କଳା ପ୍ରେମରେ ପୂରା ପରିବାର…କଳାକାର ସ୍ୱପ୍ନ ବାଟରେ କଂଟା ସାଜିପାରିନି ଅର୍ଥ…ବାପାଙ୍କୁ ଅନୁସରଣ କରି ତବଲା ବଜାଉଛନ୍ତି ଦୁଇ ଝିଅ
କନକ ବ୍ୟୁରୋ: କୁନି କୁନି ଝିଅ, ତବଲାରେ ହାତର ସ୍ପର୍ଶରେ ବାହାରୁଛି ମନକୁ ମୋହିଲା ଭଳି ସଙ୍ଗୀତର ମୂର୍ଚ୍ଛନା । ଜୟପୁର ସହରରେ ରହୁଥିବା ସଲଭିଆ ଓ ସଲୋନିଙ୍କ ତବଲା ବାଦନକୁ ବିସ୍ମୟ କହିଲେ ଭୁଲ ହେବ ନାହିଁ । ବାପା ତରୁଣ କୁମାର ପାଣିଙ୍କୁ ଗୁରୁ କରି ତବଲା ସାଧନା କରୁଛନ୍ତି ଦୁଇ ଭଉଣୀ । ପ୍ରତିଦିନ ସନ୍ଧ୍ୟାରେ ୨ଘଂଟା ବାପାଙ୍କ ସହ ମିଶି ତବଲା ଶିଖିବା ସହ ବିଭିନ୍ନ ପ୍ରକାର ସ୍ୱର ସଂଯୋଜନା କରନ୍ତି ଦୁଇ ଭଉଣୀ । ସଲଭିଆ ସ୍କୁଲଠାରୁ ଆରମ୍ଭ କରି ରାଜ୍ୟସ୍ତରରେ ଅନେକ ପୁରସ୍କାର ପାଇଛନ୍ତି । ବାପା ତରୁଣ କୁମାର ପାଣି ମଧ୍ୟ ଆକାଶବାଣୀର ଜଣେ ସ୍ୱକୃତୀପ୍ରାପ୍ତ କଳାକାର । ରାଜ୍ୟର ବିଭିନ୍ନ କୋଣରେ ନିଜର ପ୍ରତିଭାର ପରିଚୟ ସେ ଅନେକ ଥର ଦେଇ ପ୍ରଶଂସିତ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ପରିବାର ଆର୍ଥିକ ସ୍ଥିତି ସେତେଟା ଭଲ ନଥିବାରୁ ତରୁଣ ତାଙ୍କର ଏହି ନିଶାକୁ ପେସାରେ ପରିବର୍ତ୍ତନ କରିପାରିନଥିଲେ । ତେଣୁ ବାଧ୍ୟ ହୋଇଥିଲେ ଅଟୋରିକ୍ସା ଚଳାଇବାକୁ । ତେବେ ତରୁଣଙ୍କ ପରିବାର କହିଲେ ବୁଢୀ ମାଆ, ପତ୍ନୀ ଏବଂ ୨ ଝିଅ । ଅଭାବରେ ରହିବା ସତ୍ୱେ ତରୁଣ ତବଲାକୁ ଛାଡିପାରି ନାହାନ୍ତି । ଏପରିକି ତାଙ୍କଠାରୁ ୨ ଝିଅ ବି ଏହି କଳା ପାଇଛନ୍ତି । ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ବାପାଙ୍କ ତବଲା ବାଦନ ଦେଖିବା ପରେ ସେମାନେ ବି ଏହି କଳାକୁ ଆପଣାଇଛନ୍ତି ।
ତରୁଣଙ୍କ ବଡ ଝିଅ ସଂଧ୍ୟା ସପ୍ତମ ଶ୍ରେଣୀରେ ପାଠପଢୁଥିବା ବେଳେ ସାନ ଝିଅ ଚତୁର୍ଥ ଶ୍ରେଣୀରେ ପଢୁଛି । ହେଲେ ଉଭୟ କିନ୍ତୁ ବାପାଙ୍କ ପାଦଙ୍କ ଅନୁସରଣ କରି ତବଲା ବଜାଇବା ଶୁଖୁଛନ୍ତି । ଏପରିକି ଅବିଭକ୍ତ କୋରାପୁଟ ଜିଲ୍ଲାରେ କେହି ମହିଳା ତବଲା ବାଦକ ନଥିବା ଏମାନେ ହେବେ ପ୍ରଥମ ପିଢି । ଏହି କଳାକାର ପରିବାରଙ୍କୁ ଯଦିଓ କୌଣସି ସରକାରୀ ପ୍ରୋତ୍ସାହନ ମିଳିନାହିଁ । ତଥାପି ଲୋପ ପାଇ ଆସୁଥିବା ବାଦ୍ୟଯନ୍ତ୍ର ତବଲାକୁ ବଂଚାଇ ରଖିବା ତାଙ୍କ ଲକ୍ଷ୍ୟ ବୋଲି କହିଛନ୍ତି ତରୁଣ । ତେବେ କଳା ପାଇଁ ସମର୍ପିତ ଏହି ପରିବାର ଲକ୍ଷ୍ୟ ପୁରଣ କରିବା ଦିଗରେ ସରକାରୀ ସହାୟତା ଯୋଗାଇ ଦେବାକୁ ବୃଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।