ପାସବୁକ ପାଇଁ ୪୫ କିଲୋମିଟର ପଦଯାତ୍ରା: ଖାତା ଖୋଲିବାକୁ ତୁଳସୀ ଘାଟିରୁ ମାଥିଲି ସଦରକୁ ଚାଲି ଚାଲି ଆସିଛନ୍ତି ଘାଟି ମଣିଷ; ହାଡଭଙ୍ଗା ଶୀତରେ ଜଙ୍ଗଲ ରାସ୍ତାରେ ରାତି ବିତାଇଲେ ବୃଦ୍ଧବୃଦ୍ଧା

137

କନକ ବ୍ୟୁରୋ: ବ୍ୟାଙ୍କ ପାସବୁକ ପାଇଁ ୪୫ କିଲୋମିଟର ଯାତ୍ରା । ହାଡଭଙ୍ଗା ଶୀତରେ ଜଙ୍ଗଲ ରାସ୍ତାରେ ରାତି ବିତାଇଲେ ବୃଦ୍ଧ ବୃଦ୍ଧା । ମାଲକାନଗିରି ଜିଲା ମାଥିଲି ବ୍ଲକର ମାଓ ପ୍ରବଣ ତୁଳସୀ ଘାଟିରୁ ୧୫ରୁ ଅଧିକ ବୟସ୍କ ପୁରୁଷ, ମହିଳା ଏହିପରି ରାତି ବିତାଇଛନ୍ତି । ପାଦରେ ଚାଲି ଚାଲି ପାସବୁକ ଖୋଲିବା ପାଇଁ ସଦର କୁ ଚାଲି ଆସିଛନ୍ତି ଘାଟି ମଣିଷ । ପେନସନ କୁ ସରକାର ବାଧ୍ୟତାମୂଳକ ପାସବୁକ ସଂଯୋଗକରଣ କରିଥିବାରୁ ଭତା ନ ମିଳିବା ଭୟ ୪୫ କିଲୋମିଟର ରାସ୍ତାକୁ ଦେଖିନଥିଲା । ଚାଲି ଚାଲି ଆସିଥିଲେ ସତ କିନ୍ତୁ ମୋବାଇଲ ହାତରେ ନ ଥିବାରୁ ପାସବୁକ ନ ଦେଇ ଫେରାଇ ଦେଇଛି ବ୍ୟାଙ୍କ କତୃପକ୍ଷ । ଘାଟି ମଣିଷ ର ଯନ୍ତ୍ରଣା ବୁଝିବ କିଏ । ନିରାଶ ହୋଇ ଶେଷରେ ଜଙ୍ଗଲ ଆଶ୍ରୟ ନେଇଥିଲେ ବାର୍ଦ୍ଧକ୍ୟ ମଣିଷ ।

ଅଡୁଆ ବଢାଇଛି ବ୍ୟାଙ୍କ ପାସବୁକ । ପାସବୁକ ଲାଗି ୪୫ କିଲୋମିଟରର ଯାତ୍ରା । ତାହାପୁଣି ପାଦରେ ଚାଲି ଚାଲି ଆଗକୁ ବଢିବା ର ଦମ୍ଭ । ଘାଟି ମଣିଷ ପାଇଁ କଠୋର ହୋଇଛି ପେନସନ୍ ଯୋଜନା । ମାଲକାନଗିରି ଜିଲା ମାଥିଲି ବ୍ଲକ ଅନ୍ତର୍ଗତ ଦୁର୍ଗମ ତୁଳସୀ ଗାଁ ର ବୃଦ୍ଧବୃଦ୍ଧାମାନେ ବ୍ୟାଙ୍କ ପାସବୁକ ନ ଥିବାରୁ ପେନସନ କଟିଯିବା ଭୟରେ ଚାଲି ଆସିଛନ୍ତି ମାଥିଲି ସଦରକୁ । ହାତରେ ମାଣ୍ଡିଆ ପେଜ । ଦୁର୍ବଳ ଲାଗିଲେ ପେଜ ପିଇ ଚାଲିବାର ବାଟ । ସବୁ ଯନ୍ତ୍ରଣା ସବୁ ନିରାଶ କୁ ଭୁଲି ବ୍ୟାଙ୍କ କୁ ପହଂଚିଥିଲେ ଏମାନେ । କିନ୍ତୁ ହାତରେ ମୋବାଇଲ ନ ଥିବାରୁ ପାସବୁକ ହେବନି କହି ଫେରାଇ ଦେଇଛି ବ୍ୟାଙ୍କ । ଦୁର୍ଗମ ଗାଁର ପାହାଡି ମଣିଷ ଙ୍କ ହାତରେ ମୋବାଇଲ ଆସିବ କୁଆଡୁ । ହାତରେ ମୋବାଇଲ ଦେଖିଲେ ମାଓବାଦୀଙ୍କ ନିର୍ଯ୍ୟାତନା ବଢେ । ମୋବାଇଲ କିଣିବାକୁ ବି ଅସମର୍ଥ ଘାଟି ମଣିଷ । ଏପଟେ ମାଓବାଦୀ ଭୟ । ସେପଟେ ପେନସନ୍ କଟିଯିବାର ଚିନ୍ତା । ଦୋଛଳିରେ ପଡିଛନ୍ତି ଘାଟି ଅଂଚଳ ର ବାର୍ଦ୍ଧକ୍ୟ ଲୋକେ ।

