ସେନାବାହିନୀର ଯବାନ ଏବେ ପରିବେଶ ଯୋଦ୍ଧା । ସମୁଦ୍ର ଦାଉରୁ ଜନ୍ମମାଟିକୁ ରକ୍ଷା କରିବା ପାଇଁ ଉପକୂଳରେ ସୃଷ୍ଟି କରିଛନ୍ତି ତାଳବଣ, ନିଜସ୍ୱ ଉଦ୍ୟମରେ ୫୦ ହାଜର ଗଛ ଲଗାଇ ସାଉଁଟିଲେ ମୁଖ୍ୟମନ୍ତ୍ରୀଙ୍କ ପ୍ରଶଂସା
ଅବସର ପ୍ରାପ୍ତ ସାମରିକ କର୍ମଚାରୀଙ୍କ ନିଆରା ପ୍ରୟାସ
କନକ ବ୍ୟୁରୋ : ପ୍ରାକୃତିକ ବିପର୍ୟ୍ୟୟରୁ ସାଧାରଣ ଲୋକଙ୍କୁ ସୁରକ୍ଷା ଦେବାକୁ ଅବସର ପ୍ରାପ୍ତ ସାମରିକ କର୍ମଚାରୀଙ୍କ ନିଆରା ପ୍ରୟାସ। ଅସ୍ତରଙ୍ଗ ସମୁଦ୍ର କୂଳରେ ୫କିମି ବ୍ୟାପି ଏରିୟାରେ ୫୦ ହଜାର ତାଳ ଗଛ ଲଗାଇଲେ କୃଷ୍ଣଚନ୍ଦ୍ର ବିଶ୍ବାଳ । ଅବସରପ୍ରାପ୍ତ ସେନା ଯବାନଙ୍କ ଏଭଳି କାର୍ଯ୍ୟକୁ ନିକଟରେ ପ୍ରଶଂସା କରିଥିଲେ ମୁଖ୍ୟମନ୍ତ୍ରୀ
Kanak News is now on WhatsApp
Join and get latest news updates delivered to you via WhatsApp
ପୁରୀ ଅସ୍ତରଙ୍ଗ ବ୍ଲକ ଗୁଣ୍ଡଳବା ଗାଁର ଅବସରପ୍ରାପ୍ତ ସାମରିକ କର୍ମଚାରୀ କୃଷ୍ଣ ଚନ୍ଦ୍ର ବିଶ୍ୱାଳ । ଦିନେ ମାତୃଭୂମୀର ସୁରକ୍ଷା ପାଇଁ ସୀମାରେ ସଜା ପ୍ରହରୀ ସାଜିଥିଲେ । ଶତ୍ରୁପକ୍ଷ ସହ ଲଢେଇ କରୁଥିଲେ, ହେଲେ ଆଜି ନିଜ ଜନ୍ମଭୂମୀର ସୁରକ୍ଷା ପାଇଁ ଅଣ୍ଟା ଭିଡିଛନ୍ତି । ସମୁଦ୍ର ନିକଟରେ ଥିବା ଗାଁଗୁଡିକୁ ଢେଉମାଡରୁ ବଞ୍ଚାଇବା ଉଦେଶ୍ୟରେ ତାଳବଣ ସୃଷ୍ଟି କରୁଛନ୍ତି କୃଷ୍ଣଚନ୍ଦ୍ର । ସମୁଦ୍ର କୂଳରେ ୫ କିଲୋମିଟର ବ୍ୟାପୀ ବେଳାଭୂମୀରେ ତାଳ ଗଛ ଲଗାଇଛନ୍ତି । ନିଜେ ତାଳ ଗୋଟମା ସଂଗ୍ରହ କରି ଯେଉଁଠି ବେଳଭୂମୀ ବାଲି ଅବକ୍ଷେୟ ହେଉଛି ସେଠାରେ ତାଳଗଛ ରୋପଣ କରୁଛନ୍ତି କୃଷ୍ଣଚନ୍ଦ୍ର ।
ପ୍ରାକୃତିକ ବିପର୍ଯ୍ୟୟକୁ ମୁକାବିଲା କରିବା ଓ ପରିବେଶ ସୁରକ୍ଷା ପାଇଁ ତାଳଗଛ ବନିକରଣ କରୁଛନ୍ତି କୃଷ୍ଣଚନ୍ଦ୍ର । ଅନେକ ସମୟରେ ବାତ୍ୟା ସମୟରେ ସମୁଦ୍ର ଜୁଆର ଗାଁକୁ ମାଡିଆସେ, ବହୁ କ୍ଷୟକ୍ଷତି ଘଟାଏ । ବେଳାଭୂମୀରେ କରାଯାଉଥିବା ତାଳବଣ ଏହାକୁ ସଂପୂର୍ଣ୍ଣ ରୋକିଦେବ ତା ନୁହେଁ କିଛି ମାତ୍ରାରେ ସୁରକ୍ଷା ଦେବ ନିଶ୍ଚୟ । କୃଷ୍ଣଚନ୍ଦ୍ରଙ୍କର ଏଭଳି ପ୍ରେରଣାଦାୟୀ ପ୍ରୟାସକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଶଂସା କରିଥିଲେ । ଟ୍ୱିଟ୍ କରି ନବୀନ ଲେଖିଛନ୍ତି ସବୁଜ ଓଡିଶାର ୟୁକୋ ୱାରିୟର ଅବସରପ୍ରାସ୍ତ ସେନା ଯବାନ କୃଷ୍ଣଚନ୍ଦ୍ର ।