ଏଲୋନ୍ ମସ୍କ ଭାରତରେ ସାଟେଲାଇଟ ଇଣ୍ଟରନେଟ ସେବା ଆରମ୍ଭ କରିବାକୁ ଯାଉଛନ୍ତି
ଏଆରଟେଲ ଓ ଜିଓ ପାଇଁ ମୁଣ୍ଡବିନ୍ଧାର କାରଣ
ଏଲୋନ୍ ମସ୍କଙ୍କ ସାଟେଲାଇଟ ଇଣ୍ଟରନେଟ୍ ସେବା କମ୍ପାନୀ ‘ଷ୍ଟାରଲିଙ୍କ’ ଭାରତରେ ପ୍ରବେଶ କରିବାକୁ ଯାଉଛି । ପୂର୍ବରୁ ଲାଇସେନ୍ସ ଅଭାବରୁ କମ୍ପାନୀ ଉପରେ ପ୍ରତିବନ୍ଧକ ଲଗାଯାଇଥିଲା । ଷ୍ଟାରଲିଙ୍କ୍ ଜିଓ ଏବଂ ଏୟାରଟେଲ ଉଭୟଙ୍କ ପାଇଁ ଚିନ୍ତାର କାରଣ ହେଇପାରେ । କାରଣ ସେମାନେ ସାଟେଲାଇଟ ଇଣ୍ଟରନେଟ୍ ଦୌଡ଼ରେ ଅଛନ୍ତି । ଷ୍ଟାରଲିଙ୍କ ଟପ୍ ସ୍ପିଡ୍ 1.5 ରୁ 2Gbps ହୋଇପାରେ ଏବଂ ସବୁଠୁ ବଡକଥା ହେଲା ଏଥିପାଇଁ ମୋବାଇଲ୍ ଟାୱାର ଆବଶ୍ୟକ ପଡ଼ିବ ନାହିଁ । ଷ୍ଟାରଲିଙ୍କ ବର୍ତ୍ତମାନ ୪୦ ରୁ ଅଧିକ ଦେଶରେ କାର୍ଯ୍ୟକ୍ଷମ ଅଛି ।
Kanak News is now on WhatsApp
Join and get latest news updates delivered to you via WhatsApp
ସାଟେଲାଇଟ ଇଣ୍ଟରନେଟ୍ ସେବା ଯୋଗାଉଥିବା ଏଲୋନ୍ ମସ୍କଙ୍କ କମ୍ପାନୀ ‘ଷ୍ଟାରଲିଙ୍କ’ ଭାରତରେ ଖୁବ ଶୀଘ୍ର ଏହାର ସେବା ଯୋଗାଇବାକୁ ଯାଉଛି । ପୂର୍ବରୁ ବିନା ଲାଇସେନ୍ସରେ ସେବା ଆରମ୍ଭ କରିବା ପାଇଁ କମ୍ପାନୀ ଉପରେ ପ୍ରତିବନ୍ଧକ ଲଗାଯାଇଥିଲା । କିନ୍ତୁ ଏଥର ଏଥିପାଇଁ ଆବଶ୍ୟକୀୟ ସମସ୍ତ ସରକାରୀ ମନ୍ତ୍ରଣାଳୟର ଅନୁମୋଦନ ପାଇବା ପରେ ଏହି ସେବା ଆରମ୍ଭ କରିବାକୁ ପ୍ରସ୍ତୁତ ହେଉଛି । ଏହା ଜିଓ ଏବଂ ଏୟାରଟେଲ ପାଇଁ ମୁଣ୍ଡବିନ୍ଧାର କାରଣ ସାଜିଛି । କାରଣ ଉଭୟ ଏୟାରଟେଲ ଏବଂ ଜିଓ ସାଟେଲାଇଟ୍ ଇଣ୍ଟରନେଟ୍ ଦୌଡ଼ରେ ଅଛନ୍ତି । ଏୟାରଟେଲ ‘ୱାନ ୱେବ’ ସହ ସହଭାଗିତାରେ ଓ ଜିଓ ଲକ୍ସେମବର୍ଗ କମ୍ପାନୀ ‘SES’ ସହିତ ଉପଗ୍ରହ ସେବା ପାଇଁ ସହଭାଗୀତାରେ କାର୍ଯ୍ୟ କରୁଛନ୍ତି ।
ସ୍ପୀଡ କେତେ ରହିବ ?
ଷ୍ଟାରଲିଙ୍କର ସାଟେଲାଇଟ୍ ଇଣ୍ଟରନେଟ୍ ସେବାର ସର୍ବୋଚ୍ଚ ସ୍ପୀଡ 1.5 ରୁ 2 Gbps ହୋଇପାରେ ବୋଲି ଦାବି କରାଯାଉଛି । ‘ଷ୍ଟାରଲିଙ୍କ’ ଏହି ନାମରୁ ହିଁ ଆପଣମାନେ ଜାଣିପାରୁଥିବେ ଏହା ଏକ ଉପଗ୍ରହ ସେବା । ଏଥିପାଇଁ କୌଣସି ମୋବାଇଲ୍ ଟାୱାରର ଆବଶ୍ୟକତା ରହିବ ନାହିଁ । ଏହା ଦେଶର ଦୁର୍ଗମ ଅଞ୍ଚଳକୁ ସହଜରେ ଇଣ୍ଟରନେଟ୍ ଯୋଗାଇବାରେ ସାହାଯ୍ୟ କରିବ । ୪୦ ରୁ ଅଧିକ ଦେଶରେ ଷ୍ଟାରଲିଙ୍କ କାର୍ଯ୍ୟକ୍ଷମ । ଷ୍ଟାରଲିଙ୍କ ଏହାର ସେବାପାଇଁ ଏକ ୱାଇ-ଫାଇ ରାଉଟର, ବିଦ୍ୟୁତ୍ ଯୋଗାଣ, କେବୁଲ୍ ଏବଂ ଏକ ମାଉଣ୍ଟିଂ ଟ୍ରାଇପଡ଼ ଦେଇଥାଏ । ଏହି ରାଉଟର ସିଧା ଉପଗ୍ରହ ସହିତ ସଂଯୁକ୍ତ ହୁଏ ।
ଷ୍ଟାରଲିଙ୍କ୍କୁ କାହିଁକି ନିଷେଧ କରାଯାଇଥିଲା ?
ଷ୍ଟାରଲିଙ୍କ ୨୦୨୧ ମସିହାରେ ବିନା ଲାଇସେନ୍ସରେ ଏହି ସେବା ଆରମ୍ଭ କରିଥିଲା । ସେବା ଆରମ୍ଭ ପୂର୍ବରୁ ପ୍ରି-ଅର୍ଡର ଭାବରେ ଗ୍ରାହକଙ୍କଠାରୁ ସିକ୍ୟୁରିଟି ଟଙ୍କା ଜମା କରାଯାଇଥିଲା । ଭାରତ ସରକାରଙ୍କ ଠାରୁ ଅନୁମୋଦନ ନ ପାଇବା ପରେ ଏଲୋନ୍ ମସ୍କଙ୍କୁ ଏହି ପ୍ରକଳ୍ପ ବନ୍ଦ କରିବାକୁ ପଡିଥିଲା । ଏହା ବ୍ୟତୀତ ଭାରତୀୟ ଗ୍ରାହକଙ୍କ ଟଙ୍କା ମଧ୍ୟ ଫେରସ୍ତ କରିବାକୁ ପଡିଥିଲା ।