ଆସନ୍ତାକାଲି ଡେଡଲାଇନ ସରିବ, ୧୬ ସକାଳୁ ବିଦ୍ୟୁତ କାଟିବ ସେସୁ । ବିରୋଧୀ ଦେଲେ ଆନ୍ଦୋଳନ ଧମକ ।
କନକ ବ୍ୟୁରୋ : ଆପଣ ବକେୟା ବିଜୁଳି ବିଲ୍ ଦେଇନାହାଁନ୍ତି କି । ଯଦି ଦେବାକୁ ଚାହୁଁଛନ୍ତି, ତେବେ ଆସନ୍ତାକାଲି ଆପଣଙ୍କ ପାଇଁ ଶେଷ ଦିନ । କାରଣ, ଆସନ୍ତାକାଲି ସୁଦ୍ଧା ବକେୟା ନଦେଲେ ପରଦିନ ଅର୍ଥାତ୍ ୧୬ ତାରିଖରୁ ବିଜୁଳି କାଟିଦିଆଯିବ । ୪୧୩ଟି ସ୍କ୍ୱାର୍ଡ ସହ ୯ଟି ଜିଲ୍ଲାରେ ବକେୟା ରଖିଥିବା ଉପଭୋକ୍ତାଙ୍କ ବିଜୁଳି କାଟିବାକୁ ପ୍ରସ୍ତୁତ ହୋଇଛି ସେସୁ । ୧୬ ତାରିଖ ସକାଳୁ ଆରମ୍ଭ ହେବ ସେସୁର ବିଜୁଳି କଟା ଅଭିଯାନ ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମେ ଡେଡଲାଇନ୍ ଏବଂ ପରେ ବାରମ୍ବାର ସଚେତନ କରିବା ପରେ ଏବେ ବିଜୁଳି କାଟିବାକୁ ଅଂଟା ଭିଡିଲା ସେସୁ । ସମୟ ସୀମା ଅର୍ଥାତ୍ ୧୫ ତାରିଖ ସୁଦ୍ଧା ବକେୟା ନଦେଲେ ୧୬ ତାରିଖରୁ କଟିିବ ବିଜୁଳି । ବକେୟା ରଖିଥିବା ବ୍ୟବସାୟିକ ପ୍ରତିଷ୍ଠାନର ବିଜୁଳି ପ୍ରଥମେ କଟାଯିବ । ତେବେ ଯେଉଁ ଘରୋଇ ଉପଭୋକ୍ତାଙ୍କ କ୍ଷମତା ଅଛି, ହେଲେ ବିଲ ଦେଉନାହାନ୍ତି ସେମାନଙ୍କ ବିଦ୍ୟୁତ ମଧ୍ୟ କାଟିଦେବ ସେସୁ ।
୧୬ ତାରିଖରୁ ଆରମ୍ଭ ହେବାକୁ ଥିବା ସେସୁର ଏହି ମେଗା ଅପରେସନରେ ୪୧୩ଟି ସ୍କ୍ୱାର୍ଡ ରାଜ୍ୟର ୯ଟି ଜିଲ୍ଲାରେ କାମ କରିବେ । ସେସୁ ପକ୍ଷରୁ ସ୍ପଷ୍ଟ କରାଯାଇଛି ଯେ, ସାରା ଗାଁରେ ବିଜୁଳି କାଟ୍ ହେବନି । କେବଳ ବକେୟା ରଖିଥିବା ଘର ଗୁଡିକର ବିଜୁଳି କଟାଯିବ । ଆଉ ଏହି ଘୋଷଣା ପରେ ଆଜି ବିଜୁଳି ବିଲ ପୈଠ କରିବାକୁ ଲମ୍ବା ଲାଇନ ଲଗାଇଥିଲେ ବିଦ୍ୟୁତ୍ ଉପଭୋକ୍ତା ।
ଉପଭୋକ୍ତାଙ୍କ ଠାରୁ ବିଜୁଳି ବିଲ୍ ବାବଦ ବକେୟା ଟଙ୍କା ଆଣିବାକୁ ସେସୁ କଡା ପଦକ୍ଷେପ ନେଉଥିବା ବେଳେ , ପ୍ରଶ୍ନ ଉଠାଇଛନ୍ତି ବିରୋଧୀ । କଂଗ୍ରେସ କହିଛି, ବିଜୁଳି କଟିଲେ, ଦଳ ରାଜରାସ୍ତାରେ ଆନ୍ଦୋଳନ କରିବ । ଏପରିକି ସେସୁ କର୍ମଚାରୀଙ୍କୁ ଗାଁ ଭିତରେ ପୂରାଇ ଦେବୁନି ବୋଲି ରୋକଠୋକ ଶୁଣାଇ ଦେଇଛି କଂଗ୍ରେସ । ବିଜେପି କହିଛି, ନିଷ୍ପତି ପ୍ରତ୍ୟାହାର କରି ସମାଧାନର ବାଟ ବାହାର କରାଯାଉ । ତେବେ ୧ହଜାର ୯୭୧ କୋଟି ଟଙ୍କାର ବିଜୁଳି ବିଲ୍ ବକେୟା ଥିବା କାରଣରୁ ଏଭଳି ଏକ କଡା ନିଷ୍ପତି ନେଇଛି ସେସୁ । ତେଣୁ ଡେଡଲାଇନ ପୂର୍ବରୁ ସମସ୍ତଙ୍କୁ ବିଜୁଳି ବିଲ୍ ପୈଠ କରିବାକୁ କହିଛି ସେସୁ ।