କନକ ବ୍ୟୁରୋ: ସରଗରମ ହେଉଛି ଗାଁ ରାଜନୀତି । ପ୍ରାର୍ଥୀଙ୍କ ପରୀକ୍ଷା ତାରିଖ ପାଖଉଛି, ଆଉ ଗାଁଗଣ୍ଡାରେ ରାଜନୀତି ଦାନା ବାନ୍ଧୁଛି । ନାମାଙ୍କନ ଦାଖଲର ଶେଷ ତାରିଖରେ ପଞ୍ଚାୟତ ପ୍ଲେଗ୍ରାଉଣ୍ଡରେ ପତିଆରା ଦେଖାଇଛନ୍ତି ପୁରୁଖା ପ୍ରାର୍ଥୀ । ହେଲେ ୟାରି ଭିତରେ ଚଳିତ ନିର୍ବାଚନରେ ଚର୍ଚ୍ଚାରେ ରହିଛନ୍ତି ନୂଆମୁହଁ । ୨୦୨୨ ପଞ୍ଚାୟତ ପରୀକ୍ଷାରେ ନୂଆ ନୂଆ ପ୍ରାର୍ଥୀ ପଲିଟିକ୍ସରେ ପାଦ ଦେଇଛନ୍ତି । ଆଉ ରାଜନୀତି ରାସ୍ତାରେ ପରିବର୍ତ୍ତନ ସ୍ୱର ନେଇ ଯୁବପିଢି ନାରା ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାରା ରାଜ୍ୟରୁ ସବୁଦିନ ନୂଆନୂଆ ଖବର ସାମ୍ନାକୁ ଆସୁଥିବା ବେଳେ ସୁନ୍ଦରଗଡରୁ ଆସିଛି ଶିକ୍ଷିତ ପ୍ରାର୍ଥୀ ଲମ୍ବା ତାଲିକା । ଜଣେ ବିଟେକ୍ ଇଞ୍ଜିନିୟର ହୋଇଥିବା ବେଳେ ଅନ୍ୟ ଜଣେ ଏମଏସସି ପାସ୍ କରିଛନ୍ତି । ତେବେ ରାଜନୀତିରେ ଲୋକସେବା ସହ ଅଞ୍ଚଳର ବିକାଶ କରିବାକୁ ଏକ ସୁବର୍ଣ୍ଣ ସୁଯୋଗ ମିଳିଥିବାରୁ ଯୁବପିଢି ଏହି ମୌକାର ହାତଛଡା କରିବାକୁ ଚାହୁଁ ନାହାନ୍ତି ।
ତେବେ ସୁନ୍ଦରଗଡ ହେମଗିରି ‘କ’ ଜିଲ୍ଲାପରିଷଦ ଜୋନରେ ବିଜେଡି ସମର୍ଥିତ ଉଦିତ୍ ସେଠ୍ ନାମାଙ୍କନ ଦାଖଲ କରିଛନ୍ତି । ରାଜନୀତିରେ ନୂଆ କରି ପାଦ ଦେଇଥିବା ଉଦିତ ୨୦୦୫ ମସିହାରେ ପୁରୀର ଘନଶ୍ୟାମ ହେମଲତା କଲେଜରୁ ବିଟେକ ଇଞ୍ଜିନିୟରିଂ ଶେଷ କରିବା ପରେ ରାଜ୍ୟର ବିଭିନ୍ନ କମ୍ପାନୀରେ ସେ ମେକାନିକାଲ ଇଞ୍ଜିନିୟର ଭାବରେ କାମ କରୁଥିଲେ । ଏବେ ସେ ଇବଥର୍ମାଲ , ସେଫକୋରେ କାର୍ଯ୍ୟ କରୁଥିବା ବେଳେ ଗାଁକୁ ଆସିବା ସମୟରେ ନିଜ ଅଞ୍ଚଳରେ ଥିବା ବିସ୍ଥାପିତ ସମସ୍ୟା ଏବଂ ଲୋକଙ୍କ ଦୁଃଖ ଦୁର୍ଦ୍ଦଶା ତାଙ୍କୁ ରାଜନୀତି ଆଡକୁ ଟାଣି ନେଇଥିଲା । ଏବଂ ସେ ରାଜନୀତି ମାଧ୍ୟମରେ ଲୋକଙ୍କ ସେବା କରିପାରିବେ ବୋଲି ମନସ୍ତ କରି ଜିଲ୍ଲାପରିଷଦ ପ୍ରାର୍ଥୀ ଭାବେ ଲଢେଇ କରୁଛନ୍ତି ।
ସେହିପରି ଚଳିତ ନିର୍ବାଚନରେ ମହିଳା ପ୍ରାର୍ଥୀଙ୍କ ପଲିଟିକ୍ସକୁ ଆଗମନୀ ଏଥର ନୂଆ ଟ୍ରେଣ୍ଡ ତିଆରି କରିଛି । କେବଳ ଯୁବକ ନହଁନ୍ତି ଯୁବତୀ ଓ ମହିଳାମାନେ ବି ରାଜନୀତିରେ ଏଥର ଅନେକ ସଂଖ୍ୟାରେ ପ୍ରାର୍ଥୀ ବନିଛନ୍ତି । ସୁନ୍ଦରଗଡର ଉଦିତଙ୍କ ପରି ଅନ୍ୟ ଜଣେ ଶିକ୍ଷିତା ମହିଳା ହେଉଛନ୍ତି ସଂଯୁକ୍ତା ବୁଖରା । ବିଜେପିର ସମର୍ଥିତ ସଂଯୁକ୍ତା ଲେଫ୍ରିପଡା କ’ ଜୋନ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି । ରାୟଗଡାରୁ ଏମଏସସି ପଢି ସାରିବା ପରେ ଏବେ ଚାକିରି ସନ୍ଧାନରେ ଥିଲେ ସଂଯୁକ୍ତା । ହେଲେ ଗାଁ ଲୋକଙ୍କ ତଥା ଅଞ୍ଚଳର କିଛି ବିକାଶ କରିବା ପାଇଁ ବିଜେପିର ପ୍ରାର୍ଥୀ ହୋଇ ନିର୍ବାଚନୀ ମୈଦାନରେ ଲଢେଇ କରୁଛନ୍ତି ସଂଯୁକ୍ତା ।
ତେବେ ରାଜନୀତିରେ ପୁରୁଣା ଓ ପୁରୁଖାଙ୍କୁ ପରିବର୍ତ୍ତନ କରି ନୂଆ ଚାହୁଁଥିବା ଜନତା ଏବେ ଯୁବପିଢି ଓ ଶିକ୍ଷିତଙ୍କ ଉପରେ ଅନେକ ଆଶା ରଖୁଛନ୍ତି । ତେଣୁ ଆଗାମୀ ଦିନରେ ଏହି ଶିକ୍ଷିତ ପ୍ରାର୍ଥୀମାନେ ବିଜୟ ପରେ କେତେ ସମସ୍ୟାର ସମାଧାନ କରୁଛନ୍ତି କିମ୍ବା ଲୋକଙ୍କ ବିଶ୍ୱାସ କେତେ ଜିତୁଛନ୍ତି ତାହା ସମୟ ହିଁ କହିବ ।