ସରକାରୀ କଲେଜରେ ନିର୍ବାଚନୀ ସଭା । ଆଶାୟୀ ସରପଞ୍ଚ ପ୍ରାର୍ଥୀଙ୍କ ପାଇଁ ଭୋଟ ମାଗିଲେ ପ୍ରିନ୍ସପାଲ ଓ ପୋଲିସ ବାବୁ, ଭାଇରାଲ ହେଲା ଭିଡ଼ିଓ ।
କନକ ବ୍ୟୁରୋ : ତ୍ରିସ୍ତରୀୟ ପଂଚାୟତ ନିର୍ବାଚନ ପାଇଁ ଆଜିଠୁ ନାମାଙ୍କନପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇଛି । ପଞ୍ଚାୟତ ନିର୍ବାଚନ ପାଇଁ ସାରା ରାଜ୍ୟରେ ଆଚରଣବିିଧି ଲାଗୁ ହୋଇଛି । କିନ୍ତୁ ଏହାର ଖୋଲାଖୋଲି ଉଲ୍ଲଙ୍ଘନ ହେଉଥିବାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । କଲେଜ ଭିତରେ ସବୁ ଆଇନକୁ ଉଲ୍ଲଙ୍ଘନ କରି ନିର୍ବାଚନୀ ସଭା କରାଯାଇଛି । ଆଉ ଆଶାୟୀ ସରପଞ୍ଚ ପ୍ରାର୍ଥୀଙ୍କ ପାଇଁ ଭୋଟ ମାଗିଛନ୍ତି କଲେଜର ପ୍ରିନ୍ସିପାଲ ଓ ଏସଡିପିଓ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ମାର୍ଶାଘାଇ ଅଞ୍ଚଳ ତାରେଣୀ କଲେଜରୁ ଏକ ନିର୍ବାଚନ ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଖବର ଅନୁସାରେ, ପଞ୍ଚାୟତ ଭୋଟ ପାଇଁ କଲେଜରେ ଏକ ସଭାର ଆୟୋଜନ କରାଯାଇଥିଲା । ଆଉ ଏହାର ଆୟୋଜକ କଲେଜ ପ୍ରିନ୍ସିପାଲ ଓ ସାଲେପୁର ଏସଡିପିଓ ଥିବା ଅଭିଯୋଗ ହୋଇଛି । ଏପରିକି କଲେଜ ପରିସରରେ ଶହ ଶହ ଲୋକଙ୍କୁ ଏକାଠି କରି ଆଶାୟୀ ସରପଞ୍ଚ ପ୍ରାର୍ଥୀ ଭୋଟ ମାଗୁଥିବାର ଦେଖିବାକୁ ମିଳିଛି ।
ନିର୍ବାଚନ ସମୟରେ କୌଣସି ପ୍ରଚାର କିମ୍ବା ସଭା ହୋଇପାରିବନି ବୋଲି କୁହାଯାଇଥିବା ବେଳେ କିଭଳି ଶହ ଶହ ଲୋକଙ୍କୁ କଲେଜ ଭିତରକୁ ସଭା କରିବାକୁ ଅନୁମତି ମିଳିଥିଲା । ପ୍ରଥମେ ଏହାକୁ ବନ୍ଧୁ ମିଳନ ସଭା କହି ଖସିଯିବାକୁ ଚେଷ୍ଟା କରିଥିଲେ କଲେଜର ଅଧ୍ୟକ୍ଷ । କିନ୍ତୁ ଭିଡ଼ିଓ ସାମ୍ନାକୁ ଆସିବା ପରେ ସବୁ ସତ ପଦାକୁ ଆସିଥିଲା । କିନ୍ତୁ ପ୍ରଶ୍ନ ଉଠୁଛି କଲେଜରେ ଏଭଳି ସଭା କରିବାକୁ ପ୍ରିନ୍ସପାଲ କାହା ଠାରୁ ଅନୁମତି ଆଣିଥିଲେ? ସବୁଠାରୁ ବଡକଥା ହେଲା, ଦୁଇ ସରକାରୀ କର୍ମଚାରୀ କିଭଳି ଜଣେ ପ୍ରାର୍ଥୀଙ୍କ ପାଇଁ ଭୋଟ ମାଗିଲେ ତାହା ସମସ୍ତଙ୍କୁ ଚକିତ କରିଛି ।