ଯୁବଚାଷୀଙ୍କୁ ରୋଜଗାର ଦେଉଛି ଅଣ୍ଡା ଦିଆ କୁକୁଡା ଫାର୍ମ । କଳିଙ୍ଗ ବ୍ରାଉନ୍ ପ୍ରଜାତିର କୁକୁଡା ଚାଷ କରିଛନ୍ତି ପ୍ରଦୀପ ବେହେରା ।

କନକ ବ୍ୟୁରୋ: ଅଣ୍ଡା ଦିଆ କୁକୁଡା ଫାର୍ମ ପ୍ରତିଷ୍ଠା କରି ହୋଇପାରିଛନ୍ତି ଆତ୍ମନିର୍ଭରଶୀଳ ଆଉ ରୋଜଗାର କରୁଛନ୍ତି ବାର୍ଷିକ ଲକ୍ଷାଧିକ ଟଙ୍କା । ଫାର୍ମ ପ୍ରତିଷ୍ଠା ପାଇଁ ହାତରେ ଅର୍ଥ ନଥିବାରୁ ସରକାରୀ ଯୋଜନାରେ ଅର୍ନ୍ତଭୁକ୍ତ ହୋଇ ରୁଣ ଆଣିବା ସହିତ ଏହାର ସଦୁପଯୋଗ କରି ହୋଇ ପରିଛନ୍ତି ଜଣେ ସଫଳ କୁକୁଡା ଚାଷୀ ।

କେନ୍ଦ୍ରାପଡା ଜିଲ୍ଲା ମାର୍ଶାଘାଈ ବ୍ଲକ ବନ୍ଧକଟା ଗ୍ରାମର ପ୍ରଦୀପ ବେହେରା ପ୍ରଥମେ ଏକ ଚିକେନ ସେଣ୍ଟର କରି ନିଜର ଗୁଜୁରାଣ ମେଣ୍ଟାଉଥିବା ବେଳେ ଆଗକୁ ବଢିବାକୁ ତାଙ୍କ ମନରେ ଥିଲା ପ୍ରବଳ ଇଛା । ଏକ କୁକୁଡା ଫାର୍ମ ପ୍ରତିଷ୍ଠା କରିବା ପାଇଁ ତାଙ୍କ ମନରେ ସ୍ୱପ୍ନ ଥିବା ବେଳେ ଅର୍ଥ ପ୍ରତିବନ୍ଧକ ସାଜିଥିଲା । ଫାର୍ମ ପ୍ରତିଷ୍ଠା କରିବା ଲକ୍ଷ୍ୟରେ ପ୍ରଦୀପ ମାର୍ଶାଘାଈ ବ୍ଲକ ମୁଖ୍ୟ ପ୍ରାଣୀ ଚିକିତ୍ସଙ୍କ ସହିତ ଯୋଗାଯୋଗ କରିଥିଲେ । ସେଠାରୁ ସମସ୍ତ ସହାୟତା ପାଇ ଏକ ଅଣ୍ଡା ଦିଆ କୁକୁଡା ଫାର୍ମ ପ୍ରତିଷ୍ଠା କରିବା ସହିତ ଏବେ ବାର୍ଷିକ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି । ୧୦୦୦ ଅଣ୍ଡାଦିଆ କୁକୁଡା ପାଳନ କରିବା ସହିତ ଉତ୍ପାଦିତ ହେଉଥିବା ଅଣ୍ଡା ସ୍ଥାନୀୟ ଅଞ୍ଚଳରେ ବିକ୍ରି କରି ଭଲ ଦୁଇ ପଇସା ରୋଜଗାର କରିପାରୁଛନ୍ତି ।

ପ୍ରଦୀପ ନିଜ ଜମିରେ ପ୍ରଥମେ ଏକ କୁକୁଡା ଫାର୍ମ ପ୍ରତିଷ୍ଠା କରିଲେ । ରାଜ୍ୟ ସରକାରଙ୍କ ଯୋଜନାରେ ଅର୍ନ୍ତଭୁକ୍ତ ହୋଇ ପ୍ରଦୀପ ତାଙ୍କର ମା ସଂଯୁକ୍ତା ବେହେରାଙ୍କ ନାମରେ ୭ ଲକ୍ଷ ୬୦ ହଜାର ରୁଣ ଆଣିଥିଲେ । ଏହି ଟଙ୍କାରେ ୧୦୦୦ ଅଣ୍ଡାଦିଆ କୁକୁଡା ପାଳନ ପାଇଁ ଲକ୍ଷ ରଖି ଭୁବନେଶ୍ୱରରୁ କଳିଙ୍ଗ ବ୍ରାଉନ୍ ପ୍ରଜାତିର କୁକୁଡା ଛୁଆ ଆଣିଥିଲେ । ୩ ମାସର ଛୁଆ ଗୋଟାକ ୨୨୦ ଟଙ୍କା କିଣା ହୋଇଥିବା ବେଳେ ୫ ମାସ ହେଲା ବେଳକୁ ଅଣ୍ଡା ଦେବା ଆରମ୍ଭ କରିଥିଲେ । ଏହି କଳିଙ୍ଗ ବ୍ରାଉନ୍ ପ୍ରଜାତିର କୁକୁଡା ବର୍ଷେରୁ ଦେଢବର୍ଷ ପର୍ଯ୍ୟନ୍ତ ଅଣ୍ଡା ଦେଉଥିବା ବେଳେ ବାର୍ଷିକ ୨୦୦ ରୁ ୩୦୦ ଟି ପର୍ଯ୍ୟନ୍ତ ଅଣ୍ଡା ଦେଇଥାନ୍ତି ।

ଏହି ଅଣ୍ଡା ସ୍ଥାନୀୟ ବଜାରରେ ୬ ରୁ ୭ ଟଙ୍କା ଦାମ ରହୁଥିବା ବେଳେ ଲୋକମାନେ ପ୍ରଦୀପଙ୍କ ଫାର୍ମକୁ ଆସି ଅଣ୍ଡା କିଣି ନିଅନ୍ତି । ସ୍ଥାନୀୟ ଅଞ୍ଚଳର ଅନେକ ଯୁବକ ଏବଂ କୁକୁଡା ଚାଷୀ ପ୍ରଦୀପଙ୍କ ଫାର୍ମକୁ ଆସି ବୁଲି ଦେଖିବା ସହିତ ପ୍ରଦୀପଙ୍କ ସ୍ହିତ ଆଲୋଚନା କରି ଅଣ୍ଡାଦିଆ କୁକୁଡା ଚାଷ କରିବାପାଇଁ ଆଗ୍ରହ ପ୍ରକାଶ କରୁଛନ୍ତି । ରାଜ୍ୟ ସରକାଙ୍କ ଯୋଜନାର ସଫଳ ରୁପାୟନ ସହିତ ଅଣ୍ଡାଦିଆ କୁକୁଡା ଫାର୍ମ ପ୍ରତିଷ୍ଠା କରି ପ୍ରଦୀପ ଆତ୍ମନିର୍ଭରଶୀଳ ହେବା ସହିତ ଅନ୍ୟ ମାନଙ୍କ ପାଇଁ ସାଜିଛନ୍ତି ପ୍ରେରଣାର ଉତ୍ସ ।