କ୍ୟାପିଟାଲ ହସ୍ପିଟାଲକୁ ଆସିବ ଇଲେକ୍‌ଟ୍ରୋଫିଜିଓଲୋଜି ମେସିନ୍ । ସ୍ବୟଂସଂପୂର୍ଣ୍ଣ ହେବ ହୃଦ୍‌ରୋଗ ବିଭାଗ, ହୃଦ୍‌ରୋଗ ଚିକିତ୍ସା କ୍ଷେତ୍ରରେ ଆସିବ ସୁଧାର

ହୃଦ୍‌ରୋଗ ବିଭାଗରେ ଏବେ କ୍ୟାଥଲାବ ନିର୍ମାଣ କାର୍ଯ୍ୟ ଜାରି ରହିଛି। ଏଥିପାଇଁ ୧୫କୋଟିରୁ ଅଧିକ ଟଙ୍କା ଖର୍ଚ କରାଯିବ। ଆସନ୍ତା ୨/୩ମାସ ଭିତରେ କ୍ୟାଥଲାବ ପାଇଁ ମେସିନ୍ ଆସିବ। ଏହାସହ ଆଉ ଏକ କ୍ୟାଥଲାବ୍ ପାଇଁ ମଧ୍ୟ ହସ୍ପିଟାଲ କର୍ତୃପକ୍ଷ ଲକ୍ଷ୍ୟ ରଖିଛନ୍ତି। ହୃଦ୍‌ରୋଗ ବିଭାଗର ସ୍ବତନ୍ତ୍ର ଆଇସିୟୁ ନାହିଁ। ହୃଦ୍‌ରୋଗୀମାନଙ୍କୁ ଏଥିପାଇଁ ହସ୍ପିଟାଲର ରହିଥିବା ଆଇସିୟୁ ଉପରେ ନିର୍ଭର କରିବାକୁ ପଡ଼ୁଛି। ତେଣୁ ବିଭାଗର ସ୍ବତନ୍ତ୍ର ଆଇସିୟୁ ଉପରେ ଗୁରୁତ୍ବ ଦିଆଯାଇଛି। ସ୍ବତନ୍ତ୍ର ଆଇସିୟୁ ଓ ଗ୍ୟାସ୍ ପାଇପ ଲାଇନ କାର୍ଯ୍ୟ ଜାରି ରହିଛି।

ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସ ଓ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ରଙ୍କ ଉପସ୍ଥିତିରେ କ୍ୟାପିଟାଲ ହସ୍ପିଟାଲର ହୃଦ୍‌ରୋଗ ବିଭାଗର କାର୍ଯ୍ୟକାରିତା ସଂପର୍କରେ ସମୀକ୍ଷା କରାଯାଇଥିଲା। ହୃଦ୍‌ରୋଗ ବିଭାଗରେ ଏବେ ବହିର୍ବିଭାଗ ସହିତ କାର୍ଡିଓଲୋଜିକାଲ ଇନଭେଷ୍ଟିଗେସନ୍ ଯଥା ଇସିଜି, ଟୁ-ଡି ଇକୋ, ଟିଏମ୍‌ଟି ସେବା ଦିଆଯାଉଛି। ବିଭାଗରେ ଏବେ ୧୬ଟି ଶଯ୍ୟା ରହିଛି। କ୍ୟାଥଲାବ୍‌ରେ ଆଞ୍ଜିଓଗ୍ରାମ୍ ଓ ଆଞ୍ଜିଓପ୍ଲାଷ୍ଟ ଭଳି ନିଦାନ ବ୍ୟବସ୍ଥା ମଧ୍ୟ ଚାଲୁ ରହିଛି। ତେବେ କାର୍ଡିଓଲୋଜି ବିଭାଗ ସୁପର ସ୍ପେସାଲିଷ୍ଟ ବ୍ରାଞ୍ଚର ହୋଇଥିବା ବେଳେ ଇସିଜି, କ୍ୟାଥଲାବ, ଓଟି, ଆଇସିୟୁ ଓ ଇକୋ ଟେକ୍‌ନିସିଆନ୍ ପଦବି ପୂରଣ କରାଯିବାକୁ ନିଷ୍ପତ୍ତି ହୋଇଛି। ହସ୍ପିଟାଲର ହୃଦ୍‌ରୋଗ ବହିର୍ବିଭାଗରେ ୨୦୧୯ ମସିହାରେ ୧୫ ହଜାରରୁ ଅଧିକ ହୃଦ୍‌ରୋଗୀ ପଞ୍ଜୀକୃତ ହୋଇଥିବା ବେଳେ ଗତବର୍ଷ ଏହି ସଂଖ୍ୟା ରହିଛି ୧୬ହଜାର। ଦିନକୁ ଦିନ ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ବିଭାଗର ପରିସର ବୃଦ୍ଧି ପାଇଁ ଏବେ ଭିତ୍ତିଭୂମି ଉନ୍ନୟନ କାର୍ଯ୍ୟ ଚାଲୁ ରହିଛି।

ବୈଠକରେ ରାଜ୍ୟ ଔଷଧ ନିଗମର ପରିଚାଳନା ନିର୍ଦେଶିକା ଯାମିନୀ ଷଡ଼ଙ୍ଗୀ, କ୍ୟାପିଟାଲ ହସ୍ପିଟାଲର ହୃଦ୍‌ରୋଗ ବିଭାଗର ନିର୍ଦେଶକ ପ୍ରଫେସର ଡା.ପି.କେ ଦାସ, ଡିଏମ୍‌ଇଟି, ପୂର୍ତ ବିଭାଗର ଅଧୀକ୍ଷଣ ଯନ୍ତ୍ରୀ, ସ୍ବାସ୍ଥ୍ୟ ବିଭାଗର ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।