କନକ ବ୍ୟୁରୋ: ଗାଁ ରାଜନୀତି ପ୍ରତି ଆକୃଷ୍ଟ ହେଉଛନ୍ତି ଯୁବପୀଢି । ବିଶେଷକରି ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ବହୁ ସଂଖ୍ୟାରେ ଉଚ୍ଚଶିକ୍ଷିତ ଯୁବକ ଯୁବତୀ ନାମାଙ୍କନ ଦାଖଲ କରିଛନ୍ତି । ଯାହାକି ଗ୍ରାମାଞ୍ଚଳ ରାଜନୀତିକୁ ବେଶ ରୋଚକ କରିଛି ।
Kanak News is now on WhatsApp
Join and get latest news updates delivered to you via WhatsApp
ସିଭିଲ ଇଞ୍ଜିନିୟରିଂରେ ବିଟେକ୍ ଡିଗ୍ରୀ ହାସଲ କରିଥିବା ସୁରଭି ନିଜ ଅଞ୍ଚଳର ଉନ୍ନତି ପାଇଁ ଗାଁ ରାଜନୀତିକ ଟାଣି ହୋଇ ଆସିଛନ୍ତି । ଆଉ ମାଲକାନଗିରି ପଡିଆ ଜୋନରୁ ବିଜେଡିରୁ ଜିଲ୍ଲାପରିଷଦ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଛନ୍ତି । ସେହିପରି ବିବିଏ ଡିଗ୍ରୀଧାରୀ ଆଦିବାସୀ ଝିଅ ବିଜୟୀ ଲକ୍ଷ୍ମୀ ପଡିଆମୀ କୋରୁକୋଣ୍ଡା ୧ ନମ୍ବର ଜୋନରୁ ବିଜେଡି ଟିକେଟରେ ନାମାଙ୍କନ ଦାଖଲ କରିଛନ୍ତି ।
ଅନ୍ୟପଟେ ରେଲୱେ ଚାକିରିରେ ଯୋଗ ନଦେଇ ରାଜନୀତି ମଇଦାନକୁ ଓହ୍ଲାଇଛନ୍ତି ମାଲକାନଗିରିର କୋୟା ଆଦିବାସୀ ଝିଅ ରିନା କୱାସୀ । ସେ କାଲିମେଳା ଜୋନ-୨ରୁ ନାମାଙ୍କନ ପତ୍ର ଦାଖଲ କରିଛନ୍ତି । ଅନ୍ୟପଟେ ବିଟେକ୍ କରିଥିବା ଉଦିତ ମୋଟା ଦରମାର ଚାକିରି ଛାଡି ସୁନ୍ଦରଗଡ ହେମଗିରି କ ଜିଲ୍ଲାପରିଷଦ ଜୋନରୁ ବିଜେଡିରୁ ନାମାଙ୍କନ ପତ୍ର ଦାଖଲ କରିଛନ୍ତି । ସେହିପରି ଲେଫ୍ରିପଡା କ ଜୋନରୁ ବିଜେପି ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଛନ୍ତି ସଂଯୁକ୍ତା ବୁଖରା । ସଂଯୁକ୍ତା ବାୟୋଇନଫର୍ମେଟିକ୍ସରେ ଏମଏସସି କରିଛନ୍ତି । କିନ୍ତୁ ଚାକିରୀ ନକରି ଗାଁ ଲୋକଙ୍କ ସେବା ପାଇଁ ରାଜନୀତିକୁ ଆସିଥିବା କହିଛନ୍ତି ।
ସରପଞ୍ଚ ହେବେ ଅଧ୍ୟାପିକା । ଗଙ୍ଗାଧର ସ୍ନାତକ ବିଜ୍ଞାନ ମହାବିଦ୍ୟାଳୟରେ ଅଧାପିକା ଭାବେ କାର୍ଯ୍ୟ କରୁଥିବା ଦୀପିକା କୁମାରୀ ବାରିକ ଚାକିରି ଛାଡି ସରପଞ୍ଚ ହେବାକୁ ନାମାଙ୍କନ ଦାଖଲ କରିଛନ୍ତି । ଗାଁର ସାମାଜିକ ଓ ଆର୍ଥୀକ ବିକାଶ ପାଇଁ ରାଜନୀତିକୁ ଆସିଥିବା କହିଛନ୍ତି ଦୀପିକା । ସେହିପରି ଅବସରପ୍ରାପ୍ତ ସିଆରପିଏଫ ଯବାନରାଜେଶ ବରଗଡ ୩ ନମ୍ବର ଜୋନରୁ ବିଜେପିରୁ ଜିଲ୍ଲା ପରିଷଦ ପ୍ରାର୍ଥୀ ହୋଇଛନ୍ତି । ଦୁର୍ନୀତି ମୁକ୍ତ ସମାଜ ଗଠନ କରିବା ତାଙ୍କର ଲକ୍ଷ୍ୟ ବୋଲି କହିଛନ୍ତି ।