ବିବାଦୀୟ ବୟାନ ଦେଇଥିବା ବିଜେପି ସାଂସଦଙ୍କୁ ନିର୍ବାଚନ କମିଶନଙ୍କ ନୋଟିସ୍ । ଅନୁରାଗ ଓ ପ୍ରବେଶଙ୍କୁ ତାରକା ପ୍ରଚାରକ ତାଲିକାରୁ ବାଦ୍ ଦେବାକୁ ନିର୍ଦ୍ଦେଶ ।
କନକ ବ୍ୟୁରୋ : ବିବାଦୀୟ ବୟାନ ପାଇଁ ତାରକା ପ୍ରଚାରକ ତାଲିକାରୁ ବିଜେପି ସାଂସଦ ଅନୁରାଗ ଠାକୁର ଓ ପ୍ରବେଶ ବର୍ମାଙ୍କୁ ବାଦ୍ ଦେବାକୁ ନିର୍ବାଚନ କମିଶନଙ୍କ ନୋଟିସ । କିନ୍ତୁ ଏହା ସତ୍ୱେ ଉଭୟ ନେତା ପ୍ରଚାର କରିବେ ବୋଲି ସ୍ପଷ୍ଟ କରିଛି ବିଜେପି । ତାଙ୍କ ନାଁ କେବଳ ତାରକା ପ୍ରଚାରକ ତାଲିକାରୁ ବାଦ୍ ଦେବାକୁ କୁହାଯାଇଛି ବୋଲି କହିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ନିର୍ବାଚନ ପ୍ରଚାର ବେଳେ ବିବାଦୀୟ ବୟାନ ଦେଇଥିବା ବିଜେପି ସାଂସଦଙ୍କ ଉପରେ ଲାଗିଲା ନିର୍ବାଚନ କମିଶନଙ୍କ ଲଗାମ । ବିଜେପିର ତାରକା ପ୍ରଚାର ତାଲିକାକୁ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଓ ବିଜେପି ସାଂସଦ ପ୍ରବେଶ ବର୍ମାଙ୍କ ନାଁ ହଟାଇବା ପାଇଁ ନିର୍ଦ୍ଦେଶ ଦେଇଛନ୍ତି ନିର୍ବାଚନ କମିଶନ । ଏହା ସତ୍ୱେ ମଧ୍ୟ ବିଜେପି ପାଇଁ ଦିଲ୍ଲୀରେ ପ୍ରଚାର ଜାରି ରଖିବେ ଏହି ଦୁଇ ନେତା । ବିଜେପି ନେତା ଅଶୋକ ଗୋୟଲଙ୍କ କହିବା ଅନୁଯାୟୀ, ଅନୁରାଗ ଓ ପ୍ରବେଶଙ୍କୁ ଷ୍ଟାର ପ୍ରଚାରକ ତାଲିକାରୁ ବାଦ୍ ଦେବାକୁ କୁହାଯାଇଛି, କିନ୍ତୁ ଏହାର ମାନେ ନୁହଁ ଯେ ସେମାନେ ପ୍ରଚାର କରିପାରିବେ ନାହିଁ ।
ଉତ୍ତେଜକ ବୟାନ ଦେଇଥିବା ନେଇ ଅନୁରାଗ ଠାକୁର ଓ ପ୍ରବେଶ ବର୍ମାଙ୍କ ନାଁରେ ଅଭିଯୋଗ ହୋଇଥିଲା । ସାହିନବାଗରେ ସିଏଏ ବିରୋଧରେ ଦେଢ ମାସ ହେଲା ଜାରି ରହିଥିବା ପ୍ରତିବାଦକୁ ନେଇ ବିବାଦୀୟ ବୟାନ ଦେଇଥିଲେ ବିଜେପି ନେତା । ୨୭ତାରିଖ ଦିନ ଦିଲ୍ଲୀର ଏକ ନିର୍ବାଚନୀ ରାଲିରେ ଦେଶଦ୍ରୋହୀଙ୍କୁ ଗୁଳି କରିବା ପାଇଁ କହିଥିଲେ ଅନୁରାଗ । ଯାହାର ଜବାବ ରଖିଥିଲେ ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓୱେସୀ ।
ଆଉ ଏହାରି ଭିତରେ ଆଜି ଅନୁରାଗ ଠାକୁର ଓ ପ୍ରବେଶ ବର୍ମାଙ୍କୁ ନୋଟିସ୍ ଜାରି କରିଛନ୍ତି ନିର୍ବାଚନ କମିଶନ । ଏବଂ ଗୁରୁବାର ୧୨ଟା ସୁଦ୍ଧା ଉଭୟ ବିଜେପି ନେତାଙ୍କୁ ଜବାବ ରଖିବା ପାଇଁ ନୋଟିସରେ କୁହାଯାଇଛି । ସେପଟେ ଉଭୟଙ୍କ ନାଁ ତାରକା ପ୍ରଚାରକ ତାଲିକାରୁ ବାଦ୍ ପଡିଲେ ମଧ୍ୟ ସେମାନେ ଦିଲ୍ଲୀରେ ନିର୍ବାଚନ ପ୍ରଚାର କରିବେ ବୋଲି କହିଛି ବିଜେପି ।