କନକ ବ୍ୟୁରୋ : ପାକିସ୍ତାନ ବିପକ୍ଷରେ ବିଜୟୀ ହୋଇଥିଲେ ମଧ୍ୟ ବିଶ୍ୱକପରୁ ବାଦ୍ ପଡିଛି ପୂର୍ବତନ ଚାମ୍ପିୟନ ଇଂଲଣ୍ଡ । ବିଶ୍ୱକପରୁ ବିଦା ହୋଇଥିଲେ ମଧ୍ୟ ଶେଷ ମ୍ୟାଚରେ ବିଜୟୀ ହୋଇ ଇଜ୍ଜତ ବଞ୍ଚାଇଛି ଇଂଲଣ୍ଡ । ଶେଷ ମ୍ୟାଚରେ ଦଳ ପରାଜିତ ହୋଇଥିଲେ ଆହୁରି ସମାଲୋଚନାର ଶିକାର ହୋଇଥାନ୍ତା । କିନ୍ତୁ ଶେଷ ମ୍ୟାଚରେ ବିଜୟୀ ହୋଇ ୨୦୨୫ ପାଇଁ ଟିକେଟ ହାତେଇଛି ଇଂଲଣ୍ଡ । ପାକିସ୍ତାନ ବିପକ୍ଷରେ ଶେଷ ମ୍ୟାଚରେ ବିଜୟୀ ହୋଇ ନିଜର ବିଶ୍ୱକପ ଅଭିଯାନ ଶେଷ କରିଛି ଇଂଲଣ୍ଡ ।
Kanak News is now on WhatsApp
Join and get latest news updates delivered to you via WhatsApp
ଚଳିତ ବିଶ୍ୱକପରେ ଇଂଲଣ୍ଡ ଟିମ୍ ଖରାପ ପ୍ରଦର୍ଶନ କରିଛି ସତ କିନ୍ତୁ ଶେଷ ମ୍ୟାଚରେ ବିଜୟୀ ହୋଇ ୨୦୨୫ରେ ହେବାକୁ ଥିବା ଚାମ୍ପିୟନ୍ସ ଟ୍ରଫି ପାଇଁ ଯୋଗ୍ୟତା ହାସଲ କରିଛି । ଶେଷ ୨ଟି ମ୍ୟାଚରେ ବିଜୟୀ ହୋଇ ଇଂଲଣ୍ଡ ଏହି ଯୋଗ୍ୟତା ହାସଲ କରିଛି । ଶେଷ ମ୍ୟାଚରେ ବିଜୟ ସହ ଇଂଲଣ୍ଡ ପଏଣ୍ଟ ଟେବୁଲର ୭ ନମ୍ବର ସ୍ଥାନରେ ରହି ଏହି ଯୋଗ୍ୟତା ହାସଲ କରିଛି । ଚଳିତ ବିଶ୍ୱକପରେ ଇଂଲଣ୍ଡ ମୋଟ ୯ଟି ମ୍ୟାଚରୁ ୬ଟିରେ ବିଜୟୀ ହୋଇଛି । ପ୍ରଥମ ୭ଟି ମ୍ୟାଚରୁ ଇଂଲଣ୍ଡ ୬ଟି ମ୍ୟାଚରେ ପରାଜିତ ହୋଇଥିଲା । ତେବେ ଶେଷ ୨ ମ୍ୟାଚରେ ନେଦରଲାଣ୍ଡସ ଓ ପାକିସ୍ତାନକୁ ହରାଇ ଚାମ୍ପିୟନ୍ସ ଟ୍ରଫି ପାଇଁ ଟିକେଟ ହାତେଇଛି ବଟଲରଙ୍କ ଟିମ୍ ।
ଇଂଲଣ୍ଡ ଚାମ୍ପିୟନ୍ସ ଟ୍ରଫି ପାଇଁ ଯୋଗ୍ୟତା ହାସଲ କରିଥିବା ବେଳେ ନେଦରଲାଣ୍ଡସ ପାଖରେ ଚାମ୍ପିୟନ୍ସ ଟ୍ରଫି ପାଇଁ ଯୋଗ୍ୟତା ହାସଲ କରିବାର ସୁଯୋଗ ରହିଛି । ବିଶ୍ୱକପରେ ଆଜି ଶେଷ ଲିଗ୍ ମ୍ୟାଚ୍ ଭାରତ-ନେଦରଲାଣ୍ଡସ ମଧ୍ୟରେ ରହିଛି । ତେଣୁ ନେଦରଲାଣ୍ଡସ ଯଦି ଭାରତକୁ ହରାଉଛି ତେବେ ସିଧାସଳଖ ଚାମ୍ପିୟନ୍ସ ଟ୍ରଫି ପାଇଁ ଯୋଗ୍ୟତା ହାସଲ କରିବ । ଆସନ୍ତା ୨୦୨୫ରେ ଖେଳାଯିବ ଚାମ୍ପିୟନ୍ସ ଟ୍ରଫି । ଆୟୋଜକ ଦେଶ ଭାବେ ପାକିସ୍ତାନ ଚାମ୍ପିୟନ୍ସ ଟ୍ରଫି ପାଇଁ ସିଧାସଳଖ ଯୋଗ୍ୟତା ହାସଲ କରିଥିବା ବେଳେ ଭାରତ, ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ, ଇଂଲଣ୍ଡ, ଆଫଗାନିସ୍ତାନ ମଧ୍ୟ ଯୋଗ୍ୟତା ହାସଲ କରିଛନ୍ତି । ଆଫଗାନିସ୍ତାନ ପ୍ରଥମ ଥର ପାଇଁ ଆଇସିସି ଚାମ୍ପିୟନ୍ସ ଟ୍ରଫି ପାଇଁ କ୍ୱାଲିଫାଏ କରିଛି । ଏବେସୁଦ୍ଧା ୭ଟି ଟିମ୍ ଚାମ୍ପିୟନ୍ସ ଟ୍ରଫି ପାଇଁ କ୍ୱାଲିଫାଏ କରିଥିବା ବେଳେ ଆଉ ଗୋଟିଏ ସ୍ଥାନ ଫାଙ୍କା ରହିଛି । ଯଦି ନେଦରଲାଣ୍ଡସ ବିଜୟୀ ହେଉଛି ତେବେ ଯୋଗ୍ୟତା ହାସଲ କରିବ ନଚେତ ବାଂଲାଦେଶ ୮ମ ଦଳ ଭାବେ ଚାମ୍ପିୟନ୍ସ ଟ୍ରଫିରେ ଏଣ୍ଟ୍ରି କରିବ । ଅନ୍ୟପଟେ ଭାରତ ଏବେସୁଦ୍ଧା ବିଶ୍ୱକପରେ ଅପରାଜେୟ ରହିଛି, ତେଣୁ ନେଦରଲାଣ୍ଡସ ବିପକ୍ଷରେ ବିଜୟୀ ହୋଇ ଏହି ଧାରାକୁ ଅବ୍ୟାହତ ରଖିବାକୁ ଚେଷ୍ଟା କରିବ ଟିମ୍ ଇଣ୍ଡିଆ ।