ବଢ଼ିଲା ଅଭିନେତା ବିଜୟ ଦେବରକୋଣ୍ଡାଙ୍କ ଅଡୁଆ : ଟିପ୍ପଣୀ କରି ଫସିଲେ ଅଭିନେତା

କନକ ବ୍ୟୁରୋ : ବଢ଼ିଲା ସାଉଥ୍ ଷ୍ଟାର୍ ବିଜୟ ଦେବରକୋଣ୍ଡାଙ୍କ ସମସ୍ୟା । ତାଙ୍କର ଏକ ପୁରୁଣା ବିବାଦୀୟ ବୟାନ ଏବେ ପୁଣି ଚର୍ଚ୍ଚାକୁ ଆସିଛି, ଯାହା ବିରୋଧରେ ଅଭିଯୋଗ ଦାଖଲ କରାଯାଇଛି । ଆଦିବାସୀ ସଂଘ ସାଇବରାବାଦର ରାୟଦୁଗ୍ରାମ ପୁଲିସ ଷ୍ଟେସନରେ ବିଜୟଙ୍କ ବିରୋଧରେ ମାମଲା ରୁଜୁ କରିଛି । ସଂଘ ଅଭିଯୋଗ କରିଛି ଯେ ଅଭିନେତା ସେମାନଙ୍କୁ ଅପମାନିତ କରିଛନ୍ତି । ଅଭିନେତାଙ୍କ ବିରୋଧରେ ଏସସି/ଏସଟି ଧାରା ଅନୁଯାୟୀ ଏକ ମାମଲା ରୁଜୁ କରାଯାଇଛି ।

ବିଜୟ ଦେବରକୋଣ୍ଡା ଏପ୍ରିଲ ମାସରେ ଅଭିନେତା ସୂର୍ଯ୍ୟଙ୍କ ଫିଲ୍ମ 'ରେଟ୍ରୋ'ର ଅଡିଓ ଲଞ୍ଚରେ ପହଞ୍ଚିଥିଲେ । ସେଠାରେ ସେ ପହଲଗାମ ଆତଙ୍କବାଦୀ ଆକ୍ରମଣ ଉପରେ ପ୍ରତିକ୍ରିୟା ଦେଇଥିଲେ । ବିଜୟ କହିଥିଲେ ଯେ ‘ଆତଙ୍କବାଦର ମୁକାବିଲା କରିବା ପାଇଁ ସମସ୍ତେ ଏକ ହେବା ଆବଶ୍ୟକ । ସେ ଏହା ମଧ୍ୟ କହିଥିଲେ ଯେ ପାକିସ୍ତାନର ଲୋକେ ନିଜେ ସେମାନଙ୍କ ସରକାରଙ୍କୁ ନେଇ ସନ୍ତୁଷ୍ଟ ନୁହନ୍ତି ।’ ତେବେ ବିଜୟ ତାଙ୍କ ଭାଷଣ ସମୟରେ ଶିକ୍ଷା ଉପରେ ଗୁରୁତ୍ୱ ଦେଉଥିବା ବେଳେ ଆଦିବାସୀଙ୍କ ଉପରେ ଏକ ବିବାଦୀୟ ବୟାନ ଦେଇଥିଲେ ଯାହା ତାଙ୍କ ପାଇଁ ସମସ୍ୟା ପାଲଟିଛି । ବିଜୟ କହିଥିଲେ 'ଆତଙ୍କବାଦୀମାନେ ଏବେ ସେଭଳି ଲଢ଼ୁଛନ୍ତି, ଯେପରି ୫୦୦ ବର୍ଷ ପୂର୍ବେ ଆଦିବାସୀମାନେ ଲଢ଼ୁଥିଲେ । ଆମକୁ ଏକ ହୋଇ ରହିବା ଏବଂ ପରସ୍ପରକୁ ଭଲ ପାଇବା ଉଚିତ । ଆଗକୁ ବଢ଼ିବା ପାଇଁ ଆମକୁ ସର୍ବଦା ଏକାଠି ରହିବା ଉଚିତ । ଏଥିପାଇଁ ଶିକ୍ଷା ବହୁତ ଗୁରୁତ୍ୱପୂର୍ଣ୍ଣ । ଯେତେବେଳେ ଆମେ ନିଜେ ଖୁସି ରହିବୁ ଏବଂ ପିତାମାତାଙ୍କୁ ଖୁସି ରଖିବୁ, ସେତେବେଳେ ହିଁ ଆମେ ଏକାଠି ଆଗକୁ ବଢ଼ିପାରିବୁ ।'