ପାସବୁକ ଲାଗି ଆସିଥିବା ନିରୀହଙ୍କ ଦୃଃଖ ବୁଝିପାରୁନାହାନ୍ତି ସରକାରୀ ବାବୁ । ସରକାର ପେନସନ୍ ଦେବା ଲାଗି ବ୍ୟାଙ୍କ ପାସବୁକ କରିବାକୁ ବାଧ୍ୟତାମୂଳକ କରିଛନ୍ତି । ହେଲେ ମୋବାଇଲ ନ ଥିବାରୁ ହୋଇପାରିନି ପାସବୁକ ଖୋଲା । ବ୍ୟାଙ୍କ ର ନାକାରତ୍ମକ ବାଣୀ ଶୁଣିବା ପରେ ନିରାଶ ହୋଇଛନ୍ତି ତୁଳସୀ ବାସିନ୍ଦା । ଶେଷରେ ଉପାୟ ଶୂନ୍ୟ ବୃଦ୍ଧାବୃଦ୍ଧ ମାଥିଲି ଠାରୁ ୪ କି.ମି ଦୂର ଜଙ୍ଗଲ ରାସ୍ତା ପାଶ୍ୱରେ ହାଡଭଙ୍ଗା ଶୀତରେ ଆଶ୍ରୟ ନେଇଛନ୍ତି । ପାସବୁକ ପାଇବା ପାଇଁ ଘାଟି ମଣିଷ ଏହି ଯନ୍ତ୍ରଣା ହୁଏତ ସରକାରୀ ବାବୁଙ୍କ ଦୃଷ୍ଟି ଆଡୁଆଳରେ ରହିଯାଇଛି । ଏ ସମ୍ପର୍କରେ ମାଥିଲି ବିଡିଓ କହିଛନ୍ତି , ଘାଟି ଅଂଚଳ ର ପେନସନ୍ ହିତାଧିକାରୀଙ୍କ ଲାଗି ପାସବୁକ କରିବାକୁ ବ୍ୟାଙ୍କ ସହ ଆଲୋଚନବା କରି ପାସବୁକ ଯୋଗାଇ ଦିଆଯିବ । ତେବେ ପାସବୁକ ପାଇବା ପାଇ ଯନ୍ତ୍ରଣାକୁ ଭୁଲି ୪୫ କିମି ଚାଲି ଆସନ୍ତି ଏହି ନିରୀହ ଲୋକେ । ଘାଟି ଅଂଚଳ ର ପେନସନ ହିତାଧିକାରୀ ମୋବାଇଲ ନ ଥିଲେ କେମିତି ଖୋଲିବେ ପାସବୁକ । ପାସବୁକ ଜରିଆରେ ପେନସନ୍ ଯୋଗାଇଲେ ବାଦ ପଡିଯିବେନି ତ ଘାଟି ଅଂଚଳର ମଣିଷ ।

Comments are closed.