କନକ ବ୍ୟୁରୋ: ସଂକୁଚିତ ହେବ ଓଡିଶା ଅର୍ଥନୀତି । ବଜେଟ ପୂର୍ବରୁ ୨୦୨୦-୨୧ ବର୍ଷର ଆସିଥିବା ଅର୍ଥନୈତିକ ସର୍ଭେ ରିପୋର୍ଟରେ ଏଭଳି ଆକଳନ କରାଯାଇଛି । ସର୍ଭେରେ କୁହାଯାଇଛି, ରାଜ୍ୟର ଅର୍ଥନୈତିକ ଅଭିବୃଦ୍ଧି ହାର କମିବ । ଅଭିବୃଦ୍ଧି ହାର ମାଇନସ ୪ ଦଶମିକ ୯୨ ହେବ । ରିପୋର୍ଟ ଅନୁସାରେ, ଏଥର ରାଜ୍ୟ ଅର୍ଥନୀତି ଉପରେ କୋଭିଡର ଜୋରଦାର ପ୍ରଭାବ ପଡିଛି । କୋଭିଡ ପ୍ରଭାବରେ ରାଜ୍ୟର ଅର୍ଥନୀତି ସଙ୍କୁଚିତ ହେବ ।
Kanak News is now on WhatsApp
Join and get latest news updates delivered to you via WhatsApp
୨୦୧୨-୧୩ରୁ ୨୦୧୯-୨୦ ମଧ୍ୟରେ ରାଜ୍ୟର ଅର୍ଥନୀତି ହାରାହାରି ବାର୍ଷିକ ୭.୧ ପ୍ରତିଶତ ହାରରେ ବୃଦ୍ଧି ପାଇଥିଲା । ଏହି ସମୟରେ ଜାତୀୟ ହାର ୬.୬ ପ୍ରତିଶତ ଥିଲା । ୨୦୨୦-୨୧ ଦେଶର ଜିଡିପି ମାଇନସ ୭.୭ ପ୍ରତିଶତ ରହିବା ନେଇ ଆକଳନ କରାଯାଇଥିବାବେଳେ ରାଜ୍ୟର ଜିଡିପି ମାଇନସ ୪.୯୨ ରହିବ, ଯାହାକି ଜାତୀୟ ହାରଠୁ ଭଲ ସ୍ଥିତିରେ ରହିବ ବୋଲି କୁହାଯାଇଛି । ଅର୍ଥନୈତିକ ସର୍ଭେ ରିପୋର୍ଟ ଅନୁସାରେ, ରାଜ୍ୟରେ ମୁଣ୍ଡ ପିଛା ଆୟ କମିଛି । ଗତବର୍ଷ ତୁଳନାରେ ମୁଣ୍ଡପିଚ୍ଛା ଆୟ ୨୪ ଶହ ୧୦ ଟଙ୍କା କମିଛି । ୨୦୧୯-୨୦ରେ ଏହାଥିଲା ୧ ଲକ୍ଷ ୪ ହଜାର ୫୬୬ । ଚଳିତ ବର୍ଷ ଏହା ହ୍ରାସ ପାଇ ପଂହଚିଛି ୧ ଲକ୍ଷ ୨ ହଜାର ୧୫୬ରେ । ରାଜ୍ୟର ମୁଣ୍ଡପିଚ୍ଛା ଆୟ ଗତବର୍ଷ ତୁଳନାରେ ୨.୩ ପ୍ରତିଶତ ହ୍ରାସ ପାଇଛି ।