କନକ ବ୍ୟୁରୋ : ରାତାରାଜି କୋଟିପତି ହେବା ନିଶାରେ ଜୀବନ ହାରିଲେ ଯୁବ ଇଞ୍ଜିନିୟର । ପୁଣେ ସ୍ଥିତ ଇନଫୋସିସରେ ସିଷ୍ଟମ ଇଂଜିନିୟର ଭାବେ ଚାକିରି କରୁଥିବା ବାଲେଶ୍ୱର ଆମ୍ବିଳିଅଠା ଗାଁର ସୌମିତ୍ର ନନ୍ଦୀ ଗତ ଦୁଇ ବର୍ଷ ହେଲା ଘରେ ରହି କାମ କରୁଥିଲେ । ଏହି ସମୟରେ ସୌମିତ୍ର ଅନ୍ ଲାଇନ୍ ଟ୍ରେଡିଂ ଓ ଜୁଆ ପ୍ରତି ଆକର୍ଷିତ ହୋଇ ଲକ୍ଷାଧିକ ଟଙ୍କା ହରାଇଥିଲେ । ଏବଂ ଏହା ହିଁ ତାଙ୍କ ପାଇଁ କାଳ ପାଲଟିଥିଲା । କୌଣସି ଉପାୟ ନପାଇ ମାନସିକ ଚାପଗ୍ରସ୍ତ ହୋଇ ବିଷ ପିଇ ଆତ୍ମହତ୍ୟା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
(ବାପା ମୋତେ କ୍ଷମା କରିଦେବ, ମୁଁ ତୁମକୁ ଖୁସି ଦେଇପାରିଲିନି, ମୋ ଜୀବନରେ ଏମିତି ଘଟିବ ବୋଲି ଭାବିନଥିଲି)
ରାତାରାତି କୋଟିପତି ହେବାର ନିଶା ନେଲା ଜୀବନ । ଋଣ ଭାରରେ ବୁଡ଼ି ଜୀବନ ହାରିଦେଲେ ଯୁବକ । ଅନଲାଇନ ଗେମ୍ ପ୍ରତି ଯୁବବର୍ଗଙ୍କ ଆଗ୍ରହ ବଢ଼ୁଥିବା ବେଳେ ଅନଲାଇନ ଗେମ୍ ଯେ କେତେ ସାଂଘାତିକ ହୋଇପାରେ, ଜଳେଶ୍ୱରର ଜଣେ ଇଞ୍ଜିନିୟରଙ୍କ ଆତ୍ମହତ୍ୟା, ତାହା ସତର୍କ କରିଦେଇଛି । ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକର ନଛିମପୁର ପଂଚାୟତ ଆମ୍ବିଳିଅଠା ଗାଁର ସୂରୂପ କୁମାର ନନ୍ଦୀଙ୍କ ପୁଅ ସୌମିତ୍ର ନନ୍ଦୀ । ପୁଣେ ସ୍ଥିତ ଇନଫୋସିସରେ ସିଷ୍ଟମ ଇଂଜିନିୟର ଭାବେ ଚାକିରି କରୁଥିଲେ । କୋଭିଡ ଯୋଗୁଁ ଦୁଇ ବର୍ଷ ହେବ ଘରୁ ରହି କାମ କରୁଥିବା ସୌମିତ୍ର ଅନଲାଇନ୍ ଟ୍ରେଡିଂ ଓ ଜୁଆ ପ୍ରତି ଆକର୍ଷିତ ହୋଇ ପଇସା ଲଗାଇଥିଲେ । ହେଲେ ଏଥିରେ ଟଙ୍କା ହରାଇଥିଲେ, ଆଉ ସାଙ୍ଗସାଥୀଙ୍କ ଠାରୁ ଧାର ଆଣିଥିଲେ । ପ୍ରାୟ ୫୦ ଲକ୍ଷ ଟଙ୍କା ରୁଣ ଭାରରେ ବୁଡ଼ିଯାଇଥିଲେ ସୌମିତ୍ର । ଏଥିରୁ ଜମି ବିକି ତାଙ୍କ ବାପା ପ୍ରାୟ ୨୦ ଲକ୍ଷ ଟଙ୍କା ଶୁଝିଦେଇଥିଲେ ।
ଆତ୍ମହତ୍ୟା ପୂର୍ବରୁ ନିଜ ପରିବାର ଲୋକଙ୍କ ସହ ଜଳେଶ୍ୱର ଥାନା ଆଇଆଇସିଙ୍କୁ ଚିଠି ଲେଖିଛନ୍ତି ସୌମିତ୍ର । ଏହି ଚିଠିରେ ସେ ଟଙ୍କା ଧାର ନେଇଥିବା କଥା ମାନିଛନ୍ତି । ଗତ ୧୧ ତରିଖରେ ସୌମିତ୍ରଙ୍କ ନାଁରେ ଭୁବନେଶ୍ୱରର ଜଣେ ଯୁବକ ଥାନାରେ ଟଙ୍କା ଧାର ନେଇ ଫେରାଉନଥିବା ଅଭିଯୋଗ କରିଥିଲେ । ଏହାପରେ ଜଳେଶ୍ୱର ପୁଲିସ ସୌମିତ୍ରଙ୍କୁ ଥାନାକୁ ଡାକିବା ସହିତ ତାଙ୍କ ମୋବାଇଲ ଓ ଲାପଟପ ଜବତ କରିଥିଲା । ଥାନାରୁ ଫେରିବା ପରେ ସୌମିତ୍ର ମାନସିକ ଚାପଗ୍ରସ୍ଥ ଥିଲେ । ମଙ୍ଗଳବାର ସକାଳେ ବିଷ ପିଇ ଦେଇଥିଲେ ସୌମିତ୍ର । ଚିକିତ୍ସା ପାଇଁ ତାଙ୍କୁ ପ୍ରଥମେ ଜଳେଶ୍ୱର, ପରେ ବାଲେଶ୍ୱର ଏବଂ କଟକ ଏସସିବିକୁ ଅଣାଯାଇଥିଲେ ବି ବଞ୍ଚାଯାଇପାରିନଥିଲା ।