ଗ୍ୟାଙ୍ଗଷ୍ଟର ଟାର୍ଗେଟରେ ସଲମାନ ଖାନ୍ । ଧମକର ୭ଦିନ ପରେ ସୁଟିଂ ସେଟରେ ହଙ୍ଗାମା

ବଲିଉଡ ଅଭିନେତା ସଲମାନ ଖାନଙ୍କୁ ଜୀବନରୁ ମାରିଦେବା ଧମକ ଘଟଣା କେବଳ କଥାରେ ରହିନି ବଂର ସୁଟିଂ ସେଟରେ ଏହାର ଚିତ୍ର ନଜର ଆସିଛି । ମୁମ୍ବାଇ ଗୋରେଗାଓଁ ଫିଲ୍ମସିଟିରେ ଭାଇଜାନଙ୍କ ଅପକମିଂ ଫିଲ୍ମ ରେସଥ୍ରୀର ସୁଟିଂ ଚାଲିଥିବା ସମୟରେ ହଠାତ କିିଛି ଅଜଣା ଯୁବକ ସେଟରେ ପସି ଭଙ୍ଗାରୁଜା ସହ ହଙ୍ଗାମା  କରିଥିଲେ । ଅନ୍ୟପଟେ ସେଟରେ ଉପସ୍ଥିତ ଥିବା ସଲମାନଙ୍କୁ କଡ଼ା ସୁରକ୍ଷାବଳରେ ରଖାଯାଇଥିଲା । ତେବେ କୌଶଳକ୍ରମେ ସେଟରୁ ସଲମାନଙ୍କୁ ବାହାର କରି ଘରେ ପହଁଚାଇଥିଲେ ସୁରକ୍ଷାକର୍ମୀମାନେ ।

ପ୍ରାଥମିକ ତଦନ୍ତରୁ ଜଣାପଡିଛି କି, ସୁଟିଂ ସେଟରେ ଅଜଣା ଯୁବକଙ୍କ ଆକ୍ରମଣ ଘଟଣାର ସିଧା ସର୍ମ୍ପକ ରହିଛି ରାଜସ୍ଥାନ ଯୋଧପୁର ସହ । ଏଠାକାର ସକ୍ରିୟ ଗ୍ୟାଙ୍ଗଷ୍ଟାର ଲରେନ୍ସ ବିଶ୍ନୋଇ ଠିକ ୭ଦିନ ଆଗରୁ ଭାଇଜାନ ସଲମାନ ଖାନଙ୍କୁ ଜୀବନରୁ ମାରିଦେବା ନେଇ ଖୁଲ୍ଲମଖୁଲ୍ଲା ଧମକ ଦେଇଥିଲା । ଲରେନ୍ସର ସାଥୀ ଯୁବକଙ୍କ  ହିଁ ସେଟରେ ପଶି ଉନ୍ମୋତକାଣ୍ଡ ଘଟାଇଥିବା କହିଛି ପୁଲିସ । ତେବେ ଏଠି ପ୍ରଶ୍ନ ଉଠୁଛି ଧମକ ମିଳିବା ସତ୍ୱେ ସଲମାନଙ୍କ ସୁରକ୍ଷା ପ୍ରତି ବିଶେଷ ଧ୍ୟାନ ଯଦି ଦିଆଯାଇଥିଲା ତେବେ ଆକ୍ରମଣକାରୀ ସୁଟିଂ ସେଟରେ କିପରି ପହଁଚିଲେ ? ଯଦି ସଲମାନ ନିକଟରେ ପୁଲିସକର୍ମୀ ଓ ବଡିଗାର୍ଡ ନଥାନ୍ତେ ତେବେ କଣ ହୋଇଥାନ୍ତା ସଲମାନଙ୍କର ।

ଅନ୍ୟପଟେ ମୁମ୍ବାଇ ରାସ୍ତାରେ ସାଇକେଲ ଚଳାଇବାକୁ ସଲମାନଙ୍କୁ ବାରଣ କରିଛି ମୁମ୍ବାଇ ପୁଲିସ । ହୁଏତ ପୂର୍ବପରି ସାଇକେଲ ଚଲାଇ ଫ୍ୟାନଙ୍କ ନିକଟତର ହେଉଥିବା ସଲମାନ କିଛି ଦିନପାଇଁ ଆଉ ନଜର ଆସିବେନି । ଏଥିସହ ସଲମାନ ନିଜ କୌଣସି କାର୍ଯ୍ୟକ୍ରମ ସମ୍ବନ୍ଧରେ ସୋସିଆଲ ମିଡିଆରେ ସୁଚନା ନଦେବା ପାଇଁ ପୁଲିସ ପରାର୍ମଶ ଦେଇଛି । ଅନ୍ୟପଟେ ଧମକ ସହ ସର୍ମ୍ପକ ରଖୁଥିବା ଗ୍ୟାଙ୍ଗଷ୍ଟର ଲରେନ୍ସ ବିଶ୍ନୋଇ ଉପରେ ତିକ୍ଷଣ ନଜର ରଖାଯାଇଛି । ଗତସପ୍ତାହରେ ଯୋଧପୁର କୋର୍ଟରେ ହାଜର ହେବା ସମୟରେ ବିଶ୍ନୋଇ ସଲମାନଙ୍କୁ ମାରିବା ଧମକ ଦେଇଥିଲା । ଗ୍ୟାଙ୍ଗଷ୍ଟର କହୁଛି କୃଷ୍ଣସାର ମୃଗ ଶିକାର ମାମଲାରେ ସଲମାନ ତାଙ୍କୁ ମିଛରେ ଫଶାଇଛନ୍ତି ଓ ଏହାର ସେ ବଦଲା ନେବ ।