କନକ ବ୍ୟୁରୋ: କଂସ ମରିଲା, ଯାତ୍ରା ସରିଲା । ଦୀର୍ଘ ଦିନ ଧରି ମୁକ୍ତାକାଶ ରଙ୍ଗ ମଂଚରେ ଚାଲିଥିବା ବରଗଡର ବିଶ୍ୱପ୍ରସିଦ୍ଧ ଧନୁଯାତ୍ରା ଶୁକ୍ରବାର ଉଦ୍ୟାପିତ ହୋଇଛି । ଉଦ୍ୟାପନୀ ଦିବସରେ କୃଷ୍ଣ ବଳରାମ ମଥୁରା ଭ୍ରମଣ କରିବା ସହ ଶେଷରେ କଂସ ଦରବାରରେ ପହଂଚିଥିଲେ । କଂସ ଦରବାରରେ କୁବଳୟା ବଧ. ଅଷ୍ଟମଲ୍ଲ ବଧ ପରେ ଶିବ ଧନୁ ଭାଙ୍ଗି ଥିଲେ । ଆଉ ଏହା ପରେ ପଡିଥିଲା ମହାରାଜ କଂସଙ୍କ ପାଳି । ମହାପ୍ରଭୁଙ୍କୁ ଦେଖି ମଥୁରା ନରେଶ ହୋସ୍ ଉଡିଯାଇଥିଲା ଆଉ ଶେଷରେ ମଂଚରୁ ପଡି ମାମୁ କଂସର ମୃତ୍ୟୁ ହୋଇଛି ।

Advertisment

କଂସବଧ ପରେ ଉଗ୍ରସେନଙ୍କୁ ମଥୁରାର ରାଜା ଭାବେ ପୁଣି ଥରେ ଅବସ୍ଥାପିତ କରିଛନ୍ତି କୃଷ୍ଣ ବଳରାମ ।ଆଜି କଂସ ଭୂମିକାରେ ଅଭିନୟ କରୁଥିବା ଅଭିନେତା ଭୁବନେଶ୍ୱର ପ୍ରଧାନ ପୁରୀ ଆସି ମହୋଦଧିରେ ସ୍ନାନ କରିବା ପରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ କରିବେ । ପରମ୍ପରା ଅନୁସାରେ କଂସ ଭୂମିକାରେ ଥିବା ବେଳେ ସେ ମହାପ୍ରଭୁଙ୍କ ବିଷୟରେ କଟୁ ଭାଷା ପ୍ରୟୋଗ କରିଥିବାରୁ ଶ୍ରୀଜୀଉଙ୍କ ନିକଟରେ କ୍ଷମା ପ୍ରାର୍ଥନା କରିବେ ।