ମହାରାଷ୍ଟ୍ର ସରକାରଙ୍କ ପାଇଁ ବଢିଲା ଅଡୁଆ, ଅନୀଲ ଦେଶମୁଖଙ୍କ ପରେ ଏବେ ଅଜିତ ପାୱାର

123

କନକ ବ୍ୟୁରୋ : ମହାରାଷ୍ଟ୍ର ସରକାରରେ ପୂର୍ବତନ ଗୃହମନ୍ତ୍ରୀ ଥିବା ଅନୀଲ ଦେଶମୁଖଙ୍କ ଗିରଫ ପରେ ଉପମୁଖ୍ୟମନ୍ତ୍ରୀ ଥିବା ଅଜିତ ପାୱାରଙ୍କ ୧ ହଜାର କୋଟିର ସମ୍ପତ୍ତି ଜବତ କରିଛି ଆୟକର ବିଭାଗ । ଆୟକର ବିଭାଗ ମୋଟ ୫ ଟି ସମ୍ପତ୍ତି ଜବତ୍ କରିଛି । ଯାହାର ଆନୁମାନିକ ମୂଲ୍ୟ ୧ ହଜାର କୋଟି ଟଙ୍କାରୁ ଅଧିକ ହେବ ବୋଲି କୁହାଯାଇଛି । ଜବତ ହୋଇଥିବା ସମ୍ପତ୍ତି ମଧ୍ୟରେ ରହିଛି ଜରନ୍ଦେଶ୍ୱର ସୁଗାରମିଲ, ସାଉଥ ଦିଲ୍ଲୀରେ ଥିବା ଫ୍ଲାଟ୍, ପାର୍ଥ ପାୱାର ନିର୍ମଲ ଅଫିସ୍,ଗୋଆର ନିଲୟ ରିସୋର୍ଟ, ମହାରାଷ୍ଟ୍ରର ଭିନ୍ନ ଭିନ୍ନ ସ୍ଥାନରେ ୨୭ ଟି ପ୍ଲଟ୍ ।

କହିରଖୁ କି ଅଜିତ ପାୱାରଙ୍କ ପୂର୍ବରୁ ମହାରାଷ୍ଟ୍ର ସରକାରରେ ଗୃହମନ୍ତ୍ରୀ ଥିବା ଅନୀଲ ଦେଶମୁଖ ବେଆଇନ ଅର୍ଥ ଆଦାୟ ମାମଲାରେ ଛନ୍ଦି ହୋଇ ସରକାରରୁ ଇସ୍ତଫା ଦେଇଥିଲେ । ତାଙ୍କୁ ଶୁକ୍ରବାର ଦିନ ବମ୍ବେ ହାଇକୋର୍ଟ ଆଗୁଆ ଜାମିନ ଦେବାକୁ ମନା କରିବା ପରେ ତାଙ୍କୁ ଗିରଫ୍ କରାଯାଇଛି ।

 

ସୂଚନା ଥାଉକି ପୂର୍ବ ୭ ମାସ ଧରି ଆୟକର ବିଭାଗ ପାଖାପାଖି ୭୦ ଟି ସ୍ଥାନରେ ଚଢାଉ କରିଛି । ଏହି ସମୟରେ ଅଜିତ ପାୱାରଙ୍କ ସମେତ ତାଙ୍କ ପୁଅ ପାର୍ଥ ପାୱରଙ୍କ ମାଲିକାନାରେ ଥିବା ଅନେକ ସମ୍ପତ୍ତି ଜବତ କରିଛି । ଏସବୁ ପରେ ମହାରାଷ୍ଟ୍ର ସରକାରଙ୍କ ପାଇଁ ଅଡୁଆ ବଢିବାରେ ଲାଗିଛି । ଏହି କ୍ରମରେ ସ୍ଥିତି ଦେଖି ମହାରାଷ୍ଟ୍ର ବିଜେପି ମହାଅଘାଡି ସରକାର ଉପରେ ବିଭିନ୍ନ ବୟାନ ମାନ ଜାରି କରିଛି ।