ଆଖି ବୁଜିଲେ ବଲିଉଡର ଏହି ଅଭିନେତ୍ରୀଙ୍କ ପିତା : ବର୍ଷା ଭିତରେ ବାପାଙ୍କୁ ଶେଷ ବିଦାୟ ଦେଲେ ଝିଅ

କନକ ବ୍ୟୁରୋ : ଅଭିନେତ୍ରୀ ପ୍ରିୟଙ୍କା ଚୋପ୍ରାଙ୍କ ମାଉସୀ ଝିଅ ଭଉଣୀ ମନାରା ଚୋପ୍ରାଙ୍କ ଉପରେ ପଡ଼ିଲା ଦୁଃଖର ପାହାଡ଼ । ଜୁନ୍ ୧୬ ତାରିଖରେ ପିତା ରମନ ରାୟ ହାଣ୍ଡାଙ୍କୁ ସବୁଦିନ ପାଇଁ ହରାଇ ବସିଛନ୍ତି ମନାରା । ଏହି ଦୁଃଖଦ ଖବରକୁ ସୋସିଆଲ୍ ମିଡ଼ିଆ ଆକାଉଣ୍ଟରେ ପୋଷ୍ଟ୍ କରି ଫ୍ୟାନ୍ସଙ୍କୁ ଅଭିନେତ୍ରୀ ସୂଚନା ଦେଇଛନ୍ତି । ୭୨ ବର୍ଷୀୟ ପିତାଙ୍କ ଦେହାନ୍ତରେ ଅଭିନେତ୍ରୀଙ୍କୁ ଶକ୍ତ ଆଘାତ ଲାଗିଛି । ଲଗାତାର ବର୍ଷା କାରଣରୁ ଅନ୍ତିମ ସଂସ୍କାରରେ ବିଳମ୍ବ ହୋଇଥିଲା ।

ତେବେ ଆଜି ଗୁରୁଦ୍ବାରରେ ଅମର ଆତ୍ମାଙ୍କ ସଦଗତି ପାଇଁ ପ୍ରାର୍ଥନା ସଭା ରଖାଯାଇଛି । ବର୍ତ୍ତମାନ ଅଭିନେତ୍ରୀଙ୍କ ଅନେକ ଭିଡ଼ିଓ ସାମ୍ନାକୁ ଆସୁଛି । ଯାହା ସୋସିଆଲ୍ ମିଡ଼ିଆରେ ଭାଇରାଲ୍ ହେଉଛି । ମନାରାଙ୍କ ଭଉଣୀ ମିତାଲି ଏବଂ ପୂରା ପରିବାର ମୁରବିଙ୍କ ଦେହାନ୍ତରେ ଭାଙ୍ଗି ପଡ଼ିଛନ୍ତି । ଶୋକରେ ବୁଡ଼ିଥିବା ପରିବାରକୁ ସମବେଦନା ଜଣାଇବା ପାଇଁ ପହଞ୍ଚିଛନ୍ତି ସାଙ୍ଗସାଥୀ ଏବଂ ବଲିଉଡ୍ କଳାକାର । ଭାଇରାଲ୍ ହେଉଥିବା ଭିଡ଼ିଓରେ ମନାରା ପିତାଙ୍କ ଫଟୋକୁ ନେଇ ଗୁରୁଦ୍ବାର ଭିତରକୁ ପ୍ରବେଶ କରୁଥିବାର ନଜର ଆସୁଛନ୍ତି ।