ଓଡ଼ିଶାର ବିଭିନ୍ନ ସ୍ଥାନରେ ନିର୍ବାଚନୀ ହିଂସା । କେଉଁଠି ବୋମା ତ, କେଉଁଠି ବୁଲୁଛି ଖଣ୍ଡା । ଦକ୍ଷିଣରେ ଗଡ଼ିଲା ମୁଣ୍ଡ, ଉପକୂଳରେ ଫୁଟିଲା ବୋମା, ପଶ୍ଚିମରେ ପ୍ରାର୍ଥୀଙ୍କୁ ଅପହରଣ ଅଭିଯୋଗ
କନକ ବ୍ୟୁରୋ: ରାଜ୍ୟରେ ଜଳୁଛି ପ୍ରାକ୍ ନିର୍ବାଚନୀ ହିଂସାର ନିଆଁ । ପ୍ରଥମ ପର୍ଯ୍ୟାୟ ମତଦାନ ପରେ ନିର୍ବାଚନ ତାତି ଯେତିକି ବଢିଛି, ତାଠୁ ଢେର ଅଧିକ ହିଂସା ବଢିଛି । ଗଞ୍ଜାମରେ ମୁଣ୍ଡ ଗଡିଛି, ଟିଟିଲାଗଡ଼ରୁ ବିଧାୟକ ପ୍ରାର୍ଥୀଙ୍କୁ ଅପହରଣ କରାଯିବା ଭଳି ଅଭିଯୋଗ ଆସିଛି ଆଉ ରାଜଧାନୀର ଛାତି ଉପରେ ବୋମାମାଡ ହୋଇଛି । ସେପଟେ ଖଲ୍ଲିକୋଟ ହିଂସାକାଣ୍ଡ ଓ ହତ୍ୟା ଘଟଣାର ତଦନ୍ତ ପାଇଁ ଏସଆଇଟି ଗଠନ କରାଯାଇଛି । ଆଉ ନେତୃତ୍ୱ ଆଇପିଏସ୍ ଅଧିକାରୀ ଆରକେ ଶର୍ମାଙ୍କୁ ଦିଆଯାଇଛି । ଖଲ୍ଲିକୋଟ ଥାନାରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ସାରା ଦେଶରେ ଶାନ୍ତିପ୍ରିୟ ରାଜ୍ୟ ଭାବେ ପରିଚୟ ସୃଷ୍ଟି କରିଥିବା ଓଡ଼ିଶା ମୁଣ୍ଡରେ ଠିକ୍ ନିର୍ବାଚନ ସମୟରେ ଅପବାଦର ଦାଗ ଲାଗିଛି । କାଁ-ଭାଁ ଗୋଟିଏ ଦୁଇଟି ସ୍ଥାନରେ ହିଂସାକାଣ୍ଡ ଘଟିନି ବରଂ କେଉଁଠି ମୁଣ୍ଡ ଗଡ଼ିଛି, ତ ଆଉ କେଉଁଠି ବୋମା ଫୁଟିଛି । ଏମିତି କି ନିର୍ବାଚନରେ ପ୍ରାର୍ଥୀ ଥିବା ନେତାଙ୍କୁ ଅପହରଣ ପରେ ମାର୍ପିଟ୍ କରିଥିବା ଅଭିଯୋଗ ଆସିଛି ।
ଖଲ୍ଲିକୋଟରେ ଲାଗିଥିବା ହିଂସାର ନିଆଁ, ଏଯାଏଁ ଭିତରେ ଭିତରେ କୁହୁଳୁଛି । ଏଭଳି ସ୍ଥିତିରେ ଶ୍ରୀକୃଷ୍ଣଶରଣପୁର ଗାଁର ଗଳିକନ୍ଦିରେ ପଇଁତରା ମାରୁଛନ୍ତି ପୁଲିସ ଓ ଯବାନ । ଶାନ୍ତିଶୃଙ୍ଖଳା ଉପରେ ପୂରା ନଜର ରହିଥିବା ବେଳେ ପ୍ରାକ୍ ନିର୍ବାଚନୀ ହିଂସା ଘଟଣାରେ ଏପର୍ଯ୍ୟନ୍ତ ୯ଜଣଙ୍କୁ ଗିରଫ କରାଯାଇଛି । ଗିରଫ ବ୍ୟକ୍ତି ଜଣକ ହେଉଛନ୍ତି ରାମଚନ୍ଦ୍ରପୁର ଗାଁର ଜିତେନ୍ଦ୍ର ତରାଇ ।
