ନନ୍ଦନକାନନରେ ହାତୀ ମଡକ । ଆଖି ବୁଜିଲା ୭ ବର୍ଷର ମାଈ ହାତୀ ‘କମଳା’ । ଘାତକ ‘ହର୍ପିସ୍’ ଭୂତାଣୁ ସଂକ୍ରମଣରେ ମୃତ୍ୟୁ ଘଟିଥିବା ସୂଚନା
୨୫ ଦିନ ମଧ୍ୟରେ ନନ୍ଦନକାନନରେ ହେଲାଣି ୩ଟି ହାତୀଙ୍କର ମୃତ୍ୟୁ
କନକ ବ୍ୟୁରୋ: ନନ୍ଦନକାନନରେ ‘ହର୍ପିସ୍’ ଭୂତାଣୁ ଆତଙ୍କ । ଭୂତାଣୁ ଆକ୍ରମଣରେ ଆଉ ଏକ ହାତୀର ମୃତ୍ୟୁ । ଆଜି ୭ ବର୍ଷର ହାତୀ କମଳା ପ୍ରାଣ ହରାଇଛି । ‘ହର୍ପିସ୍’ ଭୂତାଣୁ ଯୋଗୁ ମାଇ ହାତୀ କମଳାର ମୃତ୍ୟୁ ହୋଇଥିବା ନନ୍ଦନକାନନ କର୍ତ୍ତୃପକ୍ଷ ସନ୍ଦେହ କରୁଛନ୍ତି । ଗତକାଲି ସଂଧ୍ୟାରୁ କମଳା ଅସୁସ୍ଥ ହୋଇପଡିଥିଲା । ତାକୁ ସୁସ୍ଥ କରିବା ପାଇଁ ପ୍ରାଣୀ ଉଦ୍ୟନର ଡାକ୍ତରୀ ଟିମ୍ ପ୍ରାଣପଣେ ଚେଷ୍ଟା କରିଥିଲେ, ହେଲେ ସେମାନେ କମଳାର ଜୀବନ ବଂଚାଇ ପାରିନାହାନ୍ତି । ‘ହର୍ପିସ୍’ ଭୂତାଣୁ ନନ୍ଦନକାନନର ଆଉ ଏକ ହାତୀର ଜୀବନ ନେଇଛି । ଗତ ୨୬ ଦିନ ଭିତରେ ନନ୍ଦନକାନନର ୩ଟି ହାତୀ ପ୍ରାଣ ହରାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଅର୍ଥାତ୍ ଅଗଷ୍ଟ ୨୫ ତାରିଖରେ ଆଉ ଏକ ମାଇ ହାତୀ ଜୁଲି ଏହି ଭୂତାଣୁର ଶିକାର ହୋଇ ମୃତ୍ୟୁ ବରଣ କରିଥିବା ବେଳେ ସେପ୍ଟମ୍ବର ୧୫ ତାରିଖରେ ନନ୍ଦନକାନନର ଦନ୍ତା ହାତୀ ଚନ୍ଦନ ବି ଆଖି ବୁଜି ସାରିଛି । ନନ୍ଦନକାନନରେ ପର୍ଯ୍ୟଟକଙ୍କ ମନମୋହୁଥିବା ହାତୀପଲରୁ ଗୋଟିଏ ପରେ ଗୋଟିଏ ହାତୀଙ୍କ ମୃତ୍ୟୁ ପ୍ରାଣୀ ଉଦ୍ୟାନ କର୍ତ୍ତୃପକ୍ଷଙ୍କୁ ଚିନ୍ତାରେ ପକାଇଛି । ‘ହର୍ପିସ୍’ ଭୂତାଣୁକୁ କିଭଳି ପ୍ରତିହତ କରାଯିବ ସେଥିପାଇଁ ଚିନ୍ତାରେ ପଡିଛନ୍ତି କର୍ତ୍ତୃପକ୍ଷ ।