ଘଞ୍ଚ ଜଙ୍ଗଲ ଓ ଅନ୍ଧକାର ଯାହା ରାସ୍ତାରେ ସାଜିନଥିଲା ପ୍ରତିବନ୍ଧକ ! ଅପହଞ୍ଚ ଇଲାକାରେ ୨୦ ବର୍ଷ ଧରି ଶିକ୍ଷା ପହଞ୍ଚାଉଥିବା ବ୍ୟକ୍ତିଙ୍କୁ ଜାଣନ୍ତୁ ।
ଅପହଞ୍ଚ ଇଲାକାରେ ଶିକ୍ଷା ପହଞ୍ଚାଇବା ପାଇଁ ଚେଷ୍ଟିତ ଥିବା ଶିକ୍ଷକଙ୍କର ସଂଘର୍ଷ ଯେତିକି କଠିନ ସେତିକି ପ୍ରେରଣାଦାୟୀ ମଧ୍ୟ । ଗୋଟିଏ କି ଦୁଇ ଦିନ ନୁହେଁ, ଇତିମଧ୍ୟରେ ବିତିଗଲାଣି ୨୦ ବର୍ଷ । ସଂଘର୍ଷର ଏହି ରାସ୍ତାରେ ନଦୀ ଅଛି ଏପରିକି ବନ୍ୟା ମଧ୍ୟ ଅଛି କିନ୍ତୁ ନାହିଁ କୌଣସି ପୋଲ । ଜଙ୍ଗଲ ଅଛି ଏବଂ ପାହାଡ ମଧ୍ୟ ଅଛି କିନ୍ତୁ ନାହିଁ କୌଣସି ରାସ୍ତା । ଆଉ ଏତେ ସବୁ ଅସୁବିଧା ମଧ୍ୟରେ କିନ୍ତୁ ସ୍କୁଲର ଘଣ୍ଟି ବାଜିବା କେବେ ବନ୍ଦ ହୋଇନଥାଏ ।
Kanak News is now on WhatsApp
Join and get latest news updates delivered to you via WhatsApp
ଛତିଶଗଡ ଏବଂ ଝାରଖଣ୍ଡର ଏହି ଦୁର୍ଗମ ଭୌଗୋଳିକ ଗାଁରେ ପିଲାମାନଙ୍କ ଭବିଷ୍ୟତ ଗଢିବା ପାଇଁ ଦୁଇ ଜଣ ଶିକ୍ଷକ ସେମାନଙ୍କର ଜୀବନ ସମର୍ପିତ କରିଦେଇଛନ୍ତି । ଏହି ଦୁଇ ଜଣ ଶିକ୍ଷକ ହେଉଛନ୍ତି, ଜଗତରାମ୍ ନିର୍ମଳକର ଏବଂ ରଜନୀକାନ୍ତ ମଣ୍ଡଳ । ନଦୀ, ଜଙ୍ଗଲ ଏବଂ ପାହାଡର କଠିନ ରାସ୍ତା ମଧ୍ୟ ତାଙ୍କ ସଂକଳ୍ପକୁ ଭାଙ୍ଗିପାରିନାହିଁ । ଆଦର୍ଶ ଶିକ୍ଷକ ଭାବେ କର୍ତ୍ତବ୍ୟ ପାଳନ କରୁଥିବା ଜଗତରାମ ଗତ ୧୮ ବର୍ଷରେ ପ୍ରତିଦିନ ଅନେକ କଷ୍ଟପଥ ଦେଇ ସ୍କୁଲକୁ ଆସିଥାନ୍ତି । ପାଖାପାଖି ୪୦ ଫୁଟର ଏକ ନଦୀକୁ ନିଜେ ଡଙ୍ଗା ଚଲାଇ ପାର ହୋଇ ସେ ସ୍କୁଲକୁ ଆସିଥାନ୍ତି । ଘନ ଜଙ୍ଗଲ ଏବଂ ପାହାଡ ମଧ୍ୟରେ ରହୁଥିବା କୋରବା ଆଦିବାସୀ ପରିବାରର ପିଲାମାନଙ୍କୁ ଶିକ୍ଷା ପ୍ରଦାନ କରିବା ପାଇଁ ଦାୟିତ୍ୱ ହିଁ ତାଙ୍କୁ ଏହି ବାଧାବିଘ୍ନ ପାର କରିବା ପାଇଁ ପ୍ରେରିତ କରିଆସୁଛି ।
ଛତିଶଗଡର କୋରବା ଜିଲ୍ଲା ମୁଖ୍ୟାଳୟ ଠାରୁ ପାଖାପାଖି ୪୦ କିଲୋମିଟର ଦୂରରେ ରହିଛି ସତରେଙ୍ଗା ଗାଁ । ଗାଁକୁ ପହଞ୍ଚିବା ପାଇଁ ରାସ୍ତା ଅନେକ ରହିଛି, କିନ୍ତୁ ପ୍ରତି ରାସ୍ତାରେ ପାହାଡର ବିପଦପୂର୍ଣ୍ଣ ରାସ୍ତା ଦେଇ ଯିବାପାଇଁ ପଡିଥାଏ । ଆଉ ଏହି କଠିନ ପଥ ଦେଇ ପ୍ରତିଦିନ ସ୍କୁଲକୁ ଆସିଥାନ୍ତି ଜଗତରାମ୍ । ତାଙ୍କ ଏହି କର୍ତ୍ତବ୍ୟନିଷ୍ଠା ପାଇଁ ତାଙ୍କୁ ୨୦୧୬ ମସିହାରେ ମୁଖ୍ୟମନ୍ତ୍ରୀଙ୍କ ଦ୍ୱାରା ପୁରସ୍କୃତ ମଧ୍ୟ କରାଯାଇଥିଲା । ଜଗତରାମ ଏହି ସ୍କୁଲରେ ଜନସମ୍ପର୍କ କରି ଲୋକମାନଙ୍କୁ ତାଙ୍କ ପିଲାଙ୍କୁ ସ୍କୁଲ ପଠାଇବା ପାଇଁ ପ୍ରେରିତ କରିଥାନ୍ତି । ତେବେ ସବୁଠାରୁ ବଡ କଥା ହେଉଛି, ତାଙ୍କ ପାଠପଢା ଦ୍ୱାରା ୧୧ ଜଣ କୋରବା ଯୁବକ ଆଜି ସରକାରୀ ଚାକିରି ପାଇ ପାରିଛନ୍ତି ।