କନକ ବ୍ୟୁରୋ: ବାତ୍ୟା ‘ଜୱାଦ’ ଦୁର୍ବଳ ହୋଇ ଚାଲିଯିବା ପରେ ପାଗ ଧୀରେଧୀରେ ଠିକ୍ ହେଲାଣି, ମେଘୁଆ ପାଗ ଯାଇ ଖରା ବି ଆସିଲାଣି କିନ୍ତୁ ଚାଷୀଙ୍କ ଆଖିରୁ ଲୁହ ଶୁଖୁ ନାହିଁ । ଲଗାଣ ବର୍ଷା ଉପକୂଳ ଅଞ୍ଚଳରେ ବ୍ୟାପକ ଫସଲ ନଷ୍ଟ କରିଛି । ଅମଳ ସମୟରେ ସୁନାର ଫସଲ ଦେଖି ଚାଷୀ ମୁହଁରେ ଯେଉଁଠି ହସ ଫୁଟିବା କଥା, ଏବେ ଛାତିରେ କୋହ ଓ ଆଖିରେ ଅନିଶ୍ଚିତ ଭବିଷ୍ୟତକୁ ନେଇ ଚିନ୍ତା । ବର୍ଷାରେ ଉଜୁଡ଼ି ଯାଇଥିବା ଧାନ ଫସଲକୁ ନେଇ ଚାଷୀଙ୍କ ଆଖିରୁ ନିଜ ହଜିଗଲାଣି ।
Kanak News is now on WhatsApp
Join and get latest news updates delivered to you via WhatsApp
ପୁରୀ ଜିଲ୍ଲା ଗୋପ ବ୍ଲକର ଇଟିଭୁଆଁ ପଞ୍ଚାୟତର ଶହ ଶହ ଏକର ଜମିରେ ଧାନ ଏବେ ଗଜା ହୋଇଗଲାଣି । ବିଲରେ ପାଣି ଜମି ରହିଛି । କ’ଣ ଧାନ କାଟିବେ, ଆଉ କ’ଣ ଅମଳ କରିବେ, ସବୁ ଆଶା ଛାଡ଼ିଦେଲେଣି ଚାଷୀ । ନିମାପଡ଼ା ଓ କୋଣାର୍କରେ ମଧ୍ୟ ଧାନ ବିଲରେ ପାଣି ଜମି ଫସଲ ନଷ୍ଟ ହୋଇଯାଇଛି । ଜଗତସିଂହପୁର ଜିଲ୍ଲାରେ ମଧ୍ୟ ସମାନ ଅବସ୍ଥା । ଜିଲ୍ଲାର ମହାକାଳପଡା , ମାର୍ଶାଘାଈ ଏବଂ ଗରଦପୁର ବ୍ଲକରେ ପାଚିଲା ଧାନ ଫସଲ ପାଣିରେ ବୁଡି ରହିଥିବା ବେଳେ ଗଜା ହୋଇଗଲାଣି । ଜଗତସିଂହପୁର ଜିଲ୍ଲାରେ ପ୍ରାୟ ୫୫ ହଜାର ଏକର ଚାଷ ଜମି ଜୱାଦ ପ୍ରଭାବରେ ପ୍ରଭାବିତ ହୋଇଛି ।
ଅନ୍ୟପଟେ କଟକ ଜିଲ୍ଲା ନିଆଳି ବ୍ଲକର ଅଧିକାଂଶ ବିଲରେ ଆଣ୍ଠୁଏ ଉଚ୍ଚର ପାଣି ଜମି ରହିବାରୁ ଧାନସବୁ ପାଣିରେ ଗଜା ହୋଇଗଲାଣି । ନିଆଳି ବ୍ଲକର ପୋଖରୀଗାଁ ପଂଚାୟତର ପୋଲସରା ,ଖରିଘର ,କାହ୍ନପୁର ,ବଗଲସାହି ,ଦେଉଳୀ ,ଦେଉଳୀଢିହ ,ରାଣୀପଡା ଓ ବାଲିକୁଦର ଦୁଶ୍ୟ । ଆଠଗଡ଼ରେ ମଧ୍ୟ ଚାଷୀ ନିଜ କ୍ଷେତକୁ ଚାହିଁ ଏବେ ମଣ୍ଡରେ ହାତ ଦେଉଛନ୍ତି । କେନ୍ଦ୍ରାପଡ଼ା ଜିଲ୍ଲାର ମହାକାଳପଡା, ମାର୍ଶାଘାଈ ଏବଂ ଗରଦପୁର ବ୍ଲକରେ ପାଚିଲା ଧାନ ଫସଲ ପାଣିରେ ବୁଡି ରହିଥିବା ବେଳେ ଗଜା ହୋଇଗଲାଣି । ଦିନ କେଇଟା ପରେ ଅମଳ ହେବାକୁ ଥିବା ଧାନ ଫସଲ ଏବେ ପାଣିରେ ଭାସୁଛି ।