ଏପ୍ରିଲ ୧୧କୁ ଛେନାପୋଡ ଦିବସ ଭାବେ ପାଳନ ପାଇଁ ଉଦ୍ୟମ । ମିଠାର ସ୍ରଷ୍ଟା ସୁଦର୍ଶନ ସାହୁଙ୍କ ଜନ୍ମଦିନକୁ ଆଖି ଆଗରେ ରଖି ସୋସିଆଲ୍ ମିଡିଆରେ ଉଠିଲା ଦାବି ।
କନକ ବ୍ୟୁରୋ: ଏପ୍ରିଲ ୧୧କୁ ଛେନାପୋଡ ଦିବସ ଭାବେ ପାଳନ କରିବାକୁ ସୋସିଆଲ ମିଡିଆରେ ଜୋରଦାର ଚର୍ଚ୍ଚା । ଏହି ଦିନ ଛେନାପୋଡର ସ୍ରଷ୍ଟା ଭାବେ ପରିଚିତ ସୁଦର୍ଶନ ସାହୁଙ୍କ ଜନ୍ମଦିନ । ତେଣୁ ପଖାଳ ଦିବସ ଓ ରସଗୋଲା ଦିବସ ପରି ଛେନାପୋଡ ଦିବସକୁ ପାଳନ କରି ଏହି ମିଠାର ଗ୍ରହଣୀୟତା ଜାତୀୟ ଅନ୍ତର୍ଜାତୀୟ ସ୍ତରରେ ପହଞ୍ଚାଇବା ପାଇଁ ଉଦ୍ୟମ କରିବାକୁ ସୋସିଆଲ ମିଡିଆରେ ଚେଷ୍ଟା ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପଖାଳ ଦିବସ, ରସଗୋଲା ଦିବସ ଭଳି ଛେନାପୋଡ ଦିବସ ପାଳନ କରିବାକୁ ସୋସିଆଲ ମିଡିଆରେ ଚର୍ଚ୍ଚା ଜୋର୍ ଧରିଥିବା ବେଳେ, କେଉଁ ତାରିଖରେ ଏହା ପାଳନ ହେବ ସେନେଇ ଏକାଧିକ ମତ ସାମ୍ନାକୁ ଆସିଥିଲା । ଏହାରି ଭିତରେ ଛେନାପୋଡର ସ୍ରଷ୍ଟା ସୁଦର୍ଶନ ସାହୁଙ୍କ ଜନ୍ମଦିବସକୁ ଛେନାପୋଡ ଦିବସ ଭାବେ ଉତ୍ସର୍ଗ କରିବାକୁ ଏକାଧିକ ସଂସ୍ଥା, ଅନୁଷ୍ଠାନ ଏବଂ ବ୍ୟକ୍ତିବିଶେଷ ଅଣ୍ଟା ଭିଡିଛନ୍ତି । ଏହି କ୍ରମରେ ସୁଦର୍ଶନଙ୍କ ଜନ୍ମ ତାରିଖ ଏପ୍ରିଲ ୧୧କୁ ବିଶ୍ୱ ଛେନାପୋଡ ଦିବସ ଭାବେ ପାଳନ କରିବାକୁ ଆରମ୍ଭ ହୋଇଛି ଉଦ୍ୟମ ।
ଛେନାପୋଡର ପ୍ରସ୍ତୁତି ଏବଂ ଏହାର ଆରମ୍ଭ ଦିନର କଥା ବେଶ ରୋଚକ । କିଭଳି ଏବଂ କେଉଁ ପରିସ୍ଥିତିରେ ଛେନା ନଷ୍ଟ ହୋଇଯିବା ଆଶଙ୍କାରେ ଏହାକୁ ନୂଆ ଢଙ୍ଗରେ ପ୍ରସ୍ତୁତି କରିବା ବେଳେ ଏହା ଛେନାପୋଡର ରୂପ ନେଇଗଲା, ତାକୁ ବଖାଣିଛନ୍ତି ସୁଦର୍ଶନ ସାହୁଙ୍କ ପୁଅ ସୁମ୍ ସାହୁ । ଦିନେ ବଳିପଡିଥିବା ଛେନାକୁ ବ୍ୟବହାର କରିବାକୁ ଯାଇ ସୁଦର୍ଶନ ସାହୁ କରିଥିବା ଉଦ୍ୟମ ଆଜି ଛେନାପୋଡର ରୂପ ନେଇ ଲୋକ ମାନଙ୍କ ହୃଦୟର ବେଶ ନିକଟତର ହୋଇପାରିଛି । ଖାଲି ନୟାଗଡ ନୁହେଁ, ପୁରା ରାଜ୍ୟରେ, ଦେଶରେ ଏପରିକି ବିଦେଶରେ ମଧ୍ୟ ଏହା ବେଶ ଆଦୃତି ଲାଭ କରିଛି । ଏବେ ନୟାଗଡ ଛେନାପୋଡକୁ ବିଶ୍ୱସ୍ତରୀୟ କରାଇବା ପାଇଁ ଆରମ୍ଭ ହୋଇଛି ଉଦ୍ୟମ ।
ସ୍ୱର୍ଗତ ସୁଦର୍ଶନଙ୍କ ଜନ୍ମ ତାରିଖ ଆସନ୍ତା ଅପ୍ରେଲ ୧୧ ତାରିଖକୁ ବିଶ୍ୱ ଛେନାପୋଡ ଦିବସ ହିସାବରେ ପାଳନ କରିବାକୁ ଉଦ୍ୟମ କରୁଛନ୍ତି ଏକାଧିକ ସଂସ୍ଥା । ଆଉ ଏଭଳି ଉଦ୍ୟମକୁ ନୟାଗଡରୁ ମିଳୁଛି ଢେର ପ୍ରଶଂସା ।