ସିଦ୍ଦରମୈୟାଙ୍କ ସହ ସମ୍ପର୍କ ଛିନ୍ନ କରୁଛନ୍ତି କି ଶିବକୁମାର?

କନକ ବ୍ୟୁରୋ: କର୍ଣ୍ଣାଟକ ନାଟକରେ ପଡ଼ୁନି ପୂର୍ଣ୍ଣଚ୍ଛେଦ । କାରଣ ଏବେ ବି କର୍ଣ୍ଣାଟକ କଂଗ୍ରେସରେ ସବୁକିଛି ଠିକ୍ ନାହିଁ । ଗତକାଲି ମୁଖ୍ୟମନ୍ତ୍ରୀ ସିଦ୍ଦରମୈୟା ବିଧାନସୌଧରେ ଥିବା ତାଙ୍କ ଚ୍ୟାମ୍ବରରେ ସମସ୍ତ ଦଳୀୟ ବିଧାୟକଙ୍କ ସହ ଏକ ବୈଠକ କରିଥିଲେ । ୫୦ କୋଟି ଟଙ୍କାର ଅନୁଦାନ ଆବଣ୍ଟନ ନେଇ ଏହି ବୈଠକ ଡକାଯାଇଥିଲା । ତେବେ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ବୈଠକରେ ଯୋଗ ନଦେବାରୁ ଏହାକୁ ନେଇ ଏବେ ପ୍ରଶ୍ନ ଉଠିଛି । ଶିବକୁମାର ଅସୁସ୍ଥତା ପାଇଁ ବୈଠକରେ ଯୋଗ ଦେଇନାହାନ୍ତି କି ତାଙ୍କୁ ଅଣଦେଖା କରାଯାଇଛି ସେନେଇ ଚର୍ଚ୍ଚା ଚାଲିଛି ।

୨ ବରିଷ୍ଠ ନେତାଙ୍କ ମଧ୍ୟରେ ବିବାଦ ବଢ଼ିଥିବାର ଏହା ଏକ ଜ୍ବଳନ୍ତ ଉଦାହରଣ । କଂଗ୍ରେସର କର୍ଣ୍ଣାଟକ ପ୍ରଭାରୀ ରଣଦୀପ ସୂର୍ଯେୱାଲା ଏବଂ ଦଳର ବିଧାୟକମାନଙ୍କ ମଧ୍ୟରେ ବୈଠକ ହେବାପରେ ଏହି ଅନୁଦାନ ଘୋଷଣା କରାଯାଇଥିଲା । ଏହାପରେ ସିଦ୍ଦରମୈୟା ଏବଂ ଶିବକୁମାରଙ୍କ ସହ ଆଲୋଚନା କରାଯାଇଥିଲା । ସୂଚନାନୁଯାୟୀ ହାଇ କମାଣ୍ଡ ଉଭୟ ସିଦ୍ଦରମୈୟା ଏବଂ ଶିବକୁମାରଙ୍କୁ ନେତାମାନଙ୍କୁ ବିଶ୍ୱାସକୁ ନେବାପାଇଁ କହିଥିଲେ ବି ମୁଖ୍ୟମନ୍ତ୍ରୀ ଏହି ପ୍ରକ୍ରିୟାରେ ଶିବକୁମାରଙ୍କୁ ସାମିଲ ନକରି ବୈଠକରେ ଆଗକୁ ବଢ଼ିଥିଲେ ।

ଇତିମଧ୍ୟରେ ଗୃହମନ୍ତ୍ରୀ ଜି  ପରମେଶ୍ଵର ମୁଖ୍ୟମନ୍ତ୍ରୀଙ୍କ ନିଷ୍ପତ୍ତିକୁ ସମର୍ଥନ କରି ସ୍ପଷ୍ଟୀକରଣ ଦେଇଛନ୍ତି ଯେ ପୂର୍ବ କାର୍ଯ୍ୟକାଳରେ ମଧ୍ୟ ସମାନ ନିର୍ବାଚନମଣ୍ଡଳୀ ସ୍ତରୀୟ ବୈଠକ ହୋଇଥିଲା । ମୁଖ୍ୟମନ୍ତ୍ରୀ ଜିଲ୍ଲା ୱାରି ବିଧାୟକମାନଙ୍କୁ ଭେଟି କଥା ହେବେ । ବିଧାୟକମାନଙ୍କୁ ୫୦ କୋଟି ମଂଜୁର ହୋଇଛି । ଅନ୍ୟ ନିର୍ବାଚନମଣ୍ଡଳୀ ପ୍ରସଙ୍ଗ ଏବଂ ଦଳୀୟ ପ୍ରସଙ୍ଗ ମଧ୍ୟ ଏହି ସମୟରେ ଆଲୋଚନା ହେବା ସେ କହିଛନ୍ତି, ଏହା ନୂଆ ନୁହେଁ ଗତ କାର୍ଯ୍ୟକାଳରେ ମଧ୍ୟ ମୁଁ ରାଜ୍ୟ କଂଗ୍ରେସ କମିଟି ସଭାପତି ଥିବାବେଳେ ମୁଖ୍ୟମନ୍ତ୍ରୀ ପାର୍ଟି ଅଫିସକୁ ଆସିଥିଲେ ଏବଂ ଆମେ ସମସ୍ତ ବିଧାୟକଙ୍କୁ ଭେଟିଥିଲୁ ।

ପୂର୍ବରୁ କର୍ଣ୍ଣାଟକ ନେତୃତ୍ବ ପରିବର୍ତ୍ତନ ନେଇ ଝଡ଼ ଉଠିଥିଲା । ଏ ସମ୍ପର୍କରେ ଶୀର୍ଷ ନେତା ରାହୁଲ ଗାନ୍ଧୀ କିଛି ଉତ୍ତର ରଖିନାହାନ୍ତି । ସେଥିପାଇଁ ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ଅଲଗା ଅଲଗା ସାକ୍ଷାତ ଆଲୋଚନା ପାଇଁ ସମୟ ମାଗିଥିଲେ ମଧ୍ୟ ରାହୁଲ ଏହି ଦୁଇଜଣଙ୍କୁ ଭେଟି ନାହାନ୍ତି । ଅନ୍ୟପକ୍ଷରେ ରାଜ୍ୟକୁ ଫେରି କଂଗ୍ରେସ ପ୍ରତିଶ୍ରୁତି ଉପରେ କାମ କରିବାକୁ ଦୁଇଜଣଙ୍କୁ କର୍ଣ୍ଣାଟକ ସାଧାରଣ ସମ୍ପାଦକ ରଣଦୀପ ସୁର୍ଯେୱାଲାଙ୍କ ମାର୍ଫତ୍‌ରେ ନିର୍ଦ୍ଦେଶ ଦିଆଯାଇଥିଲା ।

ନେତୃତ୍ବ ପରିବର୍ତ୍ତନ ହେବ ନାହିଁ ବୋଲି ମୁଖ୍ୟମନ୍ତ୍ରୀ ସିଦ୍ଦରମୈୟା ବାରମ୍ବାର ସଫେଇ ଦେଉଛନ୍ତି । ଅନ୍ୟପକ୍ଷରେ ଉପମୁଖ୍ୟମନ୍ତ୍ରୀ ଡିକେ ଏ ସମ୍ପର୍କରେ ବାରମ୍ବାର କୌଣସି ମତାମତ ଦେବାକୁ ପଛାଉଛନ୍ତି । ମାତ୍ର ଦୁଇ ପ୍ରମୁଖ ନେତାଙ୍କ ଏଭଳି ମତ ସତ୍ତ୍ବେ ନେତୃତ୍ବ ପରିବର୍ତ୍ତନ ନେଇ ଦଳୀୟ ବିଧାୟକମାନେ ମତ ଦେବାକୁ ପଛାଉ ନାହାନ୍ତି । ଏଥିରେ  ଡିକେଙ୍କୁ ସମର୍ଥନ କରୁଥିବା ବିଧାୟକ ମାନେ ଆଗରେ ଅଛନ୍ତି । ହେଲେ ହାଇ କମାଣ୍ଡଙ୍କ ଚୁପ ରହିବା ସବୁ ଚର୍ଚ୍ଚାରେ ଯବନିକା ପକାଇଦେଇଛି ।