋଇଥିବା ସୂଚନା ମିଳିଛି ।କୁଚିଣ୍ଡାର ୫ଟି ବୁଥରେ ଅଚଳ ହୋଇପଡିଛି ଇଭିଏମ ମେସିନ । ବୁଥ ନମ୍ବର ୧୨୨, ୧୨୧, ୧୩୫,୧୩୮ ଏବଂ ୧୪୫ ନମ୍ବର ବୁଥରେ ଯାନ୍ତ୍ରିକ ତ୍ରୁଟି କାରଣରୁ ପଡିପାରୁନି ଭୋଟ୍ । ସେହିଭଳି କାମାକ୍ଷାନଗରର ୧୯ ନମ୍ବର ବୁଥରେ ଇଭିଏମ ଅଚଳ ହୋଇପଡିଛି । ସମ୍ବଲପୁରର ରେଢ଼ାଖୋଲ ନିର୍ବାଚନ ମଣ୍ଡଳୀ ଅନ୍ତର୍ଗତ ଭବାନୀପାଲିର ବୁଥ୍ ନମ୍ବର ୩୮ରେ ଲୋକସଭା ଭିଭିପିଏଟି କାମ କରୁ ନ ଥିବାରୁ ଲୋକେ ଭୋଟ୍ ଦେବାକୁ ଧାଡ଼ି ବାନ୍ଧି ଅପେକ୍ଷା କରିଛନ୍ତି। ଝଙ୍କରପାଲିର ବୁଥ୍ ନମ୍ବର ୩୬ ଓ ୩୭ରେ ଇଭିଏମ୍ କାମ କରୁ ନ ଥିବାରୁ ପୋଲିଙ୍ଗ୍ ପାର୍ଟି ଚିନ୍ତିତ ହୋଇ ପଡ଼ିଛନ୍ତି।