ଏପଟେ ଖଲ୍ଲିକୋଟ ହିଂସାକାଣ୍ଡ ଓ ହତ୍ୟା ଘଟଣାର ତଦନ୍ତ ପାଇଁ ଗଠନ ହୋଇଛି ଏସଆଇଟି । ଏସଆଇଟି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରିବ । ମାମଲାରେ ଫେରାର ଥିବା ଅଭିଯୁକ୍ତଙ୍କୁ ଗିରଫ କରିବ । ସାଇନଟିଫିକ୍, ଫରେନସିକ୍ ଓ ଡିଜିଟାଲ ତଥ୍ୟ ଅଧାରରେ ତଦନ୍ତ କରିବ । ଆଉ ୩୦ ଦିନ ମଧ୍ୟରେ ଚାର୍ଜସିଟ୍ ଦାଖଲ କରିବ । ଆଉ ଏସ୍ଆଇଟି ଟିମର ନେତୃତ୍ୱ ନେବେ ଆଇପିଏସ୍ ଅଧିକାରୀ ଆର୍କେ ଶର୍ମା ।
ଅନ୍ୟପଟେ ଦକ୍ଷିଣର ନିର୍ବାଚନୀ ହିଂସାକୁ ନେଇ ଚର୍ଚ୍ଚା ଥମିନଥିବା ବେଳେ ପଶ୍ଚିମ ଓଡ଼ିଶାର ଟିଟିଲାଗଡ଼ରୁ ଆସିଛି ହିଂସାର ଖବର । ଟିଟିଲାଗଡ଼ ବିଜେପି ବିଧାୟକ ପ୍ରାର୍ଥୀ ନବୀନ ଜୈନଙ୍କୁ ଅପହରଣ ପରେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ସେହିପରି ତାଙ୍କ ସହଯୋଗୀ ଡୋଳାମଣି ବସ୍ତିଆ ଓ ଲବେନ୍ଦ୍ରଙ୍କୁ ଆକ୍ରମଣ କରି ଅପହରଣ କରାଯାଇଥିବା ଅଭିଯୋଗ ହୋଇଛି । ଏପଟେ ଉପକୂଳରେ, ରାଜଧାନୀର ଛାତି ଉପରେ ଫୁଟିଛି ବୋମା । ନୂଆପଲ୍ଲୀ ଗଡ଼ସାହି ବିଜେଡି ପାର୍ଟି ଅଫିସ୍ ସମ୍ମୁଖରେ ବୋମାମାଡ ହୋଇଛି । ଘଟଣାରେ କେହି ମୃତାହତ ହୋଇନାହାନ୍ତି । କିନ୍ତୁ ଗୋଟିଏ ବାଇକ୍ ସମ୍ପୂର୍ଣ୍ଣ ଜଳିଯାଇଛି । ଘଟଣାକୁ ନେଇ ନୂଆପଲ୍ଲୀରେ ଉତେଜନା ପ୍ରକାଶ ପାଇଛି । ଏହି ଘଟଣା ପରେ ପରବର୍ତ୍ତୀ ସମୟରେ ଆସି କିଛି ଦୁର୍ବୃତ୍ତ ମାରପିଟ୍ କରିଥିବା ଅଭିଯୋଗ ହୋଇଛି ।