ମୋବାଇଲରେ ବାଜୁଛି ଆଲାର୍ମ । ଥରି ଉଠୁଛି ଫୋନ । ସ୍କ୍ରିନରେ ସତର୍କ ସୂଚନା, ପ୍ରାକୃତିକ ବିପର୍ଯ୍ୟୟ ପୂର୍ବରୁ ଆସିବ ମେସେଜ

କନକ ବ୍ୟୁରୋ: ଓଡିଶାର ମୋବାଇଲ ବ୍ୟବହାରକାରୀଙ୍କ ନିକଟକୁ ଦିନ ତମାମ ଆସିଥିଲା ଜରୁରୀକାଳୀନ ସତର୍କ ସୂଚନାର ବାର୍ତ୍ତା । ଉଭୟ ଓଡିଆ ଓ ଇଂରାଜୀରେ ଆସିଥିଲା ବାର୍ତ୍ତା । ମେସେଜ ଆସିବା କ୍ଷଣି ସାଇରନ୍ ବାଜିବା ଭଳି କିଛି ଶବ୍ଦ କରିଥିଲା । ମୋବାଇଲ୍ ଭ୍ରାଇବ୍ରେସନ ହୋଇଥିଲା । ଯେଉଁଥିରେ ଲାଲ ରଙ୍ଗର ଏମରଜେନ୍ସି ଆଲଟ ର୍ ସହିତ ଏକ୍ସଟ୍ରିମ୍ ବୋଲି ଉଲ୍ଲେଖ ରହିଥିଲା । ଗୋଟିଏ ଗୋଟିଏ ମୋବାଇଲକୁ ପ୍ରାୟ ୨ରୁ ୪ଥର ମେସେଜ ଆସିଥିଲା । ଏଭଳି ମେସେଜ୍ ଦେଖି ଲୋକେ ବ୍ୟତିବ୍ୟସ୍ତ ହୋଇପଡିଥିଲେ । ଯିଏ ଯେଉଁଠି ଥିଲେ ସେହି ସ୍ଥାନରେ ଅଟକି ଯାଇଥିଲେ । ଏହି ଖବର ସୋସିଆଲ ମିଡିଆରେ ଟ୍ରେଣ୍ଡ କରିଥିଲା । ମୋବାଇଲ ବ୍ୟବହାରକାରୀ ସ୍କ୍ରିନସଟ୍ ମାରି ସୋସିଆଲ ମିଡିଆରେ ପୋଷ୍ଟ କରିଥିଲେ ।

ତେବେ ମୋବାଇଲରେ ଏଭଳି ମେସେଜକୁ ନେଇ ଲୋକେ ଡରି ଯାଇଥିବାବେଳେ, ଭୟଭୀତ ନହେବାକୁ ପରାମର୍ଶ ଦେଇଛି ଭାରତ ଦୂର ସଂଚାର ବିଭାଗ । ବିଜ୍ଞପ୍ତି ଜାରି କରି କହିଥିଲା, ଏହା ଏକ ସେଲ୍ ବ୍ରଡକାଷ୍ଟ ଆଲର୍ଟ ସିଷ୍ଟମର ଟେଷ୍ଟିଂ ପ୍ରକ୍ରିୟା । ବିପର୍ଯ୍ୟୟବେଳେ ଗୋଟିଏ କ୍ଲିକରେ ସବୁ ନାଗରିକଙ୍କ ପାଖରେ ପହଁଚିବ ସତର୍କ ସୂଚନା । ଦେଶର ନାଗରିକଙ୍କୁ ଆଲର୍ଟ କରିବାକୁ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ପକ୍ଷରୁ ଏହି ନୂଆ ପଦକ୍ଷେପ ନିଆଯାଇଛି ।

• ପ୍ରାକୃତିକ ବିପର୍ଯ୍ୟୟ ପୂର୍ବରୁ ଆସିବ ମେସେଜ
• ବଡ଼ ଦୁର୍ଘଟଣା ପୂର୍ବରୁ ମିଳିବ ବଡ଼ ସତର୍କ ସୂଚନା

ଜଳବାୟୁ ପରିବର୍ତନ ଯୋଗୁଁ ବିିଭିନ୍ନ ସମୟରେ ବଡ ବଡ ବିପଦ ଆସୁଛି । କ୍ଷୟକ୍ଷତି ହେଉଛି । ହଜାର ହଜାର ଲୋକଙ୍କ ଜୀବନ ଯାଉଛି । ତେଣୁ ଯେତେବେଳେ ଦେଶରେ କୌଣସି ପ୍ରାକୃତିକ ବିପର୍ଯ୍ୟୟ ଆସୁଛି ତା ପୂର୍ବରୁ ଏହି ବ୍ୟବସ୍ଥା ଦ୍ୱାରା ଲୋକଙ୍କୁ ଆଗୁଆ ସତର୍କ କରି ଦିଆଯିବ । ବିଶେଷ କରି ସୁନାମୀ, ଭୂମିକମ୍ପ, ବଜ୍ରପାତ ସମ୍ପର୍କରେ ଲୋକଙ୍କୁ ଆଗୁଆ ଆଲର୍ଟ କରାଯିବ ।

ଅଗଷ୍ଟ ମାସରୁ ଆରମ୍ଭ ହୋଇଥିବା ଏହି ପରୀକ୍ଷା ଏପର୍ଯ୍ୟନ୍ତ ୬ ଥର ହୋଇଛି । ଏବଂ ନଭେମ୍ବର ପହିଲାରୁ ଏହି ଆଲର୍ଟ ବ୍ୟବସ୍ଥାକୁ କାର୍ଯ୍ୟକାରୀ କରିବାକୁ କେନ୍ଦ୍ର ସରକାର ଲକ୍ଷ୍ୟ ରଖିଛନ୍ତି ।