କୋଟିଆରେ ହେବ ନିର୍ବାଚନ: ସହମତି ଭିତିରେ ପ୍ରାର୍ଥୀ ଦେବା ପାଇଁ ଫେଲ ମାରିଲା ସର୍ବଦଳୀୟ ନେତାଙ୍କ ଉଦ୍ୟମ
କନକ ବ୍ୟୁରୋ: ସର୍ବଦଳୀୟ ପ୍ରାର୍ଥୀ ମମତା ଯାନୀ, ସ୍ୱାଧୀନ ପ୍ରାର୍ଥୀ ଟିକାଇ ଗେମେଲ୍ । କୋଟିଆରେ ଜିଲ୍ଲା ପରିଷଦ ପାଇଁ ଏହି ଦୁଇ ପ୍ରାର୍ଥୀଙ୍କ ମଧ୍ୟରେ ହେବ ଲଢ଼େଇ । କୋଟିଆରେ ସହମତି ଭିତିରେ ପ୍ରାର୍ଥୀ ଦେବା ପାଇଁ ସର୍ବଦଳୀୟ ନେତାଙ୍କ ଉଦ୍ୟମ ଫେଲ ମାରିଛି । ସର୍ବଦଳୀୟ ନେତାଙ୍କ ସମ୍ମତିରେ ମମତା ଯାନୀ ପ୍ରାର୍ଥୀପତ୍ର ଦାଖଲ କରିଥିଲେ । ଏହାପରେ ସ୍ୱାଧୀନ ପ୍ରାର୍ଥୀ ଭାବେ ଟିକାଇ ଗେମେଲ ଓ ସବିନା ଗୁଡିଆ ମଧ୍ୟ ନାମାଙ୍କନ ଦାଖଲ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
କୋଟିଆକୁ କବ୍ଜା କରିବାକୁ ଆନ୍ଧ୍ରର ଷଡ଼ଯନ୍ତ୍ରକୁ ଭଣ୍ଡୁର କରିବା ପାଇଁ ପାର୍ଟି ନୁହେଁ ମାଟି ଆଗ ନ୍ୟାୟରେ ଏକାଠି ହୋଇଥିଲେ ସବୁ ଦଳର ନେତା । ନିର୍ବାଚନ ନକରି ସହମତି ଭିତିରେ ଜିଲ୍ଲା ପରିଷଦ ସଦସ୍ୟ ଚୟନ ପାଇଁ ଉଦ୍ୟମ ହୋଇଥିଲା । ଦୁଇ ଦିନର କସରତ ପରେ ସ୍ୱାଧୀନ ପ୍ରାର୍ଥୀ ସବିନା ଗୁଡିଆ ପ୍ରାର୍ଥୀପତ୍ର ପ୍ରତ୍ୟାହାର କରିନେଇଥିଲେ । ହେଲେ ଟିକାଇ ଗେମେଲ ପ୍ରାର୍ଥୀପତ୍ର ପ୍ରତ୍ୟାହାର ନକରିବାରୁ, ଦୁଇ ପ୍ରାର୍ଥୀଙ୍କ ମଧ୍ୟରେ ହେବ ଟକ୍କର ।
ଅଭିଯୋଗ ହୋଇଛି, ଆନ୍ଧ୍ରର ଦଲାଲ୍ ଓ ଏଜେଂଟଙ୍କ କଥାରେ ପ୍ରାର୍ଥୀତ୍ୱରୁ ଓହରିଲେ ନାହିଁ ସ୍ୱାଧୀନ ପ୍ରାର୍ଥୀ ଟିକାଇ ଗେମେଲ । ପ୍ରଥମେ ସେ କଂଗ୍ରେସ ସମର୍ଥିତ ପ୍ରାର୍ଥୀ ଥିଲେ । ପରେ ଆନ୍ଧ୍ର ଏଜେଂଟଙ୍କ ସମର୍ଥନ ତାଙ୍କ ପ୍ରତି ରହିଥବା କୁହାଯାଉଛି । ତେବେ ଆନ୍ଧ୍ରକୁ ଏହି ନିର୍ବାଚନରେ ଉଚିତ ଜବାବ ଦିଆଯିବ ବୋଲି କହିଛନ୍ତି ସର୍ବଦଳୀୟ ନେତା ।
ଚୟନ ଭିତିରେ ଜିଲ୍ଲା ପରିଷଦ ସଦସ୍ୟ ନିର୍ବାଚନ କରି ଆନ୍ଧ୍ରକୁ ଏକତାର ବାର୍ତା ଦେବାକୁ ଜୋରଦାର ଉଦ୍ୟମ କରାଯାଇଥିଲା । ମଙ୍ଗଳବାର ଦିନତମାମ କୋରାପୁଟର ନେତାମାନେ ବୈଠକ କରିଥିଲେ । ତେବେ ଶେଷ ମୁହୂର୍ତ ପର୍ଯ୍ୟନ୍ତ ସ୍ୱାଧୀନ ପ୍ରାର୍ଥୀ ଟିକାଇ ଗେମେଲଙ୍କୁ ମନାଇ ପାରିନଥିଲେ ।
ପୂର୍ବରୁ ଆନ୍ଧ୍ର ଅଗଣତାନ୍ତ୍ରିକ ଭାବେ ନିର୍ବାଚନ କରିସାରିଛି । କୋଟିଆ ପଂଚାୟତରେ ୧୩ଟି ୱାର୍ଡ ମେମ୍ବର, ଗୋଟିଏ ସରପଂଚ, ଗୋଟିଏ ସମିତି ସଭ୍ୟ ଓ ଗୋଟିଏ ଜିଲ୍ଲା ପରିଷଦ ପଦବୀ ରହିଛି । ସମିତି ସଭ୍ୟ ଅପ୍ରତିଦ୍ୱନ୍ଦୀ ଥିବା ବେଳେ ସଂରପଂଚ ପଦବୀ ପାଇଁ ୭ ଜଣ ମଇଦାନକୁ ଓହ୍ଲାଇଛନ୍ତି ।