ଏବେ ଅଶିକ୍ଷା ନାମକ ଅନ୍ଧକାରରୁ ମୁକ୍ତ ହେବେ କଏଦୀଙ୍କ ପିଲା । କେରଳ ସରକାର ଘୋଷଣା କଲେ ସହାୟତା ରାଶି । କହିଲେ ଶିକ୍ଷାର ବିକାଶରେ ହିଁ ସଭ୍ୟତାର ବିକାଶ
କନକ ବ୍ୟୁରୋ : ସାରା ଦେଶରେ ବାରମ୍ବାର କେରଳ ଏକ ମଡେଲ ହେବାକୁ ଚେଷ୍ଟା ଚଳାଇଛି । ଏହା ସହ କିଛି କ୍ଷେତ୍ରରେ ବି ସଫଳତା ହାସଲ କରିଛି । ସେ ଶିକ୍ଷା କ୍ଷେତ୍ରରେ ହେଉ କି ମହିଳା ସୁରକ୍ଷା କ୍ଷେତ୍ର । ସେ ଶ୍ରମିକଙ୍କୁ ସର୍ବନିମ୍ନ ମଜୁରୀ ଦେବା କଥା ହେଉ କି ସରକାରକୁ ଦୁର୍ନୀତି ମୁକ୍ତ ରଖିବାର ପ୍ରୟାସ ହେଉ । କେରଳ ହିଁ ସର୍ବାଗ୍ରେ । ଏଠାରେ ସବୁଠାରୁ ବଡ କଥା ହେଉଛି ସରକାରରେ ଯିଏ ବି ଥାଉ ସେ କଂଗ୍ରେସ ହେଉ କି କମ୍ୟୁନିଷ୍ଟ ସେମାନଙ୍କର ଗୋଟିଏ ପ୍ରୟାସ କେରଳବାସୀଙ୍କୁ ଶାନ୍ତି, ପ୍ରଗତି ଓ ବିଜ୍ଞାନ ସମ୍ମତ ସମାଜବାଦ ଦିଗରେ ଆଗକୁ ବଢାଇନେବା । ବିଶେଷ କରି ସାରା ଦେଶରେ କେରଳର ଶିକ୍ଷା ମଡେଲ, ଶିକ୍ଷିତ ମାନଙ୍କ ହାର ଓ ଶିକ୍ଷାନୁଷ୍ଠାନ ନିର୍ମାଣ କ୍ଷେତ୍ରରେ ନିଜର ପ୍ରଚେଷ୍ଟାକୁ ପ୍ରଶଂସା କରାଯାଉଛି । ଏହି ପରିପେକ୍ଷୀରେ ଏଠିକାର ପିନାରାଇ ବିଜୟନ ସରକାର ପୁଣି ଏକ ବଡ ନିଷ୍ପତ୍ତି ନେଇଛନ୍ତି ଯାହା କି ଶିକ୍ଷା କ୍ଷେତ୍ରରେ ପୁଣି ଏକ ମାଇଲ ଖୁଣ୍ଟ ଭାବେ ଉଭା ହେବାକୁ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
କେହି ଜଣେ ଦୋଷ କରି ଜେଲ ଯିବା ଟା ଏବେକାର ମଣିଷ ପାଇଁ କିଛି ବଡ କଥା ନୁହେଁ । ହେଲେ ବଡ କଥା ହେଉଛି ପରିବାରର ପୁରୁଷ ଜଣକ ଦୋଷ କରିଥିବାରୁ ଜେଲ ଗଲା । ହେଲେ ସେହି ପୁରୁଷର ପିଲାମାନେ କ’ଣ ଦୋଷ କରିଛନ୍ତି ଯେ ସେମାନଙ୍କୁ ବ୍ୟବସ୍ଥା ଦଣ୍ଡ ଦେବ । ସେମାନେ କାହିଁକି ମୌଳିକ ଅଧିକାରରୁ ବଞ୍ଚିତ ହେବେ । ସେମାନଙ୍କୁ ସମାଜ କାହିଁକି ଏକ ଆସାମୀର ପିଲା ଭାବେ ପରିଚୟ ଦେବ । ବାପା କିମ୍ବା ମା ର ଭୂଲ ପାଇଁ କାହିଁକି କୁଶିକ୍ଷା ନାମକ ଅନ୍ଧକାରରେ ଜୀବନ ଯାକ ଷଢିବେ ପିଲା । ଏସବୁକୁ ଦୃଷ୍ଟିରେ ରଖି କେରଳ ସରକାର ଏବେ କଏଦୀଙ୍କ ପିଲାଙ୍କୁ ପାଠପଢାରେ ସହାୟତା କରିବାକୁ ଅଣ୍ଟା ଭିଡିଛନ୍ତି । ଏନେଇ କେରଳର ସାମାଜିକ ନ୍ୟାୟ ମନ୍ତ୍ରୀ କେ.କେ ଶୈଲଜା କହିଛନ୍ତି କି ସେହି ପିଲାମାନେ ଯେଉଁମାନଙ୍କ ବାପା କିମ୍ବା ମା ଜେଲରେ ଜୀବନ କାଟୁଛନ୍ତି ସେମାନଙ୍କୁ ପ୍ରଥମ ରୁ ପଞ୍ଚମ ଶ୍ରେଣୀ ଯାଏଁ ପାଠ ପଢିବାକୁ ମାସିକ ୩ ଶହ ଟଙ୍କା ପ୍ରଦାନ କରାଯିବ । ସେହିଭଳି ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ମାସିକ ୫ ଶହ ଟଙ୍କା, ଉଚ୍ଚଶିକ୍ଷା ପାଇଁ ମାସିକ ୭୫୦ ଟଙ୍କା ଓ ପେଶାଦାର ପାଠ ପଢୁଥିବା ପିଲାଙ୍କୁ ମାସିକ ୧ ହଜାର ଟଙ୍କା ଲେଖାଏଁ ପ୍ରଦାନ କରାଯିବ । ଏହି ଅନୁଦାନ ସିଧା ସଳଖ ସେମାନଙ୍କ ବ୍ୟାଙ୍କ ଖାତାକୁ ଯିବ ବୋଲି ଶ୍ରୀମତୀ କେ,କେ, ଶୈଲଜା କହିଛନ୍ତି । କେ.କେ ଶୈଲଜା କେରଳ ସରକାରଙ୍କର ଏକ ଏପରି ମନ୍ତ୍ରୀ ଯେ କି ସବୁବେଳେ କିଛି ନା କିଛି ଅଭିନବ ପ୍ରୟାସ କରିଥା’ନ୍ତି । କରୋନା ମହାମାରୀ ବେଳେ ରାଜ୍ୟରେ କରୋନା ମୁକାବିଲାର ସଫଳତାକୁ ନେଇ ସାରା ବିଶ୍ୱରେ ଚର୍ଚ୍ଚାକୁ ଆସିଥିଲେ ଶୈଲଜା ।