ପେଶାରେ ବ୍ୟାଙ୍କ କର୍ମଚାରୀ, ନିଶା ତାଙ୍କର ଗଛ ଲଗାଇବା । ପରିବେଶପ୍ରେମୀ ହିମାଂଶୁ ୯ ବର୍ଷରେ ଲଗାଇଲେଣି ୯୫ ହଜାର ଗଛ ।

108

କନକ ବ୍ୟୁରୋ: ପେଶାରେ ସେ ଜଣେ ବ୍ୟାଙ୍କ କର୍ମଚାରୀ । ହେଲେ ନିଶା ତାଙ୍କର ଗଛ ଲଗାଇବା । ସେ ଗଛ ଲଗାଇବାକୁ ପ୍ରତି ବର୍ଷ ୩ ଲକ୍ଷରୁ ଅଧିକ ଟଙ୍କା ଖର୍ଚ୍ଚ କରିଥାନ୍ତି । ପରିବେଶ ସୁରକ୍ଷା ରଖିବା ସହ ସବୁଜ ସୁନ୍ଦର କରିବାକୁ ଯେମିତି ସେ ସଙ୍କଳ୍ପବଦ୍ଧ ହୋଇଛନ୍ତି । ପୁରୀ କୃଷ୍ଣପ୍ରସାଦ ଗୁମୁଣ୍ଡିଆ ପାଇକ ସାହିର ହିମାଂଶୁ ଶେଖର ଜଣେ ବ୍ୟାଙ୍କ କର୍ମଚାରୀ । ହେଲେ ନିଜ ବ୍ୟସ୍ତବହୁଳ ଜୀବନରୁ କିଛି ସମୟ ବାହାର କରି ଗଛ ଲଗାଇବାକୁ ଭଲ ପାଇଥାନ୍ତି ।

କର୍ମ କ୍ଷେତ୍ରରୁ ବାହାରି ନିଜ ଗାଁରେ ପହଞ୍ଚି ସ୍କୁଲ କଲେଜ ଗୁଡିକରେ ବୁଲି ବୁଲି ଗଛ ଲଗାଇବା ସହ ଲୋକଙ୍କୁ ସଚେତନ କରୁଛନ୍ତି । ସକାଳୁ ସକାଳୁ ଉଠି ଗାଡି ନେଇ ବାହାରିପଡନ୍ତି ହିମାଂଶୁ । ବିଭିନ୍ନ ଗାଁକୁ ଗାଁ ଯାଇ ଘର ଘର ବୁଲି କଦମ୍ବ ବାଣ୍ଟନ୍ତି, ବାଦାମରୁ ନେଇ ନିମ୍ବ, ହରିଡା , ବାହଡା ଓ ଅଅଁଳା ଗଛ ସବୁ । ଆଜିକୁ ୯ ବର୍ଷ ହେବ ପାଖାପାଖି ୯୫ହଜାର ଗଛ ଲଗାଇ ସାରିଲେଣି ହିମାଂଶୁ ।

ସେ ଗ୍ରୀନ ପାରିକୁଦ ଓ କ୍ଲାଇମେଟ ଚେଞ୍ଜ ସଲ୍ୟୁସନ ନାଁରେ ଦୁଇଟି ପରିବେଶ ସୁରକ୍ଷା ସଙ୍ଗଠନ କରିଛନ୍ତି । ଯେଉଁଥିରେ ବହୁ ଛାତ୍ରଛାତ୍ରୀଙ୍କ ଠାରୁ ନେଇ ସରକାରୀ କର୍ମଚାରୀ ମଧ୍ୟ ରହିଛନ୍ତି । ସମସ୍ତେ ତାଙ୍କ ସହ ଗଛ ଲଗାଇବାରେ ସାମିଲ ହୋଇଛନ୍ତି । ସେହିଭଳି ପାରିକୁଦ ସଙ୍ଗଠନ ନେଇ ଚିଲିକା ଘେରିବନ୍ଧର ଦୁଇ ପାଶ୍ୱର୍ରେ ଅନେକ ଗଛ ଲଗାଇଛନ୍ତି ହିମାଂଶୁ ।