ବର୍ଷେ ତଳର ଦଶହରା ! ଏ ପଟେ ଚାଲିଥିଲା ରାବଣ ଦହନ ଆଉ ସେପଟେ ଚାଲିଯାଇଥିଲା ୬୦ ଜୀବନ , ଗୁରୁତର ହୋଇଥିଲେ ୧୦୦ 

ସାରାଦେଶରେ ଧୁମଧାମରେ ଚାଲିଛି ଦଶହରା ପର୍ବ । ଠାଏଁ ଠାଏଁ ସ୍ଥାନରେ ଦହନ ହେଉଛନ୍ତି ଦାନବରାଜ ରାବଣ । କିନ୍ତୁ ଆଜି ବି ମନେ ପଡିଯାଉଛି ବର୍ଷେ ତଳର ଦଶହରା ଆଉ ରାବଣ ପୋଡିର କଥା । ଗତବର୍ଷ ପଞ୍ଜାବର ଅମୃତସରରେ ରାବଣ ଦହନ ସମୟରେ ଚାଲିଯାଇଥିଲା ୬୦ ଜଣଙ୍କ ଜୀବନ ଏବଂ ଗୁରୁତର ହୋଇଥିଲେ ୧୦୦ ଜଣ । ଆଜି ବି ସେ କଳାଦିନକୁ ମନେ ପକାଇଲେ ଛାତି ଥରି ଉଠୁଛି । ଉତ୍ସବମୁଖର ଥିବା ସ୍ଥାନଟି ନିମିସକ ମାତ୍ରକେ ବୁକୁଫଟା ଚିତ୍କାରରେ ପରିଣତ ହୋଇଥିଲା । ଘଟଣାଟି ଥିଲା କିଛି ଏଭଳି । ଅମୃତସର ଜୋଡା ଫାଟକ ନିକଟରେ ଦଶହରା ଆୟୋଜନ କରାଯାଇଥିଲା ଏବଂ ରାବଣ ଦହନର ମଧ୍ୟ ଆୟୋଜନ କରାଯାଇଥିଲା । ଏହି ସମୟରେ ରେଲୱେ ଟ୍ରାକ୍ ରେ ଲୋକମାନେ ଠିଆହୋଇ ଉତ୍ସବକୁ ଉପଭୋଗ କରୁଥିଲେ ।

ଉକ୍ତ ସମୟରେ ଅଚାନକ ଟ୍ରେନ୍ ଚାଲିଆସିଥିଲା ଏବଂ କିଛି ସମୟ ମଧ୍ୟରେ ମୃତ୍ୟୁର ତାଣ୍ଡବ ଦେଖିବାକୁ ମିଳିଥିଲା । ପଠାନକୋଟ୍ ଡିଏମୟୁ ଟ୍ରେନ୍ ଟ୍ରାକ୍ ରେ ଠିଆ ହୋଇଥିବା ଲୋକଙ୍କ ଉପରେ ଚଢିଯାଇଥିଲା । ସାମ୍ନାରେ ଜଳୁଥିଲା ରାବଣ ଆଉ ଏପଟେ ଶୁଭୁଥିଲା ଲୋକଙ୍କ ରଡି । ଅକ୍ଟୋବର ୧୯ , ୨୦୧୮ ରେ ଘଟିଥିଲା ଏହି ଘଟଣା । ସମ୍ପୁର୍ଣ୍ଣ ଦେଶକୁ ଏହି ଗୋଟିଏ ଦୁର୍ଘଟଣା ହଲାଇ ରଖିଦେଲା । କେହି କିଛି ଭାବିବା ଆଗରୁ ଦ୍ରୁତ ବେଗରେ ଆସୁଥିବା ଟ୍ରେନ୍ ଚଢିଗଲା ଲୋକଙ୍କ ଉପରେ । ଚାରିଆଡେ ବୋହିଥିଲା ରକ୍ତର ନଦୀ । ରାବଣର ଦହନ ଏବଂ ବାଣର ଶବ୍ଦ ଭିତରେ କାହାରିକୁ ଟ୍ରେନର ଶବ୍ଦ ଶୁଣାଯାଇନଥିଲା । ଆଉ ଘଟଣା ପରେ ବାଣର ଉଜ୍ଜ୍ୱଳତାରେ ଆତ୍ମୀୟଙ୍କୁ ଖୋଜୁଥିଲେ ଘରଲୋକେ । ରାବଣ ଦହନ ସମୟରେ କେହି ତାଳି ବଜାଉଥିଲା ତ କେହି ଭିଡିଓ ରେକର୍ଡିଂ କରୁଥିଲା ଏବଂ ସେହି ସମୟରେ ଘଟିଗଲା ଏହି ଘଟଣା । ଘଟଣାକୁ ବର୍ଷେ ବିତିଯାଇଛି ଲୋକଙ୍କୁ ମନରୁ ବି ଘଟଣାର ସ୍ମୃତି ପୋଛି ହୋଇଯାଇଛି । କିନ୍ତୁ ପୀଡିତ ପରିବାରଙ୍କ ପାଇଁ ଦଶହରା ସମୟ କୌଣସି କଳାଦିନଠାରୁ କମ୍ ନୁହଁ ।