କନକ ବ୍ୟୁରୋ : ନାରଦ ଷ୍ଟିଙ୍ଗ ଅପରେଶନ ମାମଲାରେ ବୁଧବାରଦିନ ଇଡି ପକ୍ଷରୁ ପିଏମଏଲଏ କୋର୍ଟରେ ଚାର୍ଜସିଟ ଦାଖଲ କରିଛି । ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦାଖଲ କରିଥିବା ଚାର୍ଜସିଟରେ ପଶ୍ଚିମବଙ୍ଗ ସରକାରରେ ମନ୍ତ୍ରୀ ଥିବା ଫିରହାଦ ହକିମ ଓ ସୁବ୍ରତ ମୁଖାର୍ଜୀଙ୍କର ନାମ ରହିଛି । ଏହା ବ୍ୟତୀତ ଚାର୍ଜସିଟରେ ପୂର୍ବମନ୍ତ୍ରୀ ମଦନ ମିତ୍ରାଙ୍କର ନାମ ବି ରହିଛି । ଅନ୍ୟପଟେ ଟିଏମସି ଛାଡିସାରିଥିବା ସୋଭନ ଚାଟାର୍ଜୀଙ୍କ ନାମ ବି ଏହି ଚାର୍ଜସିଟରେ ରହିଥିବା ବେଳେ ପୋଲିସ ଅଧିକାରୀ ଏସଏମଏଚ ମିର୍ଜାଙ୍କୁ ବି ଏହି ମାମଲାରେ ଅଭିଯୁକ୍ତ ଭାବେ ଗ୍ରହଣ କରିଛି ଇଡି । ଚାର୍ଜସିଟ ଦାଖଲ ପରେ ଏବେ ପଶ୍ଚିମବଙ୍ଗ ରାଜନୀତିରେ ହଟଚମଟ ଖେଳି ଯାଇଛି । ଇଡି କୋର୍ଟରେ ଦାଖଲ କରିଥିବା ଚାର୍ଜସିଟରେ ଉପରୋକ୍ତ ସମସ୍ତ ଅଭିଯୁକ୍ତଙ୍କ ବିରୋଧରେ କଠୋର ଦଣ୍ଡବିଧାନ କରିବାକୁ କୋର୍ଟଙ୍କୁ ଅନୁରୋଧ କରିଛି ।

Advertisment

କହିରଖୁ କି ସିବିଆଇ ମେ’ ମାସରେ ନାରଦା ଷ୍ଟିଙ୍ଗ ଅପରେଶନ ମାମଲାରେ ଟିଏମସିର ୪ ଜଣ ମନ୍ତ୍ରୀ, ପୂର୍ବ ମେୟରଙ୍କୁ ଗିରଫ କରିଥିଲା । ଏଭଳି ଗିରଫକୁ କୋଲକତାରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଘୋର ବିରୋଧ କରିଥିଲେ । ସେ ଅଭିଯୋଗ କରିଥିଲେ କି କେନ୍ଦ୍ରୀୟ ଏଜେନ୍ସିମାନେ କେନ୍ଦ୍ର ସରକାରଙ୍କ କଥାରେ ଏଭଳି କରୁଛନ୍ତି । ଏହି ମାମଲା ଷ୍ଟିଙ୍ଗ ଅପରେଶନ ସମ୍ବନ୍ଧିତ । ଏହି ଅପରେଶନରେ ପୂର୍ବ ସରକାରୀ କର୍ମଚାରୀ ଷ୍ଟିଙ୍ଗ ଅପରେଶନ କରୁଥିବା ବ୍ୟକ୍ତିଙ୍କ ଠାରୁ ଲାଞ୍ଚ ନେଉଥିବାର ଭିଡିଓ ଭାଇରାଲ ହୋଇଥିଲା ।