କନକ ବ୍ୟୁରୋ: ସତ ମାନିଲେ ଲୋକପ୍ରିୟ ୟୁଟ୍ୟୁବର । ରେଭ ପାର୍ଟିରେ ଯୋଗାଉଥିଲେ ସାପ ଓ ସାପ ବିଷ । ଗିରଫ ପରେ ଜେରାରେ ସତ ମାନିଛନ୍ତି ଏଲଭିସ ଯାଦବ । ରବିବାର ଏଲଭିସ ଯାଦବ ଗିରଫ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ରେଭ୍ ପାର୍ଟିରେ ସାପ ଏବଂ ସାପ ବିଷ ବାଂଟିବା ନେଇ ପୋଲିସ ହାତରେ ଧରାପଡିବା ପରେ ସତ ମାନିଛନ୍ତି ବିଗବସ୍ ଓଟିଟି-୨ର ବିଜେତା ତଥା ୟ୍ୟୁଟୁବର ଏଲଭିସ୍ ଯାଦବ । ରବିବାର ଏଲଭିସଙ୍କୁ ଗିରଫ କରିଥିଲା ନୋଏଡା ପୋଲିସ । କୋର୍ଟରେ ହାଜର କରି ଅଧିକ ପଚରା ଉଚରା କରିବା ସମୟରେ ସାପ ଓ ଏହାର ବିଷ ବାଂଟିବା ନେଇ ସେ ସତ ମାନିଥିବା ଜଣାପଡିଛି । ଏହି ମାମଲାରେ ପୂର୍ବରୁ ଗିରଫ ହୋଇ ସାରିଥିବା ଅନ୍ୟ ଅଭିଯୁକ୍ତ ମାନଙ୍କ ସହ ଏଲଭିସ୍ ସମ୍ପର୍କରେ ରହିଥିଲେ, ୨୦୨୩ ନଭେମ୍ବରରେ ଅନୁଷ୍ଠିତ ରେଭ ପାର୍ଟିରେ ସେ ନିଜେ ହିଁ ସାପ ଏବଂ ସାପ ବିଷ ବାଂଟିଥିବା ସ୍ୱୀକାର କରଛନ୍ତି । ଏଲଭିସଙ୍କ ବିରୋଧରେ ଏନଡିପିଏସ ଆକ୍ଟର ଧାରା ୨୯ ଏବଂ ୱାଇଲଡ୍ ଲାଇଫ ପ୍ରୋଟେକ୍ସନ ଆକ୍ଟ ଅନୁଯାୟୀ ମାମଲା ରୁଜୁ କରାଯାଇଛି । ୧୪ଦିନ ଲାଗି ଏଲଭିସଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି କୋର୍ଟ ।
୨୦୨୩ ନଭେମ୍ବରରେ ଏକ ରେଭ୍ ପାର୍ଟିରେ ଏଲଭିସ୍ ଯାଦବ ସହଯୋଗୀ ମାନଙ୍କ ସହ ବେକରେ ସାପ ଗୁଡାଇ ନାଚୁଥିବାର ଭିଡ଼ିଓ ସାମ୍ନାକୁ ଆସିଥିଲା । ଏହି ଭିଡ଼ିଓ ଭାଇରାଲ ହେବା ପରେ ପୋଲିସର ରାଡାରକୁ ଆସିଥିଲେ ଏଲଭିସ ଆଣ୍ଡ କୋ । ସାଂସଦ ମେନକା ଗାନ୍ଧୀଙ୍କ ପିପୁଲ୍ସ ଫର୍ ଆନିମଲ ସଂଗଠନ ପକ୍ଷରୁ ମଧ୍ୟ ପାର୍ଟିରେ ସାପ ବିଷ ବ୍ୟବହାର ହୋଇଥିବା ନେଇ ଥାନାରେ ଅଭିଯୋଗ କରାଯାଇଥିଲା । ୫୫ରୁ ଉଦ୍ଧ୍ୱର୍ ସ୍ଥାନରେ ଚଢାଉ କରିବା ସହିତ ୫ଜଣ ଅଭିଯୁକ୍ତଙ୍କୁ ଗିରଫ କରିଥିଲା ପୋଲିସ । ଅଭିଯୁକ୍ତ ମାନଙ୍କ ଠାରୁ ୯ଜୀବନ୍ତ ସାପ ସହିତ ସାପର ବିଷ ମଧ୍ୟ ଜବତ ହୋଇଥିଲା । ତେବେ ବାରମ୍ବାର ମିଛ କହି ଖସି ଯାଉଥିବା ୟ୍ୟୁଟୁବର ଏଲଭିସ ଶେଷରେ ପୋଲିସ ହାତରେ ଧରାପଡିବା ସହିତ ନିଜ କଳା କାରନାମା ନେଇ ସତ ମାନିଛନ୍ତି ।