ଅପାରଗତା ଢାଙ୍କିବାକୁ କ୍ଷତି ଦର୍ଶାଉଛନ୍ତି ବିଦ୍ୟୁତ୍ ବିତରଣ କମ୍ପାନୀ । ପଡି ରହିଛି ୯ ହଜାର କୋଟିରୁ ଅଧିକ ଟଙ୍କା । ପୁଣି ବିଲ୍ ବୃଦ୍ଧି କରିବାକୁ ଗ୍ରୀଡକୋ ପାଖରେ ଆବେଦନ
କନକ ବ୍ୟୁରୋ : ବିଦ୍ୟୁତ ବିଭାଗର ଘରୋଇକରଣ ପରେ ସାଧାରଣ ଲୋକମାନେ ଧିରେ ଧିରେ ବିଜୁଳି ଚୋରୀରୁ ନିବୃତ୍ତ ହେଉଛନ୍ତି । ହେଲେ ଗ୍ରିଡକୋ ନିଯୁକ୍ତ କରିଥିବା ବିଦ୍ୟୁତ ବଣ୍ଟନକାରୀ ସଂସ୍ଥା ମାନେ ହଜାର ହଜାର କୋଟି ଟଙ୍କା ବକେୟା ଗ୍ରିଡକୋକୁ ଦେଉ ନାହାନ୍ତି । ଏହି ବକେୟାର ପରିମାଣ ୨୦୨୦ ମାର୍ଚ୍ଚ ମାସ ସୁଦ୍ଧା ୬୦୧୯ କୋଟି ଟଙ୍କା ଥିବା ବେଳେ ମାତ୍ର ୬ ମାସ ମଧ୍ୟରେ ଏହା ୮ ଶହ କୋଟି ଟଙ୍କା ବୃଦ୍ଧି ପାଇ ଏବେ ୯୮୦୩ କୋଟି ଟଙ୍କାରେ ପହଂଚିଲାଣି । ଫଳରେ ଆର୍ଥିକ ଦୃଷ୍ଟିରୁ ଗ୍ରୀଡକୋ ଦିନକୁ ଦିନ ଦୁର୍ବଳ ହେବାରେ ଲାଗିଛି । ଏହାର ଭରଣା ପାଇଁ ଗ୍ରୀଡକୋ ବାରମ୍ବାର ଓଇଆସି ବା (ଓଡିଶା ବିଦ୍ୟୁତ୍ ନିୟାମକ ଆୟୋଗ) ଙ୍କ ନିକଟରେ ଆବେଦନ କରୁଛି । ଏହା ଆଜିର ସମସ୍ୟା ନୁହେଁ ଅନେକ ବର୍ଷ ହେଲା ଗ୍ରୀଡକୋ ଏଭଳି ଆବେଦନ କରିଆସୁଛି ଓ ସମୟ ସୁବିଧା ଦେଖି ବିଦ୍ୟୁତ୍ ବିଲ୍ ବୃଦ୍ଧି କରାଇବାରେ ସଫଳ ମଧ୍ୟ ହେଉଛି । ଚଳିତ ଫେବୃଆରୀ ମାସରେ ଏଭଳି ଆବେଦନ ଉପରେ ବିଚାର କରି ଓଇଆରସି ବିଦ୍ୟୁତ୍ ବିଲ୍ ବୃଦ୍ଧି କରିଥିଲେ ବି ଏବେ ପୁଣିଥରେ ଓଇଆରସି ନିକଟରେ ଗ୍ରୀଡକୋ ବିଜୁଳି ଶୁଳ୍କ ବୃଦ୍ଧି ପାଇଁ ଆବେଦନ କରିଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
୨୦୨୦ ମସିହା ସେପ୍ଟେମ୍ବର ମାସ ୩୦ ତାରିଖ ସୁଦ୍ଧା ସେସୁ (ବର୍ତ୍ତମାନର ଟାଟା ପାୱାର) ଉପରେ ଗ୍ରୀଡକୋର ବକେୟା ରାଶି ୨୨୩୮.୫ କୋଟି ଟଙ୍କାରେ ପହଂଚିଛି । ଆପଣ ଜାଣିଲେ ଆଶ୍ଚର୍ଯ୍ୟ ହେବେ ସେସୁ ବାଦ ବିଦ୍ୟୁତ ବିତରଣ କରିବାକୁ ସରକାରଙ୍କ ଠାରୁ ଅନୁମତି ନେଇଥିବା ଟିପିସିଓଡିଏଲ ଉପରେ ମାତ୍ର କିଛି ମାସ ମଧ୍ୟରେ ୪୨୮.୩୨ କୋଟି ଟଙ୍କା ବକେୟା ପଡିଲାଣି । ଏହାସହ ନେସ୍କୋ ଉପରେ ଗ୍ରୀଡକୋର ୧୨୭୨.୬୩ କୋଟି, ୱେସ୍କୋ ଉପରେ ଗ୍ରୀଡକୋର ୧୪୬୭.୬୧ କୋଟି, ସାଉଥ୍ କୋ ଉପରେ ୧୩୯୬.୨୧ କୋଟି ଟଙ୍କା ପଡି ରହିଛି । ଏହାକୁ ମୋଟା ମୋଟି ହିସାବ କଲେ ବଦ୍ୟୁତ ବିତରଣ କମ୍ପାନୀ ମାନଙ୍କ ଉପରେ ଗ୍ରୀଡକୋର ମୋଟ ବକେୟା ପରିମାଣ ୬୮୦୦ କୋଟି ଅତିକ୍ରମ କରିବାକୁ ବସିଲାଣି ।
ଏବେ ଯଦି ଆପଣମାନେ ଦେଖିବେ ତେବେ ପ୍ରାୟ ଘରୋଇ କ୍ଷେତ୍ରରେ ବିଦ୍ୟୁତ ବ୍ୟବହାର କରୁଥିବା ଉପଭୋକ୍ତା ମାନେ ୯୦ ପ୍ରତିଶତ ବିଲ୍ ପୈଠ କରୁଛନ୍ତି । ତାହେଲେ ବିଲ୍ ପୈଠ କରିବାରେ ଅବହେଳା ସେହିମାନେ କରୁଛନ୍ତି ଯେଉଁ ମାନେ ମାସିକ ଲକ୍ଷ ଲକ୍ଷ ଟଙ୍କାର ବିଦ୍ୟୁତ୍ ବ୍ୟବହାର କରୁଛନ୍ତି । ଅନ୍ୟପଟେ ବିଦ୍ୟୁତ୍ ବଣ୍ଟକାରୀ ସଂସ୍ଥା ମାନେ ପରିଚାଳନା ଓ ପରିବହନ ଜନିତ କ୍ଷତି ଦର୍ଶାଇ ଗ୍ରୀଡକୋକୁ ବକେୟା ପଇଠ ନକରିବା ପଛରେ ରହିଛି ଏକ ବିଧିବଦ୍ଧ ଷଡଯନ୍ତ୍ର । ଗୋଟିଏ ପଟେ ବଡ ବଡ କମ୍ପାନୀ ଓ ଶିଳ୍ପ ମାନେ ବିଦ୍ୟୁତ ବିଲ୍ ପୈଠ କରୁ ନାହାନ୍ତି ଅନ୍ୟପଟେ ଏହି କ୍ଷତିର ଭରଣା ପାଇଁ ବିଜୁଳି ବଣ୍ଟନକାରୀ ସଂସ୍ଥା ମାନେ ବାରମ୍ବାର ଏହାକୁ ଦର୍ଶାଇ ଗ୍ରୀଡକୋ ମାଧ୍ୟମରେ ବିଲ୍ ବୃଦ୍ଧି ପାଇଁ ଓଇଆରସି ଉପରେ ଚାପ ପକାଇବାରେ ଲାଗିଛନ୍ତି । ବର୍ତ୍ତମାନ ବିଜୁଳି ବଣ୍ଟନ କମ୍ପାନୀ ମାନେ ଓଇଆରସି ନିକଟକରେ ୟୁନିଟ୍ ପିଛା ୨.୭୦ ଟଙ୍କା କୁ ବୃଦ୍ଧି କରି ୩.୯୩ ଟଙ୍କା କରାଯାଉ ବୋଲି ଆବେଦନ କରିଥିବା ଜଣାପଡିଛି ।
ମିଳିଥିବା ସୂଚନା ମୁତାବକ ଗତ ୨୦ ବର୍ଷ ମଧ୍ୟରେ ରାଜ୍ୟରେ ବିଜୁଳି ଉପଭୋକ୍ତାଙ୍କ ସଂଖ୍ୟା ୧୨ ଲକ୍ଷରୁ ବଢି ୬୭ ଲକ୍ଷରେ ପହଂଚିଛି । ହେଲେ ବିଜୁଳି ବଣ୍ଟନକାରୀ କମ୍ପାନୀ ମାନେ ବିଲ୍ ଆଦାୟ କରିବାରେ ବିଫଳ ହୋଇଛନ୍ତି । ସେମାନେ ବିଭିନ୍ନ ସମୟରେ ରାଜନେତାଙ୍କ ହସ୍ତକ୍ଷେପ ଯୋଗୁ ବଡ ବଡ କମ୍ପାନୀ ମାନଙ୍କ ଠାରୁ ଦେୟ ଆଦାୟ କରିପାରୁ ନାହାନ୍ତି । ଏହାସହ ରାଜନେତାଙ୍କ ଚାପ ରହିଥିବାରୁ ବିଦ୍ୟୁତ୍ ସଂଯୋଗ ବି ବିଛିନ୍ନ କରିପାରୁ ନାହାନ୍ତି ।
ଘରୋଇ ଉପଭୋକ୍ତାଙ୍କ ବ୍ୟତିତ ଏକ ବୃହତ ପରିମାଣର ବିଲ୍ ଶିଳ୍ପ ସଂସ୍ଥା ଓ ବ୍ୟବସାୟିକ ପ୍ରତିଷ୍ଠାନ ମାନଙ୍କ ଉପରେ ବାକି ରହିଛି । ଏହି ବାକିରଖିବା ସଂସ୍ଥା ମାନଙ୍କ ମଧ୍ୟରୁ ଅଧିକାଂଶ ଦେୟ ଦାବି ମାମଲା ଏବେ ଅଦାଲତରେ ଗଡୁଛି । ଅନ୍ୟପକ୍ଷରେ ନିଜର କ୍ଷତି ଭରଣା ଓ ଅପାରଗତାକୁ ଢାଙ୍କିବାକୁ ଯାଇ ଗ୍ରୀଡକୋକୁ ଢାଲ କରି ସାଧାରଣ ଘରୋଇ ଉପଭୋକ୍ତାଙ୍କ ମୁଣ୍ଡରେ ବୋଝ ଲଦିବାକୁ ପ୍ରୟାସ କରୁଛନ୍ତି ବିତରଣ କମ୍ପାନୀ ମାନେ ।