ସକାଳେ ବିଧାନସଭା ରାତିରେ ସ୍ୱର୍ଗଦ୍ୱାର : ଗାଁରେ ଲାଗି ରହିଛି ଚାପା ଉତ୍ତେଜନା
ଜଗତସିଂହପୁର କୁଜଙ୍ଗର ଦୁଷ୍ମନ୍ତଙ୍କ ମୃତ୍ୟୁ ପରେ ରାତିରେ ହେଲା ପୋଷ୍ଟମର୍ଟମ; ବ୍ଲକ ପ୍ରଶାସନ ପକ୍ଷରୁ ଦିଆଗଲା ସହାୟତା
କନକ ବ୍ୟୁରୋ : ସକାଳେ ବିଧାନସଭା, ସନ୍ଧ୍ୟାରେ ସ୍ୱର୍ଗଦ୍ୱାର । ଜଗତସିଂହପୁର କୁଜଙ୍ଗର ଦୁଷ୍ମନ୍ତ ଦାସ ସକାଳେ ଆସିଥିଲେ ବିଧାନସଭା । ଗତକାଲି ପୂର୍ବାହ୍ନ ପ୍ରାୟ ସାଢେ ୧୧ଟାବେଳେ ବିଧାନସଭା ମୁଖ୍ୟ ଫାଟକ ସମ୍ମୁଖର ପଂହଚିଥିଲେ । କେହି କିଛି ବୁଝିବା ଓ ଜାଣିବା ପୂର୍ବର ସେ ହଠାତ ତାଙ୍କର ହାତ କାଟିଦେଇଥିଲେ । ଚିତ୍କାର ଶୁଣିବା ପରେ ପୁଲିସ ଅଧିକାରୀ ଓ କର୍ମଚାରୀ ତାଙ୍କୁ ଘେରିଯାଇଥିଲେ । ଘଟଣା ଦେଖି ଗଣମାଧ୍ୟମ ପ୍ରତିନିଧିମାନେ ସେଠାରେ ପଂହଚିଯାଇଥିଲେ । ପ୍ରଥମେ ତାଙ୍କୁ କ୍ୟାପିଟାଲ ହସପିଟାଲ ଓ ପରେ କଟକ ବଡ ଡାକ୍ତରଖାନାକୁ ନିଆଯାଇଥିଲା । ମାତ୍ର ସନ୍ଧ୍ୟାରେ ତାଙ୍କର ମୃତ୍ୟୁ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଦୁଷ୍ମନ୍ତଙ୍କ କହିବା କଥା ହେଲା ଜଗତସିଂହପୁର ଜିଲ୍ଲା କୁଜଙ୍କ ପଙ୍କପାଳ ଅଂଚଳର ଦୁଷ୍ମନ୍ତ ଦାସ ଗତବର୍ଷ ମାର୍ଚ୍ଚରେ ଏକ ସଡ଼କ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଘରକୁ ଫେରୁଥିବା ବେଳେ ପିକଅପ୍ ଭ୍ୟାନ୍ ଧକ୍କାରେ ତାଙ୍କର ବାମ ଗୋଡ଼ରେ ଗଭୀର ଆଘାତ ଲାଗିଥିଲା । ପ୍ରଥମେ ତାଙ୍କୁ ଜଗତସିଂହପୁର ମେଡିକାଲ ଓ ପରେ ଏସସିବିରେ ଭର୍ତ୍ତି କରାଯାଇଥିଲା । ଗତବର୍ଷ ମାର୍ଚ୍ଚ ୨୨ରେ ଏସସିବିରେ ପ୍ଲାଷ୍ଟିକ ସର୍ଜରୀ ବିଭାଗରେ ତାଙ୍କର ଅସ୍ତ୍ରୋପଚାର ହୋଇଥିଲା । ସେହିପରି ଗତବର୍ଷ ଜୁନରେ ପୁଣି ଥରେ ତାଙ୍କର ଅସ୍ତ୍ରୋପଚାର କରାଯାଇଥିଲା । ପରେ ଡାକ୍ତର ଭଲ ହୋଇଯିବ କହି ଏସସିବିରୁ ଡିସଚାର୍ଜ କରାଇଥିଲେ । ହେଲେ ସେ ଘରକୁ ଆସିବା ପରେ ଦୀର୍ଘଦିନ ପରେ ବି ଗୋଡ଼ରୁ ଯନ୍ତ୍ରଣା କମି ନଥିଲା । ବାମ ଗୋଡ଼ ସଠିକ ଭାବେ କାମ ନକରିବାରୁୁ ଚାଲିବା ବି ତାଙ୍କ ପକ୍ଷେ କଷ୍ଟକର ହୋଇପଡ଼ିଥିଲା ।