କନକ ବ୍ୟୁରୋ: କରୋନାର ଦ୍ୱିତୀୟ ଲହର ଫିକା ପଡିବା ସହ ୟୁରୋପରେ ଅନୁଷ୍ଠିତ ହୋଇଛି ୟୁରୋ କପ-୨୦୨୦ । ଆଉ ଏହି ସମୟରେ ଷ୍ଟାଡିଅମରେ ଦେଖିବାକୁ ମିଳୁଛି ପ୍ରଶଂସକଙ୍କ ଖଚାଖଚ ଭିଡ । ଖାଲି ସେତିକି ନୁହେଁ ରାସ୍ତାରେ ମଧ୍ୟ ଫୁଟବଲ ପ୍ରେମୀଙ୍କ ଜବରଦସ୍ତ ଉତ୍ସବ ଦେଖିବାକୁ ମିଳିଛି । ଯାହା କରୋନାର ତୃତୀୟ ଲହରକୁ ଖୋଲା ନିମନ୍ତ୍ରଣ କରିଛି ।
Kanak News is now on WhatsApp
Join and get latest news updates delivered to you via WhatsApp
ୟୁରୋ କପ ଫାଇନାଲ ପୂର୍ବରୁ ଷ୍ଟାଡିୟମ ବାହାରେ ହଜାର ହଜାର ସଂଖ୍ୟାରେ ଫୁଟବଲ ପ୍ରେମୀଙ୍କ ଭିଡ ଦେଖିବାକୁ ମିଳିଛି । ଭିଡ ଏପରି ଯେ, ରାସ୍ତାରେ ପାଦ ରଖିବା ପାଇଁ ସ୍ଥାନ ନାହିଁ । ଏଠି ଯେପରି ଲୋକଙ୍କ ମନରେ କରୋନା ଭୟ ନାହିଁ । ସମସ୍ତେ ଫୁଟବଲ ମ୍ୟାଚର ମଜା ନେବା ପାଇଁ ତତ୍ପର । କରୋନାର ସବୁ ନିୟମକୁ ଖୋଲାଖୋଲି ଉଲଂଘନ କରାଯାଇଛି ଏଠି । ଇଂଲଣ୍ଡ ୟୁରୋ କପର ସେମି ଫାଇନାଲ ମ୍ୟାଚ ଜିତିବା ପରେ ଫୁଟବଲ ପ୍ରେମୀ ରାସ୍ତାକୁ ଓହ୍ଲାଇ ଉତ୍ସବ ମନାଇବାର ଏହି ଖବର କରୋନାର ତୃତୀୟ ଲହରକୁ ଖୋଲା ନିମନ୍ତ୍ରଣ ଦେଇଛି । କରୋନା କାଳରେ ୟୁରୋ କପ୍ର ଆୟୋଜନ ଆଉ ତା ଉପରେ କୋଭିଡ୍ ନିୟମାବଳୀର ଉଲ୍ଲଂଘନ ଆଗକୁ ବଡ ସମସ୍ୟା ଆଣିପାରେ । ୟୁରୋ କପ୍ ପାଇଁ ତୃତୀୟ ଲହରର ବେଗ ବଢିପାରେ ବୋଲି ବିଶେଷଜ୍ଞମାନେ ମତ ଦେଇଛନ୍ତି ।
ରବିବାର ଇଂଲଣ୍ଡରେ ୟୁରୋ କପ ଫାଇନାଲ ମ୍ୟାଚ ଅନୁଷ୍ଠିତ ହେବାକୁ ଯାଉଛି । ଇଟାଲୀ ଓ ଇଂଲଣ୍ଡ ମଧ୍ୟରେ ଫାଇନାଲ ମ୍ୟାଚ ଅନୁଷ୍ଠିତ ହେବ । ଯାହାକୁ ନେଇ ଟିକେଟ ଦାମ ବଢିଯାଇଛି । ଏପରିକି ବ୍ଲାକରେ ମଧ୍ୟ ଟିକେଟ ବିକ୍ରି ହେଉଛି । ଇଂଲଣ୍ଡ ଫାଇନାଲ ଖେଳିବାକୁ ଥିବାରୁ ପ୍ରଶଂସକଙ୍କ ଭିତରେ ଏଭଳି ଉତ୍ସାହ ରହିଛି ୟୁରୋ କପ ଫାଇନାଲକୁ ନେଇ । ମାତ୍ର କୋଭିଡ୍ କଟକଣାର ଖୋଲାଖୋଲି ଉଲ୍ଲଂଘନ ୟୁରୋ କପ୍କୁ ନେଇ ଚିନ୍ତା ବଢାଇ ଦେଇଛି । ୟୁରୋ କପ୍ ଶେଷ ହେବା ସହ ତୃତୀୟ ଲହରର ଆଗମନ ହେବ ବୋଲି ଅନେକ ବିଶେଷଜ୍ଞ ମତ ଦେଇଛନ୍ତି ।
ସେପଟେ ୟୁରୋ କପ୍ ଉପରେ ବି କରୋନା ସଂକଟ ଦେଖା ଦେଇଛି । ଇଂଲଣ୍ଡର ୨ ଜଣ ଖେଳାଳୀ କରୋନା ଭୂତାଣୁରେ ଆକ୍ରାନ୍ତ ହେବାପରେ ସେମାନଙ୍କୁ ସଂଗରୋଧରେ ରଖାଯାଇଛି । ସ୍କଟଲ୍ୟାଣ୍ଡର ଜଣେ ଖେଳାଳୀ ମଧ୍ୟ କରୋନାରେ ସଂକ୍ରମିତ ହୋଇଛନ୍ତି । ଯେଉଁଠି ଖେଳାଳୀ ସଂକ୍ରମିତ ହେଲେଣି, ସେଠାରେ ସାଧାରଣ ଲୋକଙ୍କ ଅବସ୍ଥା କଣ ହେବ ଭିଡକୁ ଦେଖି ସହଜରେ ଅନୁମାନ କରିଯାଇପାରେ । ତେବେ ଇଂଲଣ୍ଡରେ କରୋନା ନିରୋଧି ଟୀକାକରଣ ବେଶ ଦ୍ରୁତ ଗତିରେ କରାଯାଉଛି । ଦେଶରେ ୫୦ ପ୍ରତିଶତରୁ ଅଧିକ ଲୋକ କରୋନା ଟିକାର ଦୁଇଟି ଯାକ ଡୋଜ୍ ନେଇ ସାରିଲେଣି । ଯାହା ଏକ ସକରାତ୍ମକ ସୂଚନା । ତଥାପି କରୋନା ସଂକଟକୁ ଏଭଳି ହାଲକା ଭାବେ ନେବା ଆଦୌ ସଠିକ୍ ନୁହେଁ ।