ରାହୁଲ ବନାମ ନିର୍ବାଚନ କମିସନ : ସବାଲ ଜବାବ ଜୋରଦାର

କନକ ବ୍ୟୁରୋ : କଂଗ୍ରେସ ନେତା ରାହୁଲ ଗାନ୍ଧୀ ଗତକାଲି ନୂଆଦିଲ୍ଲୀ ଏଆଇସିସି ଅଫିସରେ ଭୋଟ୍‌ ଚୋରି ଅଭିଯୋଗ କରିଥିଲେ । ବେଙ୍ଗାଲୁରୁ କେନ୍ଦ୍ରୀୟ ଲୋକସଭା ଆସନ ଅନ୍ତର୍ଗତ ମହାଦେବପୁରା ବିଧାନସଭା ନିର୍ବାଚନମଣ୍ଡଳୀରେ ଭୋଟ୍ ଚୋରି ଅଭିଯୋଗ କରିଥିଲେ ରାହୁଲ । ଆଜି ସେଠାରେ ହିଁ ଭୋଟର ଅଧିକାର ରାଲି କରି ପୁଣି ନିର୍ବାଚନ କମିସନ ଓ ବିଜେପିକୁ ଟାର୍ଗେଟ୍ କରିଛନ୍ତି । ନିର୍ବାଚନ କମିସନ ଓ ବିଜେପି ମିଳିମିଶି ଭୋଟ୍ ଚୋରି କରିଥିବା ପୁଣି ଅଭିଯୋଗ କରିଛନ୍ତି ରାହୁଲ । ଇଲେକ୍ଟ୍ରୋନିକ ଭୋଟର ତାଲିକା ଦେବା ପାଇଁ ରାହୁଲ ଦାବି କରିଛନ୍ତି ।

ଗତକାଲି ରାହୁଲଙ୍କ ଅଭିଯୋଗ ପରେ ସତ୍ୟପାଠ ସହ ଭୋଟ୍ ଚୋରିର ପ୍ରମାଣ ଦେବାକୁ ନହେଲେ  ଦେଶକୁ କ୍ଷମା ପ୍ରାର୍ଥନା କରିବାକୁ ନିର୍ବାଚନ କମିସନ କହିଥିଲେ । ଜବାବରେ ରାହୁଲ କହିଛନ୍ତି, ସମ୍ବିଧାନ ଉପରେ ସେ ସଂସଦରେ ଶପଥ ନେଇ ସାରିଛନ୍ତି ।  ଭୋଟ୍ ଚୋରି ଅଭିଯୋଗ ପ୍ରମାଣ କରିବାକୁ ରାହୁଲ ଆଜି କିଛି ଭିଡିଓ ସାମାଜିକ ଗଣମାଧ୍ୟମରେ ଛାଡ଼ିଥିବା ବେଳେ ଏନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି । କେବଳ କର୍ଣ୍ଣାଟକ ନୁହେଁ, ମହାରାଷ୍ଟ୍ର ସମେତ ବିଭିନ୍ନ ରାଜ୍ୟରେ ଭୋଟ୍ ଚୋରି ହୋଇଥିବା ଅଭିଯୋଗ କରିଆସୁଛନ୍ତି ରାହୁଲ ।  ବିହାର ଭୋଟର ତାଲିକା ସଂଶୋଧନ ନେଇ ମଧ୍ୟ ପ୍ରଶ୍ନ ଉଠାଇ ଆସୁଛନ୍ତି । ଏନେଇ ମୁହାଁମୁହିଁ ହୋଇଛନ୍ତି ରାହୁଲ ଓ ନିର୍ବାଚନ କମିସନ ।