କେନ୍ଦ୍ର ସରକାରଙ୍କ ବିଭିନ୍ନ ନୀତି ବିରୋଧରେ ବିଭିନ୍ନ ଟ୍ରେଡ ୟୁନିଅନ ପକ୍ଷରୁ ଦୁଇ ଦିନିଆ ଭାରତ ବନ୍ଦ ଡାକରା । କିଛି ରାଜ୍ୟରେ ପଡିଲା ବନ୍ଦର ପ୍ରଭାବ ।
କନକ ବ୍ୟୁରୋ : କେନ୍ଦ୍ର ସରକାରଙ୍କ ବିଭିନ୍ନ ପ୍ରସଙ୍ଗକୁ ବିରୋଧ କରି ଆଜିଠୁ ଦୁଇ ଦିନିଆ ଭାରତ ବନ୍ଦ ପାଳନ କରୁଛି ଟ୍ରେଡ୍ ୟୁନିଅନ । ସକାଳ ୬ରୁ ସନ୍ଧ୍ୟା ୬ଟା ଯାଏଁ ହେଉଥିବା ଏହି ଧର୍ମଘଟକୁ ଅନେକ ସଂଗଠନ ସମର୍ଥନ କରିଛନ୍ତି । ଅନ୍ୟପଟେ କେରଳ ହାଇକୋର୍ଟ ଏହି ପ୍ରସଙ୍ଗରେ ରାୟ ଦେଇ କହିଛନ୍ତି, କୌଣସି ସରକାରୀ କର୍ମଚାରୀ ଏହି ଦୁଇ ଦିନିଆ ଆନ୍ଦୋଳନରେ ସାମିଲ ହୋଇପାରିବେନି ।
Kanak News is now on WhatsApp
Join and get latest news updates delivered to you via WhatsApp
ଦରଦାମ ବୃଦ୍ଧି, କେନ୍ଦ୍ରର ବିଭିନ୍ନ ନୀତିକୁ ବିରୋଧ କରି କେନ୍ଦ୍ରୀୟ ଟ୍ରେଡ ୟୁନିୟନ ଆଜିଠୁ ଦୁଇ ଦିନିଆ ଦେଶବ୍ୟାପୀ ଧର୍ମଘଟ କରୁଛି । ଆଜି ପ୍ରଥମ ଦିନରେ ଏହାର ମିଶ୍ରିତ ପ୍ରଭାବ ଦେଖିବାକୁ ମିଳିଛି । ରାଜଧାନୀ ଦିଲ୍ଲୀ, ୟୁପି, ହିନ୍ଦୀ ହାର୍ଟଲ୍ୟାଣ୍ଡ ସମେତ ଅନେକ ସ୍ଥାନରେ ଏହାର ପ୍ରଭାବ ମିଶ୍ରିତ ଦେଖିବାକୁ ମିଳିଛିି । ବନ୍ଦର ପ୍ରଭାବ ଯୋଗୁଁ ଦେଶର ଅନେକ ସ୍ଥାନରେ ରେଳ ଓ ଗାଡିମଟର ଚଳାଚଳ ବନ୍ଦ ରହିଥିବା ଦେଖିବାକୁ ମିଳିଛି । ଫଳରେ ଯାତାୟତ ଠପ ହୋଇପଡିଥିଲା ।
ରାଷ୍ଟ୍ରୀୟ ସଂସ୍ଥାକୁ ଘରୋଇକରଣର ବିରୋଧ, ଜନ ବିରୋଧୀ ଯୋଜନା ଓ ଦରବୃଦ୍ଧି ଭଳି ପ୍ରସଙ୍ଗକୁ ନେଇ କେନ୍ଦ୍ରୀୟ ଟ୍ରେଡ ୟୁନିୟନ ଧର୍ମଘଟକୁ ଓହ୍ଲାଇଛି । ଏହି ୧୨ ଘଂଟିଆ ଧର୍ମଘଟକୁ ହିନ୍ଦ ମଜଦୁର ସଙ୍ଘ, ଲେବର ପ୍ରୋଗ୍ରେସିଭ ଫେଡେରେସନ ଭଳି ଅନେକ ସଂଗଠନ ସମର୍ଥନ କରିଛନ୍ତି । ସଙ୍ଘର କର୍ମକର୍ତା ମାନେ ରାଜରାସ୍ତାକୁ ଓହ୍ଲାଇ ପ୍ରଦର୍ଶନ କରିବା ସହ କେନ୍ଦ୍ର ସରକାରଙ୍କ ବିରୁଦ୍ଧରେ ନାରାବାଜି କରିଛନ୍ତି । ସେପଟେ ଧର୍ମଘଟ ଯୋଗୁଁ ବ୍ୟାଙ୍କ ଓ ଡାକଘର ସେବା ସମେତ ଅନେକ ଜରୁରୀକାଳିନ ସେବା ମଧ୍ୟ ପ୍ରଭାବିତ ହୋଇଛି । ସେପଟେ ଦରଦାମକୁ ନେଇ କେନ୍ଦ୍ର ସରକାରଙ୍କୁ ଘେରିଛନ୍ତି ବିରୋଧୀ ।
ଦେଶବ୍ୟାପୀ ଦୁଇ ଦିନିଆ ଧର୍ମଘଟକୁ ଅନେକ ରାଜନୈତିକ ଦଳ ମଧ୍ୟ ସମର୍ଥନ ଜଣାଇଛନ୍ତି । ବ୍ୟାଙ୍କ ଓ ଡାକଘର ସେବା ବନ୍ଦ ହେବା ଫଳରେ ୫୦ କୋଟିରୁ ଅଧିକ କାରବାର ପ୍ରଭାବିତ ହୋଇଥିବା ଜଣାପଡିଛି